ଭବାନୀପାଟଣା: ଆରମ୍ଭ ହେଲା ଭୋଟ ଗ୍ରହଣ । କଳାହାଣ୍ଡି ଜିଲ୍ଲାରେ ସକାଳ ୮ଟାରୁ ପୌର ନିର୍ବାଚନ ମତଦାନ ଆରମ୍ଭ ହୋଇଥିବା ବେଳେ ଏହା ସନ୍ଧ୍ୟା ୫ଟା ପର୍ଯ୍ୟନ୍ତ ଚାଲିବ । ଭୋଟ ଦେଇ ନିଜ ଜନ ପ୍ରତିନିଧି ବାଛୁଛନ୍ତି ମତଦାତା । ପୌର ନିର୍ବାଚନକୁ ନେଇ ଭୋଟରଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳୁଥିବା ବେଳେ ନେତା ଓ ପ୍ରାର୍ଥୀଙ୍କ ମନରେ ଉତ୍କଣ୍ଠା ଦେଖା ଦେଇଛି।
ଭବାନୀପାଟଣା ପୌର ପରିଷଦରେ ୫୮ଟି ବୁଥ ମାଧ୍ୟମରେ ୫୭ ହଜାର ୭୧୧ ଜଣ ଭୋଟର ନିଜର ଭୋଟ ଦେଉଥିବା ବେଳେ କେସିଙ୍ଗା ଏନଏସିରେ ୧୭ଟି ବୁଥରେ ୧୪ ହଜାର ୨୦୫ ଜଣ ଭୋଟ ଦେଉଛନ୍ତି । ସେହିଭଳି ଜୁନାଗଡ଼ ଏନଏସିରେ ୧୮ଟି ବୁଥ ମାଧ୍ୟମରେ ୧୪ ହଜାର ୭୪୩ ଜଣ ଭୋଟର ନିଜର ମତ ସାବ୍ୟସ୍ତ କରୁଥିବା ବେଳେ ଧର୍ମଗଡ଼ ଏନଏସିରେ ୧୪ଟି ବୁଥରେ ୧୨ହଜାର ୫୫୧ ଜଣ ଭୋଟର ମତ ସାବ୍ୟସ୍ତ କରୁଛନ୍ତି ।
ନିର୍ବାଚନ ପରିଚାଳନା ପାଇଁ ୬୦୩ ଜଣ ପୋଲିଂ ଅଧିକାରୀଙ୍କୁ ନିଯୁକ୍ତି କରାଯାଇଥିବା ବେଳେ ସୁରକ୍ଷା ଦୃଷ୍ଟିରୁ ୮ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି । ସେହିଭଳି ୧୨ଟି ମୋବାଇଲ ପେଟ୍ରୋଲିଂ ଟିମକୁ ନିଯୁକ୍ତି କରାଯାଇଥିବା ବେଳେ ବର୍ତ୍ତମାନ ସୁଦ୍ଧା ଶାନ୍ତି ଶୃଙ୍ଖଳାର ସହ ଆରମ୍ଭ ହୋଇଛି ମତଦାନ । ଦିବ୍ୟାଙ୍ଗଙ୍କ ପାଇଁ ବୁଥ ମାନଙ୍କରେ ହୁଇଲ ଚେଆର ବ୍ୟବସ୍ଥା କରାଯାଇଥିବା ବେଳେ ବୃଦ୍ଧ ବୃଦ୍ଧାଙ୍କ ପାଇଁ ମଧ୍ୟ ବ୍ୟବସ୍ଥା କରାଯାଇଛି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
