ଭବାନୀପାଟଣା: ସମୟ ଦିନ ଗୋଟିଏ । ଟାଇଁ ଟାଇଁ ଖରା । ପାରଦ 43 ଡିଗ୍ରୀ ଉପରେ । ଯେଉଁ ସମୟରେ ଘରୁ ବାହାରିବା ବି ମୁସକିଲ । ହେଲେ ଏଠି ପୂର୍ତ୍ତବିଭାଗ ଅଧିନରେ ଚାଲିଛି ରାସ୍ତା ଓ କୋଠା ନିର୍ମାଣ କାମ । ନିୟୋଜିତ ଅଛନ୍ତି ବହୁ ଶ୍ରମିକ । କାହିଁକି ନା ଏମାନେ ଭଲରେ ବୁଝିଛନ୍ତି, ଠିକାଦାରଙ୍କ କଥା ନମାନିଲେ କାମ ମିଳିବନି । ଆଉ କାମ ନକଲେ ପେଟ ପାଇଁ ଦାନା ବି ନାହିଁ । ଏ ଦୃଶ୍ୟ ଖୋଦ କଳାହାଣ୍ଡି ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟର । ସରକାରୀ ନିୟମ କାନୁନ ସତେ ଯେମିତି ଏଠି ଧର୍ମକୁ ଆଖିଠାର ।
ନିୟମ ମୁତାବକ ଖରାଯୋଗୁଁ ଦିନ 11ଟା ପରେ କାମ ବନ୍ଦ ରହିବା କଥା । ହେଲେ ଠିକାଦାର କହୁଛନ୍ତି, ଶ୍ରମିକ ବହୁ ଦୂରରୁ ଆସୁଛନ୍ତି । କାମ ଆରମ୍ଭ ହେଲା ବେଳକୁ 9ଟା ହୋଇଯାଉଛି । ଯେଉଁଥିପାଇଁ 12.30 ପର୍ଯ୍ୟନ୍ତ କାମ କରାଇବାକୁ ପଡୁଛି । ସେପଟେ କେବଳ ଗୋଟିଏ ଗୋଟିଏ ନୋଟିସ ଜାରି କରି ଚୁପ ବସିଛି ପ୍ରଶାସନ ।
ଏଠାରେ ପ୍ରଶ୍ନ ଉଠୁଛି ଯେ ଯଦି ଖରାଦିନେ ଦିନ ଗୋଟିଏ ପର୍ଯ୍ୟନ୍ତ ପୂର୍ତ୍ତବିଭାଗ ଅଧିନରେ କାମ ହେଉଛି, ଅନ୍ୟ ସ୍ଥାନରେ କ’ଣ ହେଉଥିବ । ଦିନ 11ଟାରୁ 3ଟା ପର୍ଯ୍ୟନ୍ତ କାମ ବନ୍ଦ ନେଇ ଯେଉଁ ନିର୍ଦ୍ଦେଶ ରହିଛି, ତାହା କେତେ କାର୍ଯ୍ୟକାରୀ ହେଉଛି । ଯଦି ଶ୍ରମିକଙ୍କ କିଛିହୁଏ, ସେଥିପାଇଁ ଦାୟୀ କିଏ ?
କଳାହାଣ୍ଡିରୁ ଅଜିତ ସିଂହ, ଇଟିଭି ଭାରତ
