କଳାହାଣ୍ଡି: ଏ ହେଉଛନ୍ତି ଗାୟତ୍ରୀ ଦୋରା । ବସୟ 36 ବର୍ଷ। ଘର କଳାହାଣ୍ଡି ଜିଲ୍ଲା ସଦର ବ୍ଲକ ଦାଦପୁର ଗାଁ । ହେଲେ ଭାରି ଦୁଃଖିନିଟା । 19 ବର୍ଷରୁ ବିବାହ କରିଥିଲେ ହେଲେ ରୋଗ ପାଇଁ ବିବାହିତ ଗାୟତ୍ରୀ ଏବେ ସ୍ବାମୀଙ୍କ ତାଡନାର ଶିକାର ହୋଇ ବାପ ଘରେ ଆଶ୍ରିତ।
ଗୋଟିଏ ପଟେ ମାନସିକ ଦୁଶ୍ଚିନ୍ତା ଓ ଅନ୍ୟପଟେ ଶରୀରର ଅସହ୍ୟ ଯନ୍ତ୍ରଣା ଯାହା ତାଙ୍କୁ ଶଯ୍ୟାରେ କିଲବିଲ କରୁଛି। ଏବେ ପରିବାର କହିଲେ ଗାୟତ୍ରୀଙ୍କ ସହ ବୁଢା ବାପା ଓ ଭାଇ। ଦିନମଜୁରିଆ ଭାବେ କାମ କରୁଥିବା ବୁଢା ବାପାର ରୋଜଗାରରେ ପରିବାର ଚଳେ। ଆଉ ଏସବୁ ଭିତରେ ଗାୟତ୍ରୀର ଦୁଃଖ ସତେ ଯେମିତି ବୋଝ ଉପରେ ନଳିତା ବିଡା ।
୩ ବର୍ଷ ହେବ ଗାୟତ୍ରୀ ଏକ ଅଜଣା ରୋଗରେ ଆକ୍ରାନ୍ତ । ଯାହାଫଳରେ ପେଟ ଅସ୍ବାଭାବିକ ଭାବେ ବଢିବାରେ ଲାଗିଲା। ଏନେଇ ବିଷମକଟକ ମିଶନାରୀ ଡାକ୍ତରଖାନାରେ ଚିକିତ୍ସା ପରେ ଏକ ଅସ୍ତ୍ରୋପଚାରର ଆବଶ୍ୟକତା ଥିବା ଡାକ୍ତର କହିଛନ୍ତି। ହେଲେ ଅର୍ଥାଭାବ ଗାୟତ୍ରୀର ଚିକିତ୍ସା ପାଇଁ ବାଧକ ସାଜିଛି ।
ଗରିବଙ୍କ ପାଇଁ ସରକାରଙ୍କ ମାଳମାଳ ଯୋଜନା ସହ ମାଗଣା ଚିକିତ୍ସା ସୁବିଧା । ହେଲେ ସଚେତନତାର ଅଭାବ ଯୋଗୁଁ ଗାୟତ୍ରୀଙ୍କ ପରିବାର ଏସବୁ ଯୋଜନାର ସୁଫଳ ପାଇବାରୁ ବଞ୍ଚିତ। ଏହି ପରିବାରକୁ ପ୍ରଶାସନିକ ସ୍ତରରେ ସହଯୋଗ କରିବାକୁ ଗାଁ ର କିଛି ସମାଜସେବୀ ଦାବି କରିଛନ୍ତି।
କଳାହାଣ୍ଡିରୁ ଅଜିତ୍ ସିଂ,ଇଟିଭି ଭାରତ
