ଝାରସୁଗୁଡା: ଚଳନ୍ତା ଟ୍ରେନରୁ ଡେଇଁ ଦୁଇ ଜଣ ଯୁବତୀ ଗୁରୁତର । ସୋମବାର ଦିନ ପ୍ରାୟ 11ଟା 30 ସମୟରେ ଝାରସୁଗୁଡା ଜିଲ୍ଲା ବାଗଡିହି ଷ୍ଟେସନ ଦେଇ ଯାଉଥିବା ପୁରୀ-ନିଜାମୁଦ୍ଦିନ ଉତ୍କଳ ଏକ୍ସପ୍ରେସରୁ ଦୁଇ ଜଣ ଯୁବତୀ ପ୍ଲାଟଫର୍ମ ଆଡକୁ ଡେଇଁ ପଡିଥିଲେ । ସେମାନଙ୍କ ମଧ୍ୟରୁ ଜଣଙ୍କର ଗୋଡ କଟିବା ସମ୍ଭାବନା ଥିବା ବେଳେ ଅନ୍ୟ ଜଣଙ୍କର ମୁଣ୍ଡରେ ଗଭୀର ଆଘାତ ଲାଗି ସେ ଅଚେତ ହୋଇ ପଡିଥିଲେ ।
ତେବେ ଗୁରୁତର ଅବସ୍ଥାତରେ ଥିବା ଯୁବତୀ ଜଣଙ୍କ ଗେଲଝମ୍ପାର ଗାଁର ଧନମତୀ ମାଝୀ ହୋଇଥିବା ବେଳେ ଅନ୍ୟ ଜଣଙ୍କ ହେଉଛନ୍ତି ଜ୍ୟୋତ୍ସ୍ନା ନାଏକ । ଉଭୟ ଟ୍ରେନରେ ବାଗଡିହିସ୍ଥିତ ମହାକାଳ ମନ୍ଦିର ବୁଲିବାକୁ ଯାଉଥିଲେ । ହେଲେ ସେମାନେ କେଉଁ କାରଣରୁ ଚଳନ୍ତା ଟ୍ରେନରୁ ଡେଇଁଲେ ତାହା ଜଣା ପଡିନଥିବା ବେଳେ ଉତ୍କଳ ଏକ୍ସପ୍ରେସ ଟ୍ରେନ ବାଗଡିହି ପାର ହେବା ପରେ ଟ୍ରାକରେ ଯୁବତୀ ଦୁହେଁ ପଡିଥିବା ଲୋକେ ଦେଖିବାକୁ ପାଇଥିଲେ ।
ଏନେଇ ଖବର ପାଇ ସ୍ଥାନୀୟ ଅଞ୍ଚଳର ସାମାଜିକ କର୍ମୀ ଓ ରେଳ ବିଭାଗର କର୍ମଚାରୀ ସେମାନଙ୍କୁ ଉଦ୍ଧାର କରି ତୁରନ୍ତ ବାଗଡିହି ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ । ପରେ ସେମାନଙ୍କ ଅବସ୍ଥା ସଂକଟାପନ୍ନ ହେବାରୁ ଉଭୟଙ୍କୁ ଝାରସୁଗୁଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ତେବେ ଯୁବତୀ ଦୁହେଁ ସଜ୍ଞାହୀନ ଅବସ୍ଥାରେ ଥିବାରୁ ସେମାନଙ୍କୁ ବୁର୍ଲା ବଡ ଡକ୍ତରଖାନାକୁ ସ୍ଥାନାନ୍ତର କରାଯାଇଛି ।
ଯୁବତୀଙ୍କ ମୋବାଇଲରୁ ସେମାନଙ୍କ ପରିବାରଙ୍କ ସହ ସଂପର୍କ କରାଯାଇଥିବା ସହ ସେମାନଙ୍କୁ ଚିହ୍ନଟ କରିଛି ରେଳ ପ୍ରଶାସନ । ବର୍ତ୍ତମାନ ସୁଦ୍ଧା ଏହି ଘଟଣା କାହିଁକି ଘଟିଲା ତାହା ଜଣାପଡିନାହିଁ ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
