ହାଇଦ୍ରାବାଦ: ବିଶିଷ୍ଟ ଶିଳ୍ପପତି ତଥା ‘ଟାଟା ଗ୍ରୁପ’ର ପୂର୍ବତନ ମୁଖ୍ୟ ରତନ ଟାଟାଙ୍କର ପରଲୋକ ହୋଇଛି । ଗତ କିଛି ଦିନ ହେବ ବାର୍ଦ୍ଧକ୍ୟଜନିତ ଅସୁସ୍ଥତା କାରଣରୁ ମୁମ୍ବାଇର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଥିବା ରତନ ଟାଟା ଗତକାଲି (ବୁଧବାର) ବିଳମ୍ବିତ ରାତିରେ 86 ବର୍ଷ ବୟସରେ ଶେଷନିଶ୍ବାସ ତ୍ୟାଗ କରିଛନ୍ତି । ତାଙ୍କ ନେତୃତ୍ବରେ ‘ଟାଟା ସମୂହ’ର ବ୍ୟବସାୟିକ ନେଟଓ୍ବାର୍କ ପ୍ରାୟ ସମସ୍ତ କ୍ଷେତ୍ରରେ ପ୍ରବେଶ କରିଥିଲା । ଜଣେ ଶୀର୍ଷସଫଳ ଶିଳ୍ପପତି ବ୍ୟତୀତ ଟାଟାଙ୍କର ଅତ୍ୟନ୍ତ ସରଳ ଜୀବନଶୈଳୀ, ନମ୍ର-ଭଦ୍ର ସ୍ବଭାବ ଓ ଭାରତୀୟ ସମାଜର ଆର୍ଥନୈତିକ ଉନ୍ନତି ପାଇଁ ସମାଜସେବା କ୍ଷେତ୍ରରେ ଦାତବ୍ୟ କାର୍ଯ୍ୟ ତାଙ୍କୁ ଏକ ଭିନ୍ନ, ଲୋକପ୍ରିୟ ବ୍ୟକ୍ତିତ୍ବର ପରିଚୟ ଦେଇଥିଲା ।
- ରାଷ୍ଟ୍ରପତି- ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଶୋକ
ଟାଟାଙ୍କ ଦେହେନ୍ତରେ ଭାରତର ଉଦ୍ୟୋଗଜଗତରେ ଏକ ଅପୂରଣୀୟ ଶୂନ୍ୟସ୍ଥାନ ସୃଷ୍ଟି ହୋଇଛି । ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବିରୋଧୀ ଦଳ ନେତା ରାହୁଲ ଗାନ୍ଧୀ ପ୍ରମୁଖ ଶୋକ ବ୍ୟକ୍ତ କରିଛନ୍ତି । ସେହିପରି ଶିଳ୍ପଜଗତ ସହ ଜଡିତ ତମାମ୍ ବିଶିଷ୍ଟ ବ୍ୟକ୍ତିବିଶେଷ ଟାଟାଙ୍କ ଦେହାନ୍ତରେ ଶୋକ ପ୍ରକାଶ କରିବା ସହ ତାଙ୍କ ଅବଦାନକୁ ସ୍ମରଣ କରିଛନ୍ତି ।
- ସମ୍ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦାରେ ଶେଷକୃତ୍ୟ
କେବଳ ଭାରତରେ ନୁହେଁ, ବିଶ୍ବବ୍ୟାପୀ ମଧ୍ୟ ଶୋକ ପ୍ରକାଶ ପାଇଛି । ଟାଟାଙ୍କୁ ଭାରତ ସରକାର ପଦ୍ମଭୂଷଣ ଓ ପଦ୍ମବିଭୂଷଣରେ ସମ୍ମାନିତ କରିଥିଲେ । ତାଙ୍କର ଶେଷ ଦର୍ଶନ ପାଇଁ ବହୁବିଶିଷ୍ଟ ବ୍ୟକ୍ତିବିଶେଷ ମୁମ୍ବାଇରେ ପହଞ୍ଚିବାରେ ଲାଗିଛନ୍ତି । ଆଜି ତାଙ୍କର ଶେଷକୃତ୍ୟ ସମ୍ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହ ଶେଷ ହେବ ।
In the sad demise of Shri Ratan Tata, India has lost an icon who blended corporate growth with nation building, and excellence with ethics. A recipient of Padma Vibhushan and Padma Bhushan, he took forward the great Tata legacy and gave it a more impressive global presence. He…
— President of India (@rashtrapatibhvn) October 9, 2024
- ବମ୍ବେ ପ୍ରେସିଡେନ୍ସିରେ ହୋଇଥିଲା ଜନ୍ମ
1937 ରେ ତତ୍କାଳୀନ ବମ୍ବେ ପ୍ରେସିଡେନ୍ସି (ବର୍ତ୍ତମାନ ଗୁଜୁରାଟ) ଟାଟା ପରିବାରରେ ଜନ୍ମଗ୍ରହଣ କରିଥିଲେ ରତନ ଟାଟା । ବାପା ଥିଲେ ନାଭାଲ ଟାଟା । ବିଦେଶରେ ଶିକ୍ଷା ଗ୍ରହଣ କରିବା ପରେ ସେ 1962ରେ ପାରିପାରିବ ବ୍ୟବସାୟିକ କମ୍ପାନୀ ସହ ଯୋଡି ହୋଇଥିଲେ । ରତନ ଟାଟାଙ୍କ ନେତୃତ୍ବରେ ଟାଟା ସମୂହ ଏକାଧିକ କ୍ଷେତ୍ରରେ ନିଜ ବ୍ୟବସାୟିକ ନେଟଓ୍ବାର୍ତ ସଫଳତାର ସହ ବୃଦ୍ଧି କରିଥିଲା । ଟାଟା ଷ୍ଟିଲ ଓ ଟାଟା ମୋଟର୍ସ ନୂଆ ଉଚ୍ଚତାକୁ ଛୁଇଁଥିଲା । ଟାଟା ଷ୍ଟିଲ ଡିଭିଜନରେ ସେ କାମ ଆରମ୍ଭ କରିଥିଲେ । ପରେ 1977 ରେ ତାଙ୍କୁ ନ୍ୟାସନାଲ ରେଡିଓ ଓ ଇଲୋକ୍ଟ୍ରୋନିକ୍ସ କମ୍ପାନୀର ଦାୟିତ୍ବ ମିଳିଥିଲା । 1991ରେ ଜେ.ଆର.ଡି ଟାଟା ‘ଟାଟା ସନ୍ସ’ର ମୁଖ୍ୟ ପଦରୁ ଅବ୍ୟାହତି ନେବା ସହ ରତ ଟାଟାଙ୍କୁ ତାଙ୍କ ବ୍ୟବସାୟିକ ଉତ୍ତରାଧିକାରୀ ଘୋଷଣା କରିଥିଲେ ।
Shri Ratan Tata Ji was a visionary business leader, a compassionate soul and an extraordinary human being. He provided stable leadership to one of India’s oldest and most prestigious business houses. At the same time, his contribution went far beyond the boardroom. He endeared… pic.twitter.com/p5NPcpBbBD
— Narendra Modi (@narendramodi) October 9, 2024
ଏହା ମଧ୍ୟ ପଢନ୍ତୁ:-ଦଶହରାରେ କେନ୍ଦ୍ର ସରକାରଙ୍କ ବଡ଼ ଘୋଷଣା, ଏହି ବର୍ଷ ଯାଏଁ ମାଗଣାରେ ମିଳିବ ପୃଷ୍ଟିକର ଚାଉଳ |
- ‘ଟାଟା-ଇଣ୍ଡିକା’ରୁ ‘ଲ୍ୟାଣ୍ଡ-ରୋଭର’ ପର୍ଯ୍ୟନ୍ତ
ଭାରତୀୟ ଅଟୋମୋବାଇଲ କ୍ଷେତ୍ରରେ ଏକ ଭିନ୍ନ ପରିଚୟ ସୃଷ୍ଟି କରିଥିବା ‘ଟାଟା-ଇଣ୍ଡିକା’ କାର ଥିଲା ରତନ ଟାଟାଙ୍କ ଡ୍ରିମ ପ୍ରୋଜେକ୍ଟ । ଏହା ଅଭୂତପୂର୍ବ ଲୋକପ୍ରିୟତା ହାସଲ କରିଥିଲା । ପରେ ସେ ବିଶ୍ବର ସବୁଠାରୁ ଶସ୍ତା କାରା ‘ଟାଟା- ନାନୋ’ ମଧ୍ୟ ବଜାରକୁ ଆଣି ରେକର୍ଡ କରିଥିଲେ । ଟାଟା ଷ୍ଟିଲ୍, ଟାଟା କନସଲଟାନ୍ସି, ଟାଟା ମୋଟର୍ସ, ଟାଟା ପାଓ୍ବାର, ଟାଟା ସଲ୍ଟ ପରି କମ୍ପାନୀ ମାଧ୍ୟମରେ ବିଶାଳ ବ୍ୟବସାୟିକ ନେଟଓ୍ବାର୍କ ଛିଡା କରିବା ସହ ‘ଲ୍ୟାଣ୍ଡ-ରୋଭର’ ଓ ‘ଜାଗୁଆର’ ପରି ୟୁରୋପୀୟ ‘ଏସୟୁଭି’ କାର କମ୍ପାନୀକୁ ଅଧିଗ୍ରହଣ କରିଥିଲା ରତନ ଟାଟାଙ୍କ ‘ଟାଟା ସନ୍ସ’ । ତାଙ୍କର କାର୍ଯ୍ୟକାଳ ସମୟରେ ଟାଟା ଗ୍ରୁପର ସମ୍ପତ୍ତି ପ୍ରାୟ 40 ଗୁଣା ବୃଦ୍ଧି ହୋଇଥିଲା ।
Deeply saddened by the passing of Ratan Tata Ji, an industry legend and a true national icon. His visionary leadership, unwavering commitment to ethics and immense contributions to India's growth will inspire generations to come. My heartfelt condolences to his family and loved… pic.twitter.com/Qf6zXvFQWB
— Mohan Charan Majhi (@MohanMOdisha) October 9, 2024
- 2012 ରେ ଜନ୍ମଦିନରେ ଅବସର ଇସ୍ତଫା ସହ ଘୋଷଣା କରିଥିଲେ ଉତ୍ତରାଧିକାରୀ-
ରତନ ଟାଟା ଅବିବାହିତ ଥିଲେ । 2012 ଡିସେମ୍ବର 28 ତାରିଖରେ ସେ ତାଙ୍କର 75ତମ ଜନ୍ମଦିନ ଅବସରରେ ‘ଟାଟା ସମୂହ’ର ମୁଖ୍ୟ ଭାବେ ଇସ୍ତାଫା ଘୋଷଣା କରିବା ସହ ନିଜ ଉତ୍ତରାଧିକାରୀ ଭାବେ ସାଇରସ ମିସ୍ତ୍ରୀଙ୍କ ନାମ ଘୋଷଣା କରିଥିଲା । ମିସ୍ତ୍ରୀ ସେତେବେଳେ ‘ସାପୋରଜୀ-ପାଲୋନଜୀ ଗ୍ରୁପ’ର ମୁଖ୍ୟ ଭାବେ କାମ କରୁଥିଲେ । ମାତ୍ର ପରବର୍ତ୍ତୀ ସମୟରେ ଏହି ନିଷ୍ପତ୍ତି ଭିନ୍ନ ମୋଡ ନେଇଥିଲା । 2016 ରେ ସାଇରସ ମିସ୍ତ୍ରୀଙ୍କୁ ଟାଟା ସନ୍ସର ମୁଖ୍ୟ ପଦରୁ ହଟିବାକୁ ପଡିଥିଲା । ପୁଣି ଥରେ ରତନ ଟାଟା ‘ଟାଟା ସନ୍ସ’ର ଅନ୍ତରୀଣ ଅଧ୍ୟକ୍ଷ ଭାବେ ଦାୟିତ୍ବ ଗ୍ରହଣ କରିଥିଲେ । 2017ରେ ସେ ‘ଟାଟା ସନ୍ସ’ର ଅନ୍ତରୀଣ ଅଧ୍ୟକ୍ଷ ପଦରୁ ଇସ୍ତାଫା ଦେବା ସହ ନଟରାଜନ ଚନ୍ଦ୍ରଶେଖରନଙ୍କ ନାମ ସୁପାରିଶ କରିଥିଲେ । ଏବେ ଟାଟା ସନ୍ସର ଅଧ୍ୟକ୍ଷ ଭାବେ ନଟରାଜନ ହିଁ ଦାୟିତ୍ବରେ ଅଛନ୍ତି । ଅବସର ଗ୍ରହଣ କରିବା ପରେ ମଧ୍ୟ ଟାଟା ବ୍ୟବସାୟ ଜଗତ ସହ ଯୋଡି ହୋଇ ରହିଥିଲେ ।
- ସଫଳତା ଓ ସମ୍ମାନ
ରତନ ଟାଟା ବିଶ୍ବର ବିଭିନ୍ନ ଦେଶର ଏକାଧିକ ପ୍ରତିଷ୍ଠିତ ଶିକ୍ଷାନୁଷ୍ଠାନ ଓ ସରକାରଙ୍କ ପକ୍ଷରୁ ସମ୍ମାନିତ ହୋଇଛନ୍ତି । 2007ରେ ସେ ‘ଲଣ୍ଡନ ସ୍କୁଲ ଅଫ୍ ଇକୋନୋମିକ୍ସ ଆଣ୍ଡ ପଲିଟିକାଲ ସାଇନ୍ସ’ର ସମ୍ମାନଜନକ ଫେଲୋସିପ୍ ଗ୍ରହଣ କରିଥିଲେ । 2010 ରେ 'ଓସଲୋ ବିଜିନେସ ପିସ ଆଓ୍ବାର୍ଡ' ଓ 2014ରେ ସମ୍ମାନଜନକ ‘ନାଇଟ୍ ଗ୍ରାଣ୍ଡ୍ କ୍ରସ୍ ଅଫ୍ ଦି ଅର୍ଡର ଅଫ୍ ବ୍ରିଟିଶ୍ ଏମ୍ପାୟାର' ଏବଂ ଫ୍ରାନ୍ସ ସରକାରଙ୍କ ଦ୍ୱାରା ‘କମାଣ୍ଡର ଅଫ୍ ଲେଜିଅନ୍ ଅଫ୍ ହନର’ ରେ ତାଙ୍କୁ ସମ୍ମାନିତ କରାଯାଇଥିଲା ।
Ratan Tata was a man with a vision. He has left a lasting mark on both business and philanthropy.
— Rahul Gandhi (@RahulGandhi) October 9, 2024
My condolences to his family and the Tata community.
- ପଦ୍ମବିଭୂଷଣରେ ସମ୍ମାନିତ କରିଛନ୍ତି ଭାରତ ସରକାର:-
ଭାରତୀୟ ଶିଳ୍ପ ଜଗତରେ ଅତୂଳନୀୟ ଅବଦାନ ପାଇଁ ଟାଟାଙ୍କୁ ପ୍ରଥମେ 2000 ମସିହାରେ ‘ପଦ୍ମଭୂଷଣ’ ଓ ପରେ 2008 ମସିହାରେ ଦେଶର ଦ୍ବିତୀୟ ସର୍ବୋଚ୍ଚ ସମ୍ମାନ ‘ପଦ୍ମବିଭୂଷଣ’ରେ ସମ୍ମାନିତ କରିଥିଲେ ଭାରତ ସରକାର । ତାଙ୍କୁ ମହାରାଷ୍ଟ୍ର ସରକାର ମଧ୍ୟ ‘ମହାରାଷ୍ଟ୍ର ଭୂଷଣ’ ସମ୍ମାନରେ ସମ୍ମାନିତ କରିଥିଲେ । ଏହା ସହ ତାଙ୍କୁ ବିଭିନ୍ନ ଜାତୀୟ ଶିକ୍ଷାନୁଷ୍ଠାନ ଓ ବିଶ୍ବବିଦ୍ୟାଳୟଗୁଡିକ ମଧ୍ୟ ସମ୍ମାନଜନକ ଉପାଧି ଓ ଡିଗ୍ରୀରେ ସମ୍ମାନିତ କରିଛନ୍ତି ।
- ସମାଜସେବା କ୍ଷେତ୍ରରେ ଥିଲା ଭିନ୍ନ ରୁଚି:-
ବିଶାଳ ବ୍ୟବସାୟିକ ସାମ୍ରାଜ୍ୟର ମୁଖ୍ୟ ହୋଇ ମଧ୍ୟ ତାଙ୍କର ଜୀବନଶୈଳୀ ଥିଲା ବେଶ ସାଧାସିଧା, ସରଳ ଓ ନିରାଡମ୍ବର । ଟାଟା ଗ୍ରୁପ ବିଭିନ୍ନ କମ୍ପାନୀ ଓ ସଂସ୍ଥା ନିକଟରେ ମୋଟ 30 ଲକ୍ଷ କୋଟିର ସମ୍ପତ୍ତି ଥିବା ବେଳେ ଏହାର ମୁଖ୍ୟ ରତନ ଟାଟାଙ୍କ ନିକଟରେ ବ୍ୟକ୍ତିଗତ ସମ୍ପତ୍ତି 3 ହଜାର 8 ଶହ କୋଟି ଥିଲା । ଏହି ତଥ୍ୟ ପ୍ରକାଶ ପାଇବା ପରେ ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଥିଲା । ଏହାର କାରଣ ଥିଲା, ଟାଟା କେବଳ ବ୍ୟବସାୟିକ ଲାଭଖୋର ମନୋବୃତ୍ତି କିମ୍ବା ପ୍ରତିଯୋଗିତାରେ ବିଶ୍ବାସ କରୁନଥିଲେ । ଭାରତୀୟ ସମାଜର ଆର୍ଥନୈତିକ ଉତ୍ଥାନ ପାଇଁ ତାଙ୍କର ଏକ ଲମ୍ବା ଭିଜନ ଥିଲା । ‘ଟାଟା ଗ୍ରୁପ’ ଅଧୀନରେ ପରିଚାଳିତ ଟାଟା ଟ୍ରଷ୍ଟକୁ ନିଜ ଆୟର 66 ପ୍ରତିଶତ ଦାନ କରୁଥିଲେ ରତନ ଟାଟା । ଶିକ୍ଷା, ସ୍ବାସ୍ଥ୍ୟ ଓ ବିଭିନ୍ନ ସମ୍ବଦନଶୀଳ ବର୍ଗର ଆର୍ଥନୈତିକ ଉନ୍ନତି ପାଇଁ ଏହି ଟ୍ରଷ୍ଟ କାମ କରୁଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
