ଭବାନୀପାଟଣା: ଉପର ମୁଣ୍ଡରେ ଲଗାଣ ବର୍ଷା ଯୋଗୁଁ ଫୁଲୁଛି ହାତୀନଦୀ । ଭୟଭୀତ ନଦୀକୂଳିଆ । କଳାହାଣ୍ଡି ଜିଲ୍ଲାରେ ଦୁଇଦିନ ହେଲା ଲାଗି ରହିଛି ଲଗାଣ ବର୍ଷା । ଏନେଇ ଅସ୍ତବ୍ୟସ୍ତ ହୋଇ ପଡିଛି ଜନଜୀବନ ।
ସୂଚନା ଅନୁଯାୟୀ ଜିଲ୍ଲାରେ ବର୍ତ୍ତମାନ ସୁଦ୍ଧା ୨୦୦ ଶହ ମିଲିମିଟର ବର୍ଷା ରେକର୍ଡ କରାଯାଇଥିବା ବେଳେ ଦିନକରେ ଜିଲ୍ଲାର ଲାଞ୍ଜିଗଡ଼ ବ୍ଲକରେ ସର୍ବାଧିକ ୬୨.୪ ମିଲିମିଟର ବର୍ଷା ରେକର୍ଡ କରାଯାଇଥିବା ନେଇ ସୂଚନା ଦେଇଛି ଆଞ୍ଚଳିକ ପାଣିପାଗ ବିଭାଗ । ସେପଟେ ଜିଲ୍ଲାର ଉପର ମୁଣ୍ଡରେ ଥିବା ଜୟପାଟଣା କଲମପୁର ଅଞ୍ଚଳରେ ଲଗାଣ ବର୍ଷା ଜାରି ରହିଛି । ମଙ୍ଗଳବାର ହାତୀ ବ୍ୟାରେଜରୁ ବର୍ଷା ଜଳ ନିଷ୍କାସନ ହେବାରୁ ହାତୀ ନଦୀରେ ଜଳ ସ୍ତର ବୃଦ୍ଧି ପାଇବାରେ ଲାଗିଛି । ଯାହାକୁ ନେଇ ହାତୀ ନଦୀ କୂଳରେ ଥିବା କଲମପୁର ବ୍ଲକର ବାଲିଛଡ଼ା, ଟେମରା, ପରୁଆଗୁଡା, ମାଟିଖାଲ, ବିରିପୁର, ଜାମପଡା, ବଙ୍କାପଲା, ଖଣ୍ଡି ଡଙ୍ଗରୀଗୁଡା ଓ ସାନକୁଟୃ ଆଦି ଗାଁର ଲୋକେ ଏବେ ଭୟଭୀତ ଅବସ୍ଥାରେ ରହିଥିବା ଦେଖିବାକୁ ମିଳିଛି । ସେପଟେ ସମସ୍ତ ଜରୁରୀକାଳୀନ ପରିସ୍ଥିତିର ସମ୍ମୁଖୀନ କରିବା ପାଇଁ ବ୍ଲକ ପ୍ରଶାସନ ପ୍ରସ୍ତୁତ ରହିଥିବା କହିଛନ୍ତି କଲମପୁର ବିଡ଼ିଓ ।
ତେବେ ଏନେଇ କଲମପୁର ବିଡ଼ିଓ ପ୍ରଶନ୍ନ ପଟେଲ କହିଛନ୍ତି , " ପ୍ରଶାସନ ସମ୍ପୁର୍ଣ୍ଣ ରୂପେ ପ୍ରସ୍ତୁତ ଅଛି । କେନାଲ ମାନଙ୍କରେ ମଧ୍ୟ ପାଣି ଛଡା ଯାଉଛି । ଯଦି ହାତୀ ନଦୀରେ ବେଶୀ ପାଣି ଆସେ କି ଯଦି ବନ୍ୟା ପରିସ୍ଥିତି ସୃଷ୍ଟି ହେଲା ସେନେଇ ପ୍ରଶାସନ ପ୍ରସ୍ତୁତ ରହିଛି ।"
ଇଟିଭି ଭାରତ, କଳାହାଣ୍ଡି
