ଭବାନୀପାଟଣା: ଦୀର୍ଘ ୧୫ ଘଣ୍ଟା ଧରି ବନ ବିଭାଗ ଓ ପୋଲିସକୁ ନାକେଦମ କରିଥିବା ଜଙ୍ଗଲୀ ଭାଲୁ ଶେଷରେ ଜଙ୍ଗଲକୁ ଫେରି ଯାଇଥିବା ସୂଚନା ମିଳିଛି । ଶୁକ୍ରବାର ଦିନ ତମାମ ଭବାନୀପାଟଣା ସହରରେ ଆତଙ୍କ ରାଜ ଖେଳାଇ ଥିଲା ଏଇ ଭାଲୁଟି । ଜଙ୍ଗଲ ବିଭାଗ ରାତି ସାରା ଭାଲୁକୁ ଜଗି ରହିଥିବା ବେଳେ ଭୋର ପ୍ରାୟ ୩ଟା ବେଳକୁ ସହରର ଜଳେଶ୍ବର ମନ୍ଦିର ନିକଟ ଜଙ୍ଗଲ କୁସା ଡୁଙ୍ଗୁରି ଦେଇ ଭାଲୁଟି ଜଙ୍ଗଲକୁ ପଳାଇ ଯାଇଥିବା ସୂଚନା ମିଳିଛି ।
ଶୁକ୍ରବାର ଭାଲୁ କାମୁଡାରେ ଦୁଇ ଜଣ ଲୋକ ଆହତ ହୋଇଥିବା ବେଳେ ଜଣକୁ ଭବାନୀପାଟଣା ମେଡିକାଲ ଏବଂ ଅନ୍ୟ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ଭୁବନେଶ୍ବରର ଏକ ଘରୋଇ ମେଡିକାଲକୁ ସ୍ଥାନାନ୍ତର କରାଯାଇଛି । ତେବେ ସହର ମଧ୍ୟରେ ଦୁଇ ଦୁଇ ଥର ଜଙ୍ଗଲୀ ଭାଲୁ ପ୍ରବେଶ କରି ସାରିଥିବା ବେଳେ ଏଥର ଭାଲୁକୁ ଆୟତ୍ତ କରିବାରେ ଫେଲ ମାରିଥିଲା କଳାହାଣ୍ଡି ବନ ବିଭାଗ । ଏପରିକି ଟ୍ରାଙ୍କୁଲାଇଜ କରିବାରେ ମଧ୍ୟ ବିଫଳ ହେବା ପରେ ଭାଲୁଟି ବେଶ ଉପଦ୍ରବ କରିଥିବା ସହରବାସୀ ଅଭିଯୋଗ କରିଛନ୍ତି ।
ପ୍ରଶାସନ ପ୍ରଚାର କରି ଲୋକଙ୍କୁ ସୁରକ୍ଷିତ ସ୍ଥାନରେ ରହିବା ପାଇଁ ଘୋଷଣା କରିବା ପରେ ଲୋକେ ଭୟରେ ତାଟି କବାଟ ବନ୍ଦ କରି ରହିଥିଲେ । ଶନିବାର ସକାଳୁ ଭାଲୁ ଜଙ୍ଗଲକୁ ଫେରିଥିବା ଖବର ପ୍ରଚାର ପରେ ଲୋକେ ଏକ ପ୍ରକାର ଆଶ୍ବସ୍ତି ଅନୁଭବ କରିଛନ୍ତି । କିନ୍ତୁ ଏଭଳି ଘଟଣାର ଆଉ ପୁନରାବୃତ୍ତି ହେବନି ତ ? ଏଥର ସଜାଗ ରହିବ କି ବନ ବିଭାଗ ? ଏହିପରି ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
