ଭବାନୀପାଟଣା: ରନ୍ଧନ ଗ୍ୟାସ ଲିକ ହୋଇ ନିଆଁ ଲାଗିବାରୁ ଜଳିଗଲା ୩ ବଖରା ଘର । ଏପରି ଅଭାବନୀୟ ଘଟଣା ଘଟିଛି କଳାହାଣ୍ଡି ଜିଲ୍ଲା କୋକସରା ବ୍ଲକ ରେଙ୍ଗାଲପାଲି ପଞ୍ଚାୟତ ଡଙ୍ଗରୀଗୁଡା ଗାଁରେ । ରନ୍ଧନ ଗ୍ୟାସ ସଂଯୋଗ ସମୟରେ ଗ୍ୟାସ ଲିକ୍ ହୋଇ ନିଆଁ ଲାଗିଥିବା ସୂଚନା ରହିଛି । ଅଗ୍ନିକାଣ୍ଡରେ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଥିବା ଜଣାପଡିଛି ।
ସୂଚନା ଅନୁସାରେ ଡଙ୍ଗରୀଗୁଡାର ଗାଁର ନରେନ୍ଦ୍ର କୈବର୍ତ୍ତଙ୍କ ଘରେ ଗ୍ୟାସ ସଂଯୋଗ କରୁଥିଲେ । ସେହି ସମୟରେ ହଠାତ୍ ଗ୍ୟାସ ଲିକ୍ ହୋଇ ନିଆଁ ଲାଗିଯାଇ ନିମିଷକ ମଧ୍ୟରେ ଘର ସାରା ବ୍ୟାପି ଯାଇଥିଲା। ଫଳରେ ଘର ଭିତରେ ଥିବା ଆସବାବପତ୍ର ସମେତ ଅନ୍ୟାନ୍ୟ ସାମଗ୍ରୀ ସମ୍ପୂର୍ଣ୍ଣ ଜଳିପୋଡି ନଷ୍ଟ ହୋଇଯାଇଛି ।
ଘଟଣା ପରେ କୋକସରା ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ୍ତ କରିଥିଲେ । ତେବେ ଏହି ଘଟଣାରେ ପରିବାରର ୮ ପ୍ରାଣୀ ଅଳ୍ପକେ ବର୍ତିଯାଇଛନ୍ତି । କ୍ଷତିଗ୍ରସ୍ତ ପରିବାରବର୍ଗଙ୍କୁ ସରକାରୀ ସହାୟତା ଯୋଗାଇ ଦେବା ପାଇଁ ଗ୍ରାମବାସୀ ଦାବି କରିଛନ୍ତି ।
କଲାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
