ଭବାନୀପାଟଣା: ଜୁନାଗଡ଼ରେ ସିପିଆଇ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି । ଚାଷୀଙ୍କୁ ଜଳ ସେଚନ ସୁବିଧା ଯୋଗାଇ ଦେବା ଦାବିରେ ବ୍ଲକ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ । ଇନ୍ଦ୍ରାବତୀ ରାଇଟ କେନାଲ ମରାମତି କାର୍ଯ୍ୟ ଯଥାଶୀଘ୍ର ସାରିବାକୁ ଦାବି ।
କଳାହାଣ୍ଡି ଜିଲ୍ଲାରେ ବର୍ଷାର ଅଭାବ ଯୋଗୁଁ ଚାଷ କାର୍ଯ୍ୟ ଆରମ୍ଭ ହୋଇପାରି ନାହିଁ । ଖରିଫ ଚାଷକୁ ନେଇ ଜିଲ୍ଲାର ଚାଷୀ ଚିନ୍ତାରେ ରହିଥିବା ବେଳେ ଇନ୍ଦ୍ରାବତୀ ରାଇଟ କେନାଲ ମରାମତି ପାଇଁ ଜଳ ସେଚନ ବନ୍ଦ ରହିଛି । ତେବେ ସମୟସୀମା ମଧ୍ୟରେ ମରାମତି କାର୍ଯ୍ୟ ସରିବାର ସମ୍ଭାବନା ନଥିବା ବେଳେ ଏହାକୁ ପ୍ରତିବାଦ କରିଛି ସିପିଆଇ । ସହରର ଲଙ୍କେଶ୍ବରୀ ମନ୍ଦିରରୁ ଶତାଧିକ ଚାଷୀ ଓ ଦଳୀୟ କର୍ମୀ ଏକ ବିଶାଳ ବିକ୍ଷୋଭ ଶୋଭାଯାତ୍ରାରେ ବାହାରି ସହର ପରିକ୍ରମା ପରେ ବ୍ଲକ କାର୍ଯ୍ୟାଳୟରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଛନ୍ତି । ଇନ୍ଦ୍ରାବତୀ ରାଇଟ କେନାଲରୁ ଚାଷୀଙ୍କୁ ଜଳ ଯୋଗାଣ, ଆଦିବାସୀଙ୍କୁ ଜଙ୍ଗଲ ପଟ୍ଟା ପ୍ରଦାନ ଓ ଦୁଣ୍ଡା ଗାଁକୁ ରାସ୍ତା ନିର୍ମାଣ ଆଦିକୁ ନେଇ ବିଡିଓଙ୍କୁ ଦାବିପତ୍ର ପ୍ରଦାନ କରାଯାଇଛି ।
ଇଟିଭି ଭାରତ, କଳାହାଣ୍ଡି
