କଳାହାଣ୍ଡି: ପୁଣି ପଦାରେ ପଡିଛି ନିଅଁଣ୍ଟିଆ ଶିକ୍ଷା ବ୍ୟବସ୍ଥାର ନଗ୍ନ ଚିତ୍ର । ଆଜିର ଶିଶୁ ଆସନ୍ତା କାଲିର ନାଗରିକ । ସଭିଏଁ ପଢିବେ ସଭିଏଁ ବଢିବେ । ଏମିତି କେତେ ନାରା । ମୋ ସ୍କୁଲ ଯୋଜନାରେ ଶିକ୍ଷା ବ୍ୟବସ୍ଥାକୁ ସୃଦୃଢ କରାଯାଉଥିବା ଡେଣ୍ଡିମ ପିଟୁଛନ୍ତି ରାଜ୍ୟ ସରକାର । ତେବେ ଏସବୁ ଯେମିତି କେବଳ ସ୍ଲୋଗାନ ଓ ଭାଷଣରେ ସୀମିତ ।
ପ୍ରକୃତ ଚିତ୍ର କିନ୍ତୁ କିଛି ଅଲଗା ବୟାନ କରୁଛି । କଳାହାଣ୍ଡି ଜିଲ୍ଲା ସଦର ବ୍ଲକ ଅନ୍ତର୍ଗତ ପରିଆ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବରୁ ତାଲା ପକେଇଛନ୍ତି ଅଭିଭାବକ । ସ୍କୁଲରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ 266 ଜଣ ଛାତ୍ରଛାତ୍ରୀ ପାଠ ପଢନ୍ତି । ତେବେ ସେଥିପାଇଁ ବିଦ୍ୟାଳୟରେ 8ଜଣ ଶିକ୍ଷକ ପଦବୀ ରହିଛି । ମାତ୍ର 5 ଜଣ ଶିକ୍ଷକ ଯେନତେନ ପ୍ରକାରରେ କାମ ଚଳେଇ ନେଉଥିଲେ । 8ଟି ଶ୍ରେଣୀର ପିଲାଙ୍କୁ 5ଜଣ ଶିକ୍ଷକ ଶିକ୍ଷାଦାନ କରୁଥିଲେ । ତେବେ ଗତ ଜୁଲାଇ ମାସରେ ଜଣେ ଶିକ୍ଷକଙ୍କୁ ଅନ୍ୟତ୍ର ବଦିଳି କରାଯାଇଥିଲା । ଏହାପରେ ବିଦ୍ୟାଳୟରେ ଶିକ୍ଷାଦାନ ଏକରକମ ପ୍ରହସନ ହୋଇଯାଇଛି ।
ଅଭିଭାବକ ଓ ସ୍ଥାନୀୟ ଗ୍ରାମବାସୀ, ବିଭାଗୀୟ ଅଧିକାରୀଙ୍କୁ ବାରମ୍ବାର ଏସଂକ୍ରାନ୍ତରେ ଅଭିଯୋଗ କରିଥିଲେ । ମାତ୍ର ପ୍ରତିକାର କରିବା ତ ଦୂରର କଥା ଏହି ଅସୁବିଧାକୁ ସରକାରୀ ବାବୁ କର୍ଣ୍ଣପାତ କରିବା ଉଚିତ ମଣି ନାହାଁନ୍ତି । ଫଳରେ ବାଧ୍ୟ ହୋଇ ବିଦ୍ୟାଳୟରେ ତାଲା ପକାଇ ଅନିର୍ଦ୍ଦିଷ୍ଟ କାଳ ପାଇଁ ଧାରଣା ରେ ବସିଛନ୍ତି ଅଞ୍ଚଳ ବାସୀ । ତୁରନ୍ତ ଶିକ୍ଷକ ପଦବୀ ପୂରଣ ପାଇଁ ଅଭିଭାବକ ଓ ସ୍କୁଲ କମିଟି ଦାବି କରିଛନ୍ତି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
