ଭବାନୀପାଟଣା: ଚଳିତ ରବି ଧାନ ବିକ୍ରିରେ ଲାଗିଛି କଟକଣା । ଏନେଇ କଳାହାଣ୍ଡି ଜିଲ୍ଲା କଲମପୁରଠାରେ ଚାଷୀଙ୍କ ବିକ୍ଷୋଭ । ପୂର୍ବରୁ ଚାଷୀମାନେ ଆଟ, ମାଲ ,ବେରନା ଓ ବାହାଲ କିସମ ଚାଷ ଜମିରୁ ନିଜ କଷ୍ଟ ଉପାର୍ଜିତ ଧାନକୁ ବିକ୍ରି କରିଆସୁଛନ୍ତି । ତେବେ ଆଗାମୀ ରବି ୠତୁଠାରୁ ଚାଷୀମାନେ କେବଳ ବାହାଲ ଜମିରୁ ଉତ୍ପାଦନ ହେଇଥିବା ଧାନକୁ ବିକ୍ରି କରି ପାରିବେ ବୋଲି ପଞ୍ଜୀକରଣ ହେଉଥିବା ଧାନ କ୍ରୟ ସଂସ୍ଥା ଦ୍ବାରା ଜଣାପଡିଛି । ଏହାକୁ ନେଇ ଚାଷୀମାନଙ୍କ ମଧ୍ୟରେ ଦେଖାଦେଇଛି ଅସନ୍ତୋଷ ।
ଜିଲ୍ଲାର ବିଭିନ୍ନ ଅଞ୍ଚଳରେ ଚାଷୀମାନେ ବିଶେଷ କରି ଏହି ସବୁ କିସମ ଅର୍ଥାତ ଆଟ, ମାଲ, ବେରନା ଏବଂ ବାହାଲ ଜମିରେ ଚାଷ କରିଆସୁଥିବା ବେଳେ କେବଳ ବାହାଲ କିସମ ଜମିରୁ ଉତ୍ପାଦନ ହେଇଥିବା ଧାନକୁ ବିକ୍ରି ପାଇଁ ଅନୁମତି ମିଳିଛି । ତେବେ ବାକିତକ ଜମିରୁ ଉପାର୍ଜିତ ହେଉଥିବା ଧାନକୁ କିଭଳି ବିକିବେ, ତାହାକୁ ନେଇ ବର୍ତ୍ତମାନ ପ୍ରଶ୍ନବାଚୀ ସୃଷ୍ଟି ହୋଇଛି ।
ଏନେଇ ଆଜି ଚାଷୀ ନେତା ଲକ୍ଷ୍ମୀକାନ୍ତ ବାଗଙ୍କ ନେତୃତ୍ବରେ ଚାଷୀମାନେ ବିକ୍ଷୋଭ ପ୍ରଦର୍ଶନ କରିବା ସହ ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ କଲମପୁର ତହସିଲଦାରଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
