ଫୁଲବାଣୀ: ଆଉ ଦିନକ ପରେ ଅର୍ଥାତ ଆସନ୍ତା 18 ତାରିଖରେ ଦ୍ବିତୀୟ ପର୍ଯ୍ୟାୟ ନିର୍ବାଚନ। ଦ୍ବିତୀୟ ପର୍ଯ୍ୟାୟ ନିର୍ବାଚନ ପାଇଁ ଆଜି(ମଙ୍ଗଳବାର) ସରୁଛି ପ୍ରଚାର। ଭୋଟରଙ୍କ ମନ ଜିଣିବା ପାଇଁ ଡୋର-ଟୁ-ଡୋର କ୍ୟାମ୍ପେନ ସାଙ୍ଗକୁ ରାଲି, ସଭା କରି ନିଜ ସପକ୍ଷରେ ଭୋଟ ହାତେଇବାକୁ ଲାଗି ପଡିଛନ୍ତି ନେତା। ପ୍ରଚାରରେ ଶେଷ ଦିନ ପରେ କନ୍ଧମାଳରେ ଜୋରଦାର ପ୍ରଚାର ଦେଖିବାକୁ ମିଳିଛି ।
ପ୍ରଚଣ୍ଡ ଖରାକୁ ଖାତିର୍ ନ କରି ବିଜେଡି, ବିଜେପି ଓ କଂଗ୍ରେସର ଉଭୟ ଲୋକସଭା ଓ ବିଧାନ ସଭା ପ୍ରାର୍ଥୀ ଦ୍ବାର ଦ୍ବାର ବୁଲି ଭୋଟ୍ ଭିକ୍ଷା କରୁଛନ୍ତି । ବିଜେଡି ପ୍ରାର୍ଥୀ ଅଚ୍ୟୁତ ସାମନ୍ତ, କଂଗ୍ରେସ ପ୍ରାର୍ଥୀ ମନୋଜ ଆଚାର୍ଯ୍ୟ ଓ ବିଜେପି ପ୍ରାର୍ଥୀ ଖାରବେଳ ସ୍ବାଇଁ ଶେଷ ଚେଷ୍ଟାରେ ଲାଗିଛନ୍ତି । ବିଜେଡି ପ୍ରାର୍ଥୀ ଅଚ୍ୟୁତ ସାମନ୍ତ କିଛି କିଛି ଛୋଟ ଛୋଟ ସଂଗଠନ,ଗୋଷ୍ଠୀ,ସଂଘ ଓ ଜାତି ଭିତ୍ତିକ ସମାଜର କର୍ମକର୍ତ୍ତା ଓ ସଭ୍ୟଙ୍କୁ ଭେଟି ଭୋଟ୍ ଦେବାକୁ ଅନୁରୋଧ କରୁଛନ୍ତି । ଅନ୍ୟପଟେ ବିଜେପି ପ୍ରାର୍ଥୀ ବ୍ୟବସାୟୀ ସଂଘ ଓ ଅନ୍ୟାନ୍ୟ ସଂଘ ସହିତ ମିଶି ଆଲୋଚନା କରୁଥିବା ବେଳେ କଂଗ୍ରେସ ପ୍ରାର୍ଥୀ ସହରରେ ଶୋଭାଯାତ୍ରା କରି ଲୋକଙ୍କୁ ଭୋଟ ମାଗିଛନ୍ତି ।
ସେହିପରି ପ୍ରଚାରର ଶେଷ ଦିନରେ ବିଜେଡି ସିନେ ଷ୍ଟାରଙ୍କୁ ପ୍ରଚାର ମଇଦାନକୁ ଓହ୍ଲାଇଥିବା ଦେଖିବାକୁ ମିଳିଥିଲା । ବିଜେଡି ପାଇଁ ଅଭିନେତା ସବ୍ଯସାଚ୍ଚୀ ଓ ଅଭିନେତ୍ରୀ ଅର୍ଚ୍ଚିତା ଫୁଲବାଣୀରେ ରୋଡ୍ ସୋ’ କରି ଭୋଟ୍ ମାଗିଥିଲେ ।
କନ୍ଧମାଳରୁ ସଦାଶିବ ମହାପାତ୍ର, ଇଟିଭି ଭାରତ
