କଳାହାଣ୍ଡି: ଆସିଛି ପାର୍ବଣର ଋତୁ । ରାସ୍ତାଘାଟ, ହାଟବଜାର ସବୁଠି ଗହଳି । ଦେବୀପୀଠ ହେଉ ଅବା ପୂଜାମଣ୍ଡପ ସବୁଠି ଚାଲିଛି ଦେବୀଙ୍କ ଆବାହାନ । ସେପଟେ ଆସନ୍ତା କାଲି କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମା ମାଣିକେଶ୍ବରୀଙ୍କ ଛତରଯାତ୍ରା । ସମସ୍ତ ପ୍ରସ୍ତୁତି ବି ଶେଷ ପର୍ଯ୍ୟାୟରେ । ଏବେ ଧରାପୃଷ୍ଠରେ ବେଜେ କରୁଛନ୍ତି ମା ଦୁର୍ଗା ।
ଏଣୁ ଚାରିଆଡେ ପାର୍ବଣର ମାହୋଲ । ସେପଟେ ଆସନ୍ତା କାଲି ମା ମାଣିକେଶ୍ବରୀଙ୍କ ଛତର ଯାତ୍ରା କୁ ନେଇ ଘଣ୍ଟୁଆ,ନିସାନ,ଢାପ ଓ ମାଙ୍କ ପ୍ରିୟ ବାଦ୍ୟ ଘୁମୁରା ପାଇଁ ଅଭ୍ୟାସର ପର୍ବ ମଧ୍ୟ ପହଞ୍ଚି ସାରିଛି ଶେଷ ପର୍ଯାୟରେ ।
ତନ୍ତ୍ରମନ୍ତ୍ରରେ ଆବାହନ କରାଯାଉଛି ଜଗତ ଜନନୀ ମାଁ ଦୁର୍ଗାଙ୍କୁ । ଆଉ ପାର୍ବଣ ପାଇଁ ଚଳଚଞ୍ଚଳ ହୋଇପଡିଛି ଏବେ ସାରା କଳାହାଣ୍ଡି ଜିଲ୍ଲା ଅନ୍ୟପଟେ ମଧ୍ୟ ଆସନ୍ତାକାଲି ଛତରଯାତ୍ରାରେ ବାଦ ବିବାଦରେ ଥିବା ବଳି ପ୍ରଥା ବେଶ ଫରକ ପକାଇପାରିନି ଭକ୍ତଙ୍କୁ । ଚାରିଆଡୁ ଆରମ୍ଭ ହୋଇଗଲାଣି ଭକ୍ତଙ୍କ ସମାଗମ ।ମାଙ୍କର ପୂଜାପାର୍ବଣ ବର୍ଷ ସାରା ଚାଲିଥିଲେ ବି ଏହି ଛତରଯାତ୍ରା ଦିନ ହିଁ ତାଙ୍କ ବିଜୟ ପ୍ରତିମା ଛତର ର ଦର୍ଶନ ମିଳିଥାଏ ।ଯାହା ବର୍ଷ ରେ କେବଳ ଥରେ ଅନୁଷ୍ଠିତ ହୋଇଥାଏ ।
ଛତରଯାତ୍ରାରେ ମାନସିକ ରଖିଥିବା ଭକ୍ତ ବୋଦା,ଛେଳି,କୁକୁଡା ଆଦି ହଜାର ହଜାର ମାତ୍ରାରେ ବଳି ଦେଇଥାନ୍ତି । ଅନ୍ୟପଟେ ଭକ୍ତ ଶାନ୍ତିର ପ୍ରତୀକ କପୋତକୁ ମଧ୍ୟ ଯାତ୍ରା ସମୟରେ ଉଡେଇଥାନ୍ତି । ବଳି ଯୋଗୁଁ ରକ୍ତ ରଞ୍ଜିତ ହୋଇଉଠେ ଜେନାଖାଲ ଠାରୁ ମନ୍ଦିର ଯାଏଁ ପ୍ରାୟ ୩ କିଲୋମିଟର ରାସ୍ତା । ଆଉ ଲକ୍ଷ୍ୟ ଲକ୍ଷ୍ୟ ଶ୍ରଦ୍ଧାଳୁ ମାଆଙ୍କର ଆଶିର୍ବାଦ ଭିକ୍ଷା କରିଥାନ୍ତି । ପ୍ରଶାସନ ପକ୍ଷରୁ ବଳିପ୍ରଥାକୁ ରୋକିବା ପାଇଁ ଆରମ୍ଭ ହୋଇଛି ପ୍ରୟାସ । ସେପଟେ ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ ମଧ୍ୟ କଡାକଡି କରାଯାଇଛି ।
କଳାହାଣ୍ଡିରୁ ଅଜିତ ସିଂ,ଇଟିଭି ଭାରତ
