ଭବାନୀପାଟଣା: କଳାହାଣ୍ଡିର ଥୁଆମୂଳ ରାମପୁରବ୍ଲକ ଅମଠାଗୁଡା ଗ୍ରାମରେ ଅବକାରୀ ବିଭାଗର ଚଢାଉ । ବିପୁଳ ପରିମାଣର ମଦ ଜବତ । ଜଣେ ଆସାଧୁ ମଦ ବ୍ୟବସାୟୀ ଗିରଫ । ସୂଚନା ଅନୁସାରେ, ଦେଶୀ ମଦ ଭାଟିରେ ନକଲି ବିଦେଶୀ ମଦ ପ୍ରସ୍ତୁତ ହେଉଥିଲା । ଦୀର୍ଘ ଦିନ ଧରି ବେଧଡ଼କ ଭାବେ ନକଲି ମଦ ସାମ୍ରାଜ୍ୟ ବିସ୍ତାର କରିଥିଲେ ମଦ ମାଫିଆ । ଏ ନେଇ କୌଣସି ଏକ ସୁତ୍ରରୁ ଖବର ପାଇ ଅବକାରୀ ବିଭାଗ ଅତର୍କିତ ଚଢ଼ାଉ କରି ବିପୁଳ ପରିମାଣରେ ଦେଶୀ ଓ ବିଦେଶୀ ନକଲି ମଦ ଜବତ କରିଛି ।
ଏଥିସହ ଜଣେ ମଦ ବ୍ୟବସାୟୀକୁ ଗିରଫ କରିଥିବା ଜଣାପଡ଼ିଛି । ଚଢାଉ ସମୟରେ ୯ ଲିଟର ନକଲି ବିଦେଶୀ ମଦ, ବିଅର ୬୦ ଲିଟର, ନକଲି ଦେଶୀ ମଦ ୧୦୦ ପ୍ୟାକେଟ, ୨୧୬ ଗୋଟି ଇଏଲ, ମଦ ପୋଚ୍ ଜବତ କରିବା ସହ ମଦ ଭାଟି ମ୍ୟାନେଜର ଭଗବାନ ପ୍ରସାଦ ସାହୁକୁ ଗିରଫ କରି ଦଫା ୫୨(ଏ) ୫୫, ୫୬ ଓଡିଶା ଅବକାରୀ ଆଇନ ଅନୁଯାୟୀ କୋର୍ଟ ଚାଲାଣ କରିଛି ।
ଏନେଇ କଳାହାଣ୍ଡି ଅତିରିକ୍ତ ଅବକାରୀ ଅଧିକ୍ଷକ ଲଳିତ ମୋହନ ମିଶ୍ର ସୂଚନା ଦେଇଛନ୍ତି । ଏହି ନକଲି ମଦ କେଉଁ କେଉଁ ମଦ ଦୋକାନକୁ ଯୋଗାଣ ହେଉଥିଲା ଓ ଏହି ଭାଟି ମାଲିକ ଏହି ନକଲି ମଦ କାରବାରରେ ସମ୍ପୃକ୍ତ ଅଛିକି ନାହିଁ ସେନେଇ ତଦନ୍ତ ଆରମ୍ଭ କରିଛି ଅବକାରୀ ବିଭାଗ ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
