ଫୁଲବାଣୀ: ରାଇକିଆ ମଣ୍ଡାସରୁ ଗାଁରେ ଅଭାବନୀୟ ଘଟଣା । ସ୍ତ୍ରୀ ଉପରେ କିରାସିନ ଢାଳି ପୋଡିବା ସହ ହତ୍ୟା ଉଦ୍ୟମ କରିଛି ସ୍ବାମୀ । ଫଳରେ ଗୁରୁତର ଅବସ୍ଥାରେ ମେଡିକାଲରେ ଜୀବନ ସହ ସଂଗ୍ରାମ କରୁଛନ୍ତି ସ୍ତ୍ରୀ ଅଞ୍ଜଳି । ଘଟଣାକୁ ନେଇ ମେଡିକାଲ ପରିସରରେ ଉତ୍ତେଜନା ପ୍ରକାଶ ପାଇଥିବା ବେଳେ ପୋଲିସ ପହଞ୍ଚି ପରିସ୍ଥିତି ନିୟନ୍ତ୍ରଣ କରିବା ସହ ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ ମଙ୍ଗଳବାର ମଣ୍ଡାସରୁ ମିସିନାରୀ ସ୍କୁଲର ଶିକ୍ଷୟିତ୍ରୀ ଥିବା ଅଞ୍ଜଳିଙ୍କ ଉପରେ କିରାସିନି ଢାଳି ସ୍ବାମୀ ପ୍ରମୋଦ ନାୟକ ତାଙ୍କୁ ମାରିବାକୁ ଉଦ୍ୟମ କରିଥିଲେ। ଏଥିରେ ଅଞ୍ଜଳିଙ୍କ ଶରୀରର 60 ପ୍ରତିଶତରୁ ଅଧିକ ଅଂଶ ପୋଡିଯାଇଥିବା ଜଣାପଡିଛି । ତେବେ ଗୁରୁତର ଅବସ୍ଥାରେ ପ୍ରଥମେ ଅଞ୍ଜଳିଙ୍କୁ ରାଇକିଆ ମେଡିକାଲ ଏବଂ ପରେ ଜିଲ୍ଲା ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା ।
ଏହି ଘଟଣାରେ କିଛି କାମ କରୁ ନଥିବା ପ୍ରମୋଦ ନିଜ ରୋଜଗାରିଆ ଝିଅକୁ ମାରିବାର ଉଦ୍ୟମ କରିଥିବା ଅଭିଯୋଗ ଆଣିଛନ୍ତି ଅଞ୍ଜଳିଙ୍କ ପରିବାର ଲୋକେ । ସୂଚନା ଅନୁଯାୟୀ 14 ବର୍ଷ ପୂର୍ବେ ପ୍ରେମ ବିବାହ କରିଥିଲେ ଅଞ୍ଜଳି ଓ ପ୍ରମୋଦ । ହେଲେ ଅଧିକାଂଶ ସମୟରେ ସ୍ତ୍ରୀର ଚରିତ୍ରକୁ ସନ୍ଦେହ କରି ମାରପିଟ୍ ଓ ଗଣ୍ଡଗୋଳ କରୁଥିଲେ ବୋଲି ପରିବାର ଲୋକେ କହିଛନ୍ତି । ତେବେ ଗତ ଦଶ ଦିନ ତଳେ ଏପରି ଗଣ୍ଡଗୋଳ ହେବାରୁ ଭଉଣୀ ରୀନାଙ୍କ ଗାଁ ସୁଗୁରଡାବାଡିକୁ ଯାଇଥିଲେ ଅଞ୍ଜଳି ।
ସେଠାରେ ବୁଝାସୁଝା କରି କ୍ଷମା ମାଗିବା ସହିତ ଝିଅର ଦେହ ଖରାପ କଥା କହି ପ୍ରମୋଦ ପୁଣି ସାଥୀରେ ନେଇ ଆସିଥିଲେ ଅଞ୍ଜଳିଙ୍କୁ । ହେଲେ ମଙ୍ଗଳବାର ସମସ୍ତ ବର୍ବରତାର ସୀମା ଟପିଯାଇଥିବା କହିଛନ୍ତି ଅଞ୍ଜଳିଙ୍କ ପରିବାର । ଯାହାର ଉତ୍ତରରେ ଏହା ଅଞ୍ଜଳି ନିଜେ କରିଥିବା କହିଛନ୍ତି ସ୍ବାମୀ ପ୍ରମୋଦ ।
ମେଡିକାଲ କର୍ତ୍ତୃପକ୍ଷଙ୍କଠାରୁ ଖବର ପାଇବା ପରେ ପୋଲିସ ମୃତ୍ୟୁକାଳୀନ ଜମାନବନ୍ଦୀରେ ସ୍ବାମୀ ପ୍ରମୋଦ ହିଁ ଏପରି କରିଛି ବୋଲି କହିଛନ୍ତି ଅଞ୍ଜଳି । ହେଲେ ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଥିବା କହିଛନ୍ତି ଡାକ୍ତର । ତେଣେ ଟାଉନ ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
