କଳାହାଣ୍ଡି: ଉପାନ୍ତ ଇଲାକାରେ ପୁଣି ଖଟିଆରେ ବୁହାହେଲେ ଗର୍ଭବତୀ । ରାସ୍ତା ନଥିବାରୁ ଝିପଝିପି ବର୍ଷାରେ କାଦୁଅ ପଙ୍କ ଭରା ଜଙ୍ଗଲୀ ରାସ୍ତା ଭିତରେ ଗର୍ଭବତୀଙ୍କୁ 3 କିଲୋମିଟର ବୁହାଯାଇଛି । ଏହା ପରେ ଆମ୍ବୁଲାନ୍ସରେ ଜୟପାଟଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି । ସ୍ବାସ୍ଥ୍ୟସେବାର ଏଭଳି ନଗ୍ନ ନମୁନା କଳାହାଣ୍ଡିର ଜୟପାଟଣା ବ୍ଲକ ଅନ୍ତର୍ଗତ ନାଗୁପଡାରେ ଦେଖିବାକୁ ମିଳିଛି । ତେବେ ଗର୍ଭବତୀଙ୍କ ମୁଣ୍ଡରେ ଆଘାତ ଲାଗିଥିବାରୁ ସ୍ବାସ୍ଥ୍ୟବସ୍ଥା ସଙ୍କଟ ରହିଥିବା ଜଣାପଡିଛି ।
ଦୀର୍ଘଦିନର ଦାବି ସତ୍ତ୍ବେ ବି ଛଚାନ ନଦୀରେ ପୋଲଟିଏ ନିର୍ମାଣ ହୋଇପାରିନାହିଁ । ଫଳରେ ଜୟପାଟଣା ବ୍ଲକରୁ ୭ କିମି ଦୂରରେ ଥିବା ଏହି ନାଗୁପଡାରେ ୫୦୦ରୁ ଊର୍ଦ୍ଧ୍ବ ଅଧିବାସୀ ନାହିଁ ନଥିବା ଅସୁବିଧାର ସାମ୍ନା କରୁଛନ୍ତି । ଆମ୍ବୁଲାନ୍ସ ଦୂରର କଥା ଯାତାୟତ ପାଇଁ ମଧ୍ୟ ଏଠରେ ରାସ୍ତା ଖଣ୍ଡିଏ ନାହିଁ । ଯେଉଁଥିପାଇଁ ରୋଗୀ, ଗର୍ଭବତୀଙ୍କୁ ଭାରରେ ବୋହି ଡାକ୍ତରଖାନା ଅଣାଯାଉଛି । ପୂର୍ବରୁ ଏପରି ଘଟଣା ବାରମ୍ବାର ଘଟିଥିଲେ ସୁଦ୍ଧା ବିଡ଼ିଓ, ଜିଲ୍ଲାପାଳ ତଥା ବିଧାୟକଙ୍କ କାର୍ଯ୍ୟାନୁଷ୍ଠାନ ଶୂନ ।
ଏ ନେଇ ଗ୍ରାମବାସୀ ଗତ ତ୍ରିସ୍ତରୀୟ ପଂଚାୟତ ନିର୍ବାଚନ ଓ ସାଧାରଣ ନିର୍ବାଚନରେ ଭୋଟ ବର୍ଜନ ମଧ୍ୟ କରିସାରିଲେଣି । ହେଲେ ଏହାର ମଧ୍ୟ କୌଣସି ଫରକ ପଡୁନି ।
କଳାହାଣ୍ଡିରୁ ଅଜିତ ସିଂହ , ଇଟିଭି ଭାରତ
