କଳାହାଣ୍ଡି: ଶେଷ ହୋଇଛି ଶାରଦୀୟ ଦୂର୍ଗାପୂଜା । ପାରମ୍ପାରିକ ନାଚ, ଗୀତ ସହ ରଙ୍ଗାରଙ୍ଗ ଆଲୋକମାଳାରେ ମାଙ୍କୁ କାରୁଠ କ୍ଷେତ୍ର ବା କଳାହାଣ୍ଡିରେ ବିଦାୟ ଦିଆଯାଇଛି । ଗୁରୁବାର ଅନ୍ତିମ ପର୍ଯ୍ୟାୟରେ ମାଙ୍କୁ ମେଲାଣି ଦିଆଯାଇଛି । ସହରର ବିଭିନ୍ନ ପୂଜା ମଣ୍ଡପରୁ ବିଭିନ୍ନ ପଟୁଆରରେ ବାହାରି ମା'ଙ୍କ ବିସର୍ଜନ କରାଯାଇଛି ।
ଗତ ନଅଦିନ ଧରି ବିଭିନ୍ନ ପୂଜା ମଣ୍ଡପରେ ପୂଜା ପାଉଥିବା ମାଆ ଜଗତ ଜନନୀଙ୍କୁ ଶେଷରେ କଳାହାଣ୍ଡିବାସୀ ବହୁ ଆଡମ୍ବରପୂର୍ଣ୍ଣ ଆୟୋଜନରେ ମାଙ୍କୁ ବିଦାୟ ଦେଇଛନ୍ତି । ପାଖାପାଖି ୧୦ ରୁ ଊର୍ଦ୍ଧ୍ବ ମେଢ଼ ବିସର୍ଜନ କରାଯାଇଛି । ପାରମ୍ପରିକ ବାଦ୍ୟ, ଘଣ୍ଟଘଣ୍ଟା, ଶଙ୍ଖନାଦରେ ଉଠୁଛି ପଡୁଛି କାରୁଠ କ୍ଷେତ୍ର କଳାହାଣ୍ଡି ।
ଐତିହ୍ୟର ସହର ଭବାନୀପାଟଣାବାସୀ ମାଙ୍କୁ ଭାବବିହ୍ବଳ ସହ ବିଦାୟ ଦେଇଛନ୍ତି । ଜାତି, ଧର୍ମ ଓ ବର୍ଣ୍ଣ ନିର୍ବିଶେଷରେ ସମସ୍ତ ସମ୍ପ୍ରଦାୟର ଲୋକେ ଏହି ଭଷାଣ ଉତ୍ସବରେ ସାମିଲ ହୋଇଥିଲେ । ପୁଣି ଆରବର୍ଷକୁ ମାଙ୍କ ଆଗମନକୁ ଅପେକ୍ଷା କରି ମାଙ୍କ ମୃଣ୍ମୟୀ ମୂର୍ତ୍ତିକୁ ବିସର୍ଜନ କରିଛନ୍ତି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
