ଭବାନୀପାଟଣା: ସରିଲା କୁହୁରା ଉପନିର୍ବାଚନ । ନୂତନ ସମିତି ସଭ୍ୟା ଭାବରେ ନିର୍ବାଚିତ ହେଲେ ମୀନା ମହାନନ୍ଦ । କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଳକ କୁହୁରା ପଞ୍ଚାୟତ ସମିତି ସଭ୍ୟ ପଦବୀ ପାଇଁ ବୁଧବାର ଉପନିର୍ବାଚନ ହୋଇଥିବାବେଳେ ମୀନା ମହାନନ୍ଦ ନିର୍ଦ୍ୱନ୍ଦରେ ନିର୍ବାଚିତ ହୋଇଛନ୍ତି । ମୀନା ହେଉଛନ୍ତି ବର୍ତ୍ତମାନର ଗୋଲାମୁଣ୍ଡା ବ୍ଲକ ଅଧ୍ୟକ୍ଷ ବିନ୍ଦୁ ମହାନନ୍ଦଙ୍କ ପତ୍ନୀ । କୁହୁରା ପଞ୍ଚାୟତର ପୂର୍ବତନ ସମିତି ସଭ୍ୟା ମାଧୁରୀ ମହାନନ୍ଦଙ୍କ ଗତ କିଛି ଦିନ ତଳେ ଅକାଳ ବିୟୋଗ ହୋଇଥିଲା । ଏହାପରେ ଏଠାରେ ଉପନିର୍ବାଚନ ହେବା ନେଇ ଘୋଷଣା ହୋଇଥିଲା ।
ଏହି ଉପନିର୍ବାଚନ ଅନୁଷ୍ଠିତ ହୋଇଥିବାବେଳେ ତ୍ରିସ୍ତରୀୟ ନିର୍ବାଚନର ବର୍ଷକ ପରେ ମଧ୍ୟ ନିଜ ପତ୍ନୀଙ୍କୁ ନିର୍ଦ୍ବନ୍ଦରେ ନିର୍ବାଚିତ କରିବା ବିନ୍ଦୁ ମହାନନ୍ଦଙ୍କ ଲୋକପ୍ରିୟତାର ଏକ ପ୍ରମାଣ ବୋଲି ସ୍ପଷ୍ଟ ବାରି ହୋଇପଡୁଛି । ଉପନିର୍ବାଚନ ଘୋଷଣା ହେବା ପରେ ମୀନା ମହାନନ୍ଦ କୁହୁରା ପଞ୍ଚାୟତର ଉପନିର୍ବାଚନରେ ପ୍ରତିଦ୍ବନ୍ଦିତା କରିବା ଜାଣି ବିରୋଧୀ ଗୋଷ୍ଠୀ ଘନ ଘନ ବୈଠକ ପରେ ଜଣକୁ ପ୍ରାର୍ଥୀ କରାଇଥିଲେ । ତେବେ ବିରୋଧୀଙ୍କ ଚକ୍ରବ୍ୟୁହକୁ ଭେଦ କରି ନିର୍ଦ୍ବନ୍ଦରେ ନିର୍ବାଚିତ ହୋଇଛନ୍ତି ମୀନା ମହାନନ୍ଦ । ରାଜନୀତିରେ ପାଦ ଥାପି ମାତ୍ର ବର୍ଷେ ହୋଇଥିବାବେଳେ ବିନ୍ଦୁ ଜଣେ ଅଭିଜ୍ଞ ରାଜନେତା ଭଳି ବିରୋଧୀଙ୍କୁ ମନାଇବାରେ ସଫଳ ହୋଇଛନ୍ତି ।
ଏହାପୂର୍ବରୁ ମୀନା ମହାନନ୍ଦ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ମାନଝରୀ ପଞ୍ଚାୟତରୁ ପ୍ରତିଦ୍ବନ୍ଦିତା କରି ୧୮୦୦ ଭୋଟ ପାଇ ମାତ୍ର ୮୦ ଭୋଟରେ ପୂର୍ବତନ ବ୍ଲକ ଅଧ୍ୟକ୍ଷ ତଥା କଂଗ୍ରେସ ନେତା ତୁଳେଶ୍ବର ନାଏକଙ୍କ ଠାରୁ ପରାଜିତ ହୋଇଥିଲେ । ଆଗାମୀ ଦିନରେ ନିଜ ସ୍ବାମୀଙ୍କ ପଦାନୁସରଣ କରି ଜନସେବାକୁ ଅଗ୍ରାଧିକାର ଦେବା ସହ ପଞ୍ଚାୟତର ସମସ୍ତ ସମସ୍ୟାର ସାମାଧାନ କରିବା ଏବଂ ନିଜ ପଞ୍ଚାୟତକୁ ଏକ ଆଦର୍ଶ ପଞ୍ଚାୟତ ଭାବରେ ଗଢି ସରକାରଙ୍କ ସମସ୍ତ ଯୋଜନାକୁ ଲୋକଙ୍କ ନିକଟରେ ପହଞ୍ଚାଇବେ ବୋଲି ମୀନା ମହାନନ୍ଦ ପ୍ରକାଶ କରିଛନ୍ତି ।
କୁହୁରା ଉପ ନିର୍ବାଚନକୁ ନେଇ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତ ହୋଇଥିଲା । ପୋଲିସ ପକ୍ଷରୁ ମଧ୍ୟ ବ୍ୟାପକ ପ୍ରସ୍ତୁତି କରାଯାଇଥିଲା । ସମିତି ସଭ୍ୟ ପଦବୀ ପାଇଁ ଉପନିର୍ବାଚନରେ ନିର୍ଦ୍ୱନ୍ଦରେ ନିର୍ବାଚିତ ହୋଇଛନ୍ତି ମୀନା ମହାନନ୍ଦ । ଏନେଇ ଘୋଷଣା ହେବା ପରେ ଅଞ୍ଚଳରେ ଉତ୍ସବର ମାହୋଲ ଦେଖିବାକୁ ମିଳିଛି । ମୀନାଙ୍କ ସମର୍ଥକମାନେ ପରସ୍ପରକୁ ମିଠା ଖୁଆଇ ବିଜୟ ଉତ୍ସବ ପାଳନ କରିଛନ୍ତି ।
ଇଟିଭି ଭାରତ, କଳାହାଣ୍ଡି
