ଭବାନୀପାଟଣା: ପରିବାର ପ୍ରତିପୋଷଣ କରିବା ପାଇଁ ଦାଦନ ଖଟିବାକୁ ଯାଇ ତେଲେଙ୍ଗାନାରେ ବନ୍ଧା ପଡ଼ିଛନ୍ତି ଶ୍ରମିକ । ମୁକୁଳିବାର କୌଣସି ଉପାୟ ନପାଇ ଦୁଇଟି ଭିଡିଓ ମାଧ୍ୟମରେ ସେମାନଙ୍କୁ ଉଦ୍ଧାର କରିବା ପାଇଁ ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କୁ କରିଛନ୍ତି ନିବେଦନ ।
ସୂଚନା ଅନୁସାରେ କଳାହାଣ୍ଡି ଜିଲ୍ଲା ଧର୍ମଗଡ ବ୍ଲକର ବେହେରାଗୁଡା ଏବଂ ରଏନଗୁଡା ଗ୍ରାମର ଅନେକ ଶ୍ରମିକ ତେଲେଙ୍ଗାନାର ଏକ ଇଟାଭାଟିରେ କାମ କରିବା ପାଇଁ ଯାଇଥିଲେ । ବଲାଙ୍ଗୀର ଜିଲ୍ଲାର ବେଣୁ ଦାସ ନାମକ ଜଣେ ଦଲାଲ ଏହି ଶ୍ରମିକଙ୍କୁ ତେଲଙ୍ଗାନାର ରଙ୍ଗାରେଡ୍ଡୀ ଜିଲ୍ଲା ଅନ୍ତର୍ଗତ ଏକ ଇଟାଭାଟିରେ କାମ କରିବା ପାଇଁ ନେଇଥିଲା । ରୋଜଗାର ଆଶାରେ ଛୋଟ ଛୋଟ ପିଲାଙ୍କ ଧରି ସପରିବାର ଯାଇଥିଲେ ଇଟାଭାଟିରେ କାମ କରିବା ପାଇଁ । ତେବେ ସେଠାରେ ସେମାନେ ପାରିଶ୍ରମିକ ମାଗିବା ପରେ ଅତ୍ୟାଚାର ଆରମ୍ଭ କରିଥିଲେ ଇଟାଭାଟି ମାଲିକ । କେବଳ ଯୁବ ଶ୍ରମିକ ନୁହନ୍ତି ବୟସ୍କ ଲୋକମାନଙ୍କୁ ପାରିଶ୍ରମିକ ନଦେଇ ମାଡମାରିବା ସହିତ ଶାରିରୀକ ନିର୍ଯ୍ୟାତନା ଦେଉଛନ୍ତି ଇଟଭାଟି ମାଲିକ । ଇଟାଭାଟି ମାଲିକ ବିନା ଟଙ୍କାରେ କାମ କରିବା ପାଇଁ ସେମାନଙ୍କୁ ବାଧ୍ୟ କରିବା ସହ କାମ ନ କଲେ ଅମାନୁଷିକ ଭାବରେ ନିର୍ଯ୍ୟାତନା ଦେଉଥିବା ଅଭିଯୋଗ ହୋଇଛି । ଅନେକ ଥର ସେଠାରୁ ଲୁଚି ପଳାଇ ଆସିବାକୁ ଉଦ୍ୟମ କରିବାରୁ ବର୍ତ୍ତମାନ ସେମାନଙ୍କୁ ବନ୍ଦୀ କରି ରଖାଯାଇଥିବା ଜଣାପଡିଛି । ଇଟାଭାଟି ମାଲିକର ମାଡଗାଳି ସହି ପାରିଶ୍ରମିକ ପାଇବା ଆଶାରେ ପିଲାଛୁଆଙ୍କୁ ଧରି ପଡି ରହିଛନ୍ତି ଏହି ଶ୍ରମିକମାନେ ।
ଇଟିଭି ଭାରତ, କଳାହାଣ୍ଡି
