କନ୍ଧମାଳ: ଯୁବତୀଙ୍କ ସହ ପ୍ରେମ ସମ୍ପର୍କ ରଖି ପ୍ରତାରଣା କରିଥିବା ଏସଓଜି ଯବାନଙ୍କୁ ଶେଷରେ ବାନ୍ଧିଛି ପୋଲିସ । ଫିରିଙ୍ଗିଆ ଅଞ୍ଚଳର ଜଣେ ଦଳିତ ଯୁବତୀଙ୍କୁ ବିବାହ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିବା ଏବଂ ପରେ ଧୋକା ଦେବା ମାମଲାରେ ପୋଲିସ ଯବାନ ଦେବରାଜ କର୍ଣ୍ଣଙ୍କୁ ଗିରଫ କରି କୋର୍ଟଚାଲାଣ କରିଛି । ପରେ ତାଙ୍କ ଜାମିନ ନାମଞ୍ଜୁର ହେବାରୁ ଜେଲ ହାଜତକୁ ପଠାଇ ଦେଇଛି ପୋଲିସ।
ଅଭିଯୁକ୍ତ ଯବାନଙ୍କ ଘର ସୂବର୍ଣ୍ଣପୁର ଜିଲ୍ଲା ବିରମହାରାଜପୁରରେ ହୋଇଥିବାବେଳେ ଫିରିଙ୍ଗିଆ ଥାନା ଅଞ୍ଚଳରେ କ୍ୟାମ୍ପରେ ସେ ନିଯୁକ୍ତ ପାଇଥିଲେ । ସେଠାରେ ସ୍ଥାନୀୟ ଜଣେ ଅନୂସୁଚିତ ଜାତି ଯୁବତୀଙ୍କ ସହିତ ପ୍ରେମ ସମ୍ପର୍କ ଓ ପରେ ମନ୍ଦିରରେ ବିବାହ କରିଥିଲେ । କିନ୍ତୁ ଯବାନ ଜଣଙ୍କ ଚାକିରୀ ବଦଳି ହେବା ପରେ ସେ ପ୍ରତାରଣା କରିଥିଲେ ବୋଲି ଅଭିଯୋଗ କରିଥିଲେ ଯୁବତୀ ।
ଏତିକିରେ ସରିନାହିଁ ଘଟଣା, ମାମଲାକୁ ରଫାଦଫା କରିବା ପାଇଁ ଜଣେ ମନ୍ତ୍ରୀଙ୍କ ଭାଇ ତାଙ୍କୁ ଚାପ ପକାଉଥିବା ମଧ୍ୟ ସେ ଅଭିଯୋଗ କରିଥିଲେ। ଜିଲ୍ଲାପାଳ ଓ ଏସପି ତୁରନ୍ତ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଥିଲେ । ସବୁ ଦିଗରୁ ଚାପ ପଡ଼ିବା ପରେ ପୋଲିସର ଏକ ଟିମ ଅଭିଯୁକ୍ତ ଯବାନ ଜଣଙ୍କୁ ଗିରଫ କରିଥିଲା ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
