ସୁନ୍ଦରଗଡ: ଜିଲ୍ଲାର ରାଜଗାଙ୍ଗପୁର ଥାନା କାଂଶବାହାଲ ଫାଣ୍ଡି ଅନ୍ତର୍ଗତ କାଂଶବାହାଲ ଡ୍ୟାମରେ ଗତକାଲି(ରବିବାର) ସନ୍ଧ୍ୟାରେ ଘଟିଛି ଏହି ଲୋମ ଟାଙ୍କୁରା ଘଟଣା । ରାଉରକେଲା ଅଞ୍ଚଳର ୫ ଜଣ ସାଙ୍ଗ କାଂଶବାହାଲ ଡ୍ୟାମ ବୁଲିବା ପାଇଁ ଆସିଥିଲେ । ଡ୍ୟାମର ସୌନ୍ଦର୍ଯ୍ୟ ଉପଭୋଗ କରିବା ସହ ସେଲ୍ଫି ନେଉଥିଲେ ଯୁବକ ।
ସେଲ୍ଫି ନେବା ସମୟରେ ଅସାବଧାନତା ଯୋଗୁଁ ଗଭୀର ପାଣି ଭିତରକୁ ଖସି ପଡ଼ିଥିଲେ । ଖବରପାଇ ଅଗ୍ନିଶମ ବିଭାଗ ଓ ପୋଲିସ ଘଟଣା ସ୍ଥଳରେ ପହଞ୍ଚି ପାଣି ଭିତରୁ ଦୁଇ ଜଣକୁ ଉଦ୍ଧାର କରିଥିଲେ । ଜଣକୁ ଆମ୍ବୁଲାନ୍ସ ଯୋଗେ ଚିକିତ୍ସାପାଇଁ ରାଉରକେଲା ନେବାବେଳେ ରାସ୍ତାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା ।
ଉଭୟ ମୃତକ ହେଲେ ଉଦିତ ନଗରର ବାସିନ୍ଦା ପ୍ରମୋଦ ପରିଡା ଓ ଡିଏଭି ଗଳିର ବାସିନ୍ଦା ସୁମନ୍ତ ଦେ । ଏହି ସମୟରେ ଅନ୍ୟ 3 ବନ୍ଧୁଙ୍କ ସମ୍ମୁଖରେ ଏହି ଘଟଣା ଘଟିଥିଲେ ମଧ୍ୟ କେହି ସାହାସ ଜୁଟାଇ ପାଣି ମଧ୍ୟରେ ପଶି ପାରିନଥିଲେ ବୋଲି ଜଣାପଡିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିିଭି ଭାରତ
