ଭବାନୀପାଟଣା: ବର ଶିଶୁପାଳ ହୋଇ ଫେରିବା ଘଟଣା ଶୁଣିଥିବେ, ହେଲେ ଏଠି ଘଟଣା କିଛି ଭିନ୍ନ । ବନ୍ଧୁ ବାନ୍ଧବଙ୍କ ଗହଳି ଚହଳିରେ ଘର ଫାଟି ପଡୁଥିଲା । ବିବାହ ପାଇଁ ବେଦୀ ସହ ପ୍ରସ୍ତୁତ ଥିଲେ ବ୍ରାହ୍ମଣ । ସେପଟେ ବାଜା ବାଣ ରୋଷଣୀ ସହ ମହାଆଡମ୍ବରରେ ବିବାହ ପାଇଁ ବର ପହଞ୍ଚିଥିଲା କନ୍ୟା ଘରକୁ । ମାତ୍ର ଶେଷ ମୁହୂର୍ତ୍ତରେ ଧୋକା ଦେଇ ବାହା ବେଦୀରୁ ଫେରାର୍ ହୋଇଗଲା କନ୍ୟା । ପରେ ଦୁଇ ପରିବାରର ସଲାସୁତୁରାରେ ନାବାଳିକା ଶାଳିକୁ ବାହା ହେଲା ବର । ଫଳସୂରୁପ ନାବାଳିକା ସହ ବିବାହ ପାଇଁ ଏବେ ଖୁବ ହଟହଟା ହେବାକୁ ପଡିଛି ବରକୁ । ଏହି ଘଟଣାଟି ହେଉଛି କଳାହାଣ୍ଡି ଜିଲ୍ଲା କଲମପୁର ବ୍ଲକ ତେନ୍ତୁଳିଖୁଣ୍ଟ ଗାଁର ।
ସୂଚନା ଅନୁଯାୟୀ, ମଙ୍ଗଳବାର ରାତ୍ରିରେ ଜୟପାଟଣା ଥାନା ବଟ କର୍ଲାକୋଟ ମଲାପଡା ଗାଁକୁ କଲମପୁର ବ୍ଲକ ତେନ୍ତୁଳି ଗାଁରୁ ବର ଆସିଥିଲା । ହେଲେ ଶ୍ବଶୁର ଘରେ ପହଞ୍ଚିଲା ବେଳକୁ କନ୍ୟା ବେଦିରୁ ଚମ୍ପଟ ମାରିଥିଲା । ଯଦ୍ବାରା ନାବାଳିକା ଶାଳିକୁ ବିବାହ କରି ଘରକୁ ଫେରିଥିଲା ବର । ମାତ୍ର ଝିଅ ନାବାଳିକା ହେତୁ ବିଶ୍ବସ୍ତ ସୂତ୍ରରୁ ଖବର ପାଇ ଜୟପାଟଣା ସିଡିପିଓ ଓ ପୋଲିସ ପହଞ୍ଚି ଶାଶୁଘର ତେନ୍ତୁଳିଖୁଣ୍ଟା ଗାଁରୁ ନାବାଳିକା ବଧୂକୁ ଉଦ୍ଧାର କରିଛି ।
କଳାହାଣ୍ଡିରୁ ଅଜିତ କୁମାର ସିଂହ, ଇଟିଭି ଭାରତ
