ଝାରସୁଗୁଡା: ଲକଡାଉନରେ ପରିବା ବିକୁଥିବା ଜଣେ ବ୍ୟବସାୟୀଙ୍କୁ ରାସ୍ତା ଉପରେ ମାଡ ମାରିଲେ ତହସିଲଦାର । ତହସିଲଦାର ମାଡ ମାରୁଥିବା ଏକ ଭିଡିଓ ଭାଇରାଲ ହେବାରେ ଲାଗିଛି । ଏହି ମହିଳା ଅଧିକାରୀ ଜଣଙ୍କ ହେଉଛନ୍ତି ଝାରସୁଗୁଡ଼ା ଜିଲ୍ଲାରେ କାର୍ଯ୍ୟରତ ଅତିରିକ୍ତ ତହସିଲଦାର ଯୋଗୀତା ତିର୍କୀ । ମହିଳା ଅଧିକାରୀ ଜଣକ କୋଭିଡ ସମୟରେ ମାଜିଷ୍ଟ୍ରେଟ ଦାୟିତ୍ବରେ ଥିବା ଜଣାପଡିଛି ।
ସମ୍ପୂର୍ଣ୍ଣ ଘଟଣାକ୍ରମ ଅନୁସାରେ କୋଭିଡ ଲକଡାଉନ ସମୟରେ ଜିଲ୍ଲାରେ 11ଟା ପରେ ଦୋକାନ ବଜାର ବନ୍ଦ ହେବା ପରେ ରାସ୍ତା ଉପରେ ଜଣେ ପରିବା ବିକାଳୀ ବସିଥିବା ଦେଖିବାକୁ ପାଇଥିଲେ ତହସିଲଦାର । ତେବେ ଏହା ଦେଖି ସେ ଉତ୍ୟକ୍ତ ହୋଇ ପଡିବା ସହ ଗାଡିରୁ ଓହ୍ଲାଇ ଗାଡ଼ିରେ ରଖିଥିବା ବାଡି ନିଜ ହାତରେ ଧରି ରାସ୍ତା ପାର କରି ଗାଉଁଲି ପରିବା ବିକାଳୀ ନିକଟରେ ପହଞ୍ଚି ସିଧା ମାଡ ଆରମ୍ଭ କରିଥିଲେ ।
ତେବେ ରାସ୍ତା ଉପରେ ଜଣେ ପରିବା ବିକାଳୀଙ୍କୁ ମାଡ ମାରିବା ପାଇଁ ଜଣେ ପ୍ରଶାସନିକ ଅଧିକାରୀଙ୍କୁ କିଏ ଅଧିକାର ଦେଲେ ବୋଲି ସାଧାରଣରେ ପ୍ରତିକ୍ରିୟା ପ୍ରକାଶ ପାଇଛି । ତେବେ ଉକ୍ତ ଘଟଣା ପରେ ସମ୍ପୃକ୍ତ ତହସିଲଦାରଙ୍କ ସହ ଯୋଗାଯୋଗ କରାଯାଇଥିଲେ ସୁଦ୍ଧା କୌଣସି ପ୍ରତିକ୍ରିୟା ମିଳିପାରିନାହିଁ ।
ଛତିଶଗଡ଼ର ଜଣେ ଜିଲାପାଳ ଅମାନିଆ ଯୁବକଙ୍କୁ ମାଡ ମାରିବା ଭିଡ଼ିଓ ଭାଇରାଲ ହେବା ପରେ ଛତିଶଗଡ଼ ସରକାର ଜିଲ୍ଲାପାଳଙ୍କ ବିରୋଧରେ କାର୍ଯ୍ୟାନୁଷ୍ଠାନ ସ୍ବରୁପ ତାଙ୍କୁ କାର୍ଯ୍ୟରୁ ନିଲମ୍ବନ କରିଥିଲେ । ଝାରସୁଗୁଡାରେ ଜଣେ ପ୍ରଶାସନିକ ଅଧିକାରୀଙ୍କ ଏପରି କାର୍ଯ୍ୟ ପରେ ଜିଲ୍ଲା ପ୍ରଶାସନ ତାଙ୍କ ବିରୋଧରେ କି କାର୍ଯ୍ୟାନୁଷ୍ଠାନ ଗ୍ରହଣ କରୁଛି ତାକୁ ଅପେକ୍ଷା ।
ଝାରସୁଗୁଡାରୁ ରବି ନାରାୟାଣ ସାହୁ, ଇଟିଭି ଭାରତ
