ଯାଜପୁର: ଗୁଳିକାଣ୍ଡ ଘଟି ଯୁବକ ଗୁରୁତର । ଏଭଳି ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ଅନ୍ତର୍ଗତ ଓଳାଶୁଣୀ ପାହାଡ଼ ନିକଟରେ । ସୂଚନାନୁସାରେ ବନ୍ଦେଶ୍ବର ଗ୍ରାମର ସିଦ୍ଧାନ୍ତ ସାମଲ ନାମକ ଜଣେ ଯୁବକ ଓଳାଶୁଣୀ ପାହାଡ଼ ନିକଟରେ ସାଙ୍ଗ ମାନଙ୍କ ସହ କଥାବାର୍ତ୍ତା ହେଉ ଥିବା ସମୟରେ ଏକ ବାଇକ ଯୋଗେ ଦୁର୍ବୃତ୍ତମାନେ ଗୁଳିମାଡ କରି ଫେରାର ହୋଇଯାଇଥିବା ନେଇ ଅଭିଯୋଗ ହୋଇଛି ।
ତେବେ ଘଟଣାସ୍ଥଳରୁ ଯୁବକଙ୍କୁ ଉଦ୍ଧାର କରି ବଡ଼ଚଣା ଡାକ୍ତରଖାନାରେ ଭର୍ତ୍ତି କରାଯାଇଛି । ଆଉ ଏହି ଅତର୍କିତ ଗୁଳିକାଣ୍ଡ ଯୋଗୁଁ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି ।
ସେପଟେ ଖବର ପାଇ ଘଟଣା ସ୍ଥଳରେ ବାଲିଚନ୍ଦ୍ରପୁର ପୋଲିସ ପହଞ୍ଚି ଘଟଣାର ଅଧିକ ତଦନ୍ତ ଚଳାଇଛି । ତେବେ କେଉଁ କାରଣ ପାଇଁ ଏଭଳି ଗୁଳି କାଣ୍ଡ ଘଟିଲା ତାହା ଏ ଯାଏଁ ସ୍ପଷ୍ଟ ଜଣାପଡିନାହିଁ l ଏଭଳି ଘଟଣାକୁ ନେଇ ବାଲିଚନ୍ଦ୍ରପୁର ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
