ଅଢେଇ ବର୍ଷରେ ବିରାଟ ସଫଳତା: ଚଟାପଟ ପ୍ରଶ୍ନର ଉତ୍ତର ଦେଇ ହାତେଇଲେ ଇଣ୍ଡିଆ ବୁକ୍‌ ଅଫ ରେକର୍ଡ୍ସ

ମା'ର ଗର୍ଭ ଭିତରେ ଶିଶୁ ଶିକ୍ଷା ଗ୍ରହଣ କରିବା କଥା ଆପଣ ପୁରାଣରେ ଶୁଣିଥିବେ । ହେଲେ ଝାରସୁଗୁଡାର ଏହି କୁନି ଶିଶୁ ଅର୍ପିତଙ୍କ ନିକଟରେ ଏହାର ବାସ୍ତବ ଚିତ୍ର ଦେଖିବାକୁ ମିଳିଛି । ସେ ବିଭିନ୍ନ ପ୍ରକାର ରଙ୍ଗ ହେଉ କି ପନିପରିବାର ନାଁ । ପଚାରିବା ମାତ୍ରେ ଅନର୍ଗଳ କହୁଛି ଏହି କୁନି କୌଟିଲ୍ୟ । ଏହି ପ୍ରତିଭା ପାଇଁ ସେ ହାତେଇଛନ୍ତି ଇଣ୍ଡିଆ ବୁକ୍‌ ଅଫ୍‌ ରେକର୍ଡ୍ସ । ଦେଖନ୍ତୁ ଏହି ରିପୋର୍ଟ

ଝାରସୁଗୁଡ଼ା: କଥାରେ ଅଛି ତୁଳସୀ ଦୁଇ ପତ୍ରରୁ ବାସେ । କୌଣସି କାର୍ଯ୍ୟ ପ୍ରତି ଇଚ୍ଛା ଥିଲେ ଅସାଧ୍ୟ ବି ସାଧ୍ୟ ହୋଇପାରେ । ଏହି କଥାକୁ ସଠିକ ପ୍ରମାଣିତ କରିଛି ଝାରସୁଗୁଡ଼ାର ଅଢେଇ ବର୍ଷର ଶିଶୁ ଅର୍ପିତ ସାହୁ । ସେ ଖାଦ୍ୟ ଓ ମସଲା ଜାତୀୟ ଦ୍ରବ୍ୟର ନାମ, ଶରୀରର ଅଙ୍ଗ, ପଶୁପକ୍ଷୀ, ଫଳ, ଇଂରାଜୀ ଅକ୍ଷର, ବାର ଓ ମାସଗୁଡ଼ିକର ନାମ କହି ହାତେଇଛି ଇଣ୍ଡିଆ ବୁକ୍‌ ଅଫ୍‌ ରେକର୍ଡ୍ସ । କୁନି ଶିଶୁର ଏହି ସଫଳତା ପରେ ଜିଲ୍ଲାବାସୀ ବେଶ ଗର୍ବ ଅନୁଭବ କରିଥିବାବେଳେ ତା'ର ଉଚ୍ଚ ଭବିଷ୍ୟ କାମନା କରିଛନ୍ତି ।

ଏତେ କମ ବୟସରୁ ଏହି କୁନି ଶିଶୁଟି 16 ଟି ଯାନବାହନର ନାମ, 6ଟି ଖାଦ୍ୟ ତଥା ମସଲା ଜାତୀୟ ଦ୍ରବ୍ୟର ନାମ, 8 ଟି କସମେଟିକ୍ସର ନାମ, 5 ଟି ଆକାରର ନାମ, 25ଟି ଅଙ୍ଗ ଗୁଡ଼ିକର ନାମ, 15ଟି ପଶୁପକ୍ଷୀଙ୍କ ନାମ, 11ଟି ରଙ୍ଗର ନାମ, 20ଟି ଫଳର ନାମ, 11ଟି ପନିପରିବାର ନାମ, 5 ଟି ଇଂରାଜୀ କବିତା, ଇଂରାଜୀ ଅକ୍ଷର, ବାର ଗୁଡିକର ନାମ, ବାର ମାସର ନାମ ସହିତ 1ରୁ 20 ପର୍ଯ୍ୟନ୍ତ ଗଣନା ମଧ୍ୟ କରିପାରୁଛି ।