ଝାରସୁଗୁଡା: ଘଟିବାକୁ ଯାଉଛି ବହୁ ଦିନର ପ୍ରତୀକ୍ଷାର ଅନ୍ତ । ଉଡାନ-3 ଯୋଜନାରେ ଆସନ୍ତା ଜାନୁୟାରୀ 31 ତାରିଖରୁ ଝାରସୁଗୁଡାରୁ ଭୁବନେଶ୍ବର ଦେଇ ବାରାଣାସୀ ଓ କୋଲକାତାକୁ ଆରମ୍ଭ ହେବ ସିଧାସଳଖ ବିମାନ ସେବା । ଆଲାଏନ୍ସ ଏୟାର ପକ୍ଷରୁ ଏହି ସେବା ମିଳିବାର ସୂଚନା ରହିଛି । ଝାରସୁଗୁଡା ବୀର ସୁରେନ୍ଦ୍ରସାଏ ଏୟାରପୋର୍ଟରୁ ସ୍ପାଇସଜେଟର ସେବା ସଫଳ ହେବା ପରେ ଉଡାନ-3 ଯୋଜନାରେ ଗତବର୍ଷ ଜୁନ 6ରୁ ଆଲାଏନ୍ସ ଏୟାର ପକ୍ଷରୁ ଆରମ୍ଭ ହୋଇଥିଲା ଝାରସୁଗୁଡାରୁ ଭୁବନେଶ୍ବର ଓ ରାୟପୁରକୁ ବିମାନ ସେବା ।
ଏହା ପୂର୍ବରୁ ନୂଆଦିଲ୍ଲୀ, କୋଲକତା ଓ ହାଇଦ୍ରାବାଦକୁ ଏଠାରୁ ବିମାନ ଚଳାଚଳ ଆରମ୍ଭ ହୋଇଥିଲା । ଆଉ ଏବେ ଉଡାନ ଯୋଜନାରେ ଆଉ ଦୁଇଟି ଗୁରୁତ୍ବପୂର୍ଣ୍ଣ ସହର ବାରାଣାସୀ ଓ କୋଲକାତା ସହ ଯୋଡି ହେବାକୁ ଯାଉଛି ଝାରସୁଗୁଡା । ରାଜ୍ୟର ଦ୍ବିତୀୟ ବିମାନ ବନ୍ଦର ଭାବେ ଝାରସୁଗୁଡା ବିମାନ ବନ୍ଦରରୁ ଏହି ସେବା କାର୍ଯ୍ୟକ୍ଷମ ହେବା ପରେ ସ୍ଥାନୀୟ ଲୋକ ବେଶ ଲାଭବାନ ହେବେ ବୋଲି ଆଶା ରହିଛି ।
ତେବେ ଝାରସୁଗୁଡାରୁ ନିୟମିତ ବିମାନ ସେବା ମିଳିବା ପରେ ଏବେ ଝାରସୁଗୁଡା ବିମାନ ବନ୍ଦର ଉପରେ ସମଗ୍ର ପଶ୍ଚିମ ଓଡିଶା ନିର୍ଭରଶୀଳ । ପଡୋଶୀ ଛତିଶଗଡ଼ ଓ ଝାଡଖଣ୍ଡର ଯାତ୍ରୀମାନେ ମଧ୍ୟ ଏହାଦ୍ବାରା ସୁଫଳ ପାଇପାରୁଛନ୍ତି । ଆସନ୍ତା 27 ଜାନୁଆରୀରୁ ଝାରସୁଗୁଡା-କୋଲକାତା ସିଧାସଳଖ ବିମାନ ସେବା ଆଲାଏନ୍ସ ଏୟାର ଆରମ୍ଭ କରୁଥିବା ବେଳେ 31 ଜାନୁଆରୀରୁ ଭୁବନେଶ୍ବର ଦେଇ ଝାରସୁଗୁଡା-ବାରାଣାସୀ ବିମାନ ସେବା ଆରମ୍ଭ ହେଉଥିବା ସୂଚନା ଦେଇଛନ୍ତି ଝାରସୁଗୁଡା ବିମାନ ବନ୍ଦର ନିର୍ଦ୍ଦେଶକ ସୁଦେଶ କୁମାର ଚୌହାନ ।
ଏଥି ସହିତ ପୂର୍ବ ସମୟ ସାରଣୀରେ ମଧ୍ୟ ପରିବର୍ତ୍ତନ ହୋଇଥିବା ସେ ସୂଚନା ଦେଇଛନ୍ତି । ନୂଆ ସାରଣୀ ଅନୁଯାୟୀ କୋଲକାତାରୁ ସକାଳ 5ଟା 50ମିନିଟରେ ବାହାରି ଝାରସୁଗୁଡାକୁ 7ଟା 20 ମିନିଟରେ ବିମାନ ପହଞ୍ଚିବ । ସେହିପରି ଝାରସୁଗୁଡାରୁ 7ଟା 45 ମିନିଟରେ ବାହାରି ରାୟପୁରକୁ ସକାଳ 8ଟା 50 ମିନିଟରେ ବିମାନ ପହଞ୍ଚିବ । ରାୟପୁରରୁ ସକାଳ 9ଟା 15 ମିନିଟରେ ବାହାରି ସକାଳ 10ଟା 20 ମିନିଟରେ ପହଞ୍ଚିବ ।
ଅନ୍ୟପଟେ ଝାରସୁଗୁଡାରୁ 10ଟା 45 ମିନିଟରେ ବାହାରି 11ଟା 50 ମିନିଟରେ ପହଞ୍ଚିବ ବିମାନ । ବହୁ ପ୍ରତୀକ୍ଷିତ ସେକ୍ଟର, ଭୁବନେଶ୍ବରରୁ ଦିନ 12ଟା 15 ମିନିଟରେ ବାହାରି ବାରାଣାସୀରେ ଦିନ 2ଟା 05ମିନିଟରେ ପହଞ୍ଚିବ । ବାରାଣସୀରୁ ଦିନ 2ଟା 30 ମିନିଟରେ ବାହାରି 4ଟା 20 ମିନିଟରେ ଭୁବନେଶ୍ବରରେ ପହଞ୍ଚିବ । ଏହାପରେ ଭୁବନେଶ୍ବରରୁ 4ଟା 45 ମିନିଟରେ ବାହାରି 5ଟା 50 ମିନିଟରେ ଝାରସୁଗୁଡା ଓ ଝାରସୁଗୁଡାରୁ ସନ୍ଧ୍ୟା 6 ଟା 15 ମିନିଟ ରେ ବାହାରି କୋଲକାତାରେ 7 ଟା 45 ମିନିଟରେ ବିମାନ ପହଞ୍ଚିବ ।
ପଶ୍ଚିମ ଓଡ଼ିଶାର ଜନ ସାଧାରଣ ପୂର୍ବରୁ ବାରାଣାସୀକୁ ଯିବା ପାଇଁ ନୂଆଦିଲ୍ଲୀ ଉପରେ ନିର୍ଭର କରୁଥିବା ବେଳେ ଏବେ ଏହା ମାତ୍ର ତିନି ଘଣ୍ଟାର ଯାତ୍ରାରେ ପରିଣତ ହେବ । ଏନେଇ ବିମାନ ବନ୍ଦର ନିର୍ଦ୍ଦେଶକ ସୂଚନା ଦେଇଛନ୍ତି । ଏହା ଝାରସୁଗୁଡା ବିମାନ ବନ୍ଦରରେ ଯାତ୍ରୀଙ୍କ ସଂଖ୍ୟା ବୃଦ୍ଧି ସହ ଆଗକୁ ଦେଶର ପ୍ରମୁଖ ସହରକୁ ବିମାନ ସେବା ପାଇଁ ସୁଯୋଗ ସୃଷ୍ଟି କରିଛି।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
