ଯାଜପୁର: ଦିନକୁ ଦିନ ବଢୁଥିବା ବାଲ୍ୟ ବିବାହ ରୋକିବାକୁ ଆରମ୍ଭ ହୋଇଛି ପ୍ରୟାସ । ଜିଲ୍ଲା ଶିଶୁ ସୁରକ୍ଷା ୟୁନିଟ ପକ୍ଷରୁ ବାଲ୍ୟ ବିବାହ ନିଷେଧ ଆଇନ ୨୦୦୬ ଅନୁସାରେ ଦୁଇ ଦିନିଆ କର୍ମଶାଳା ଅନୁଷ୍ଠିତ ହୋଇଛି । ଜଳଛାୟା ପ୍ରକଳ୍ପ ସମ୍ମିଳନୀ ଗୃହରେ ଏହି କର୍ମଶାଳା ଆୟୋଜିତ ହୋଇଯାଇଛି।
ଏଥିରେ ମୁଖ୍ୟ ଅତିଥି ଭାବେ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ସନ୍ତୋଷ କୁମାର ସେଠୀ ଯୋଗଦେଇ ବାଲ୍ୟ ବିବାହ ଦ୍ୱାରା ସାମାଜିକ ଅବକ୍ଷୟ ହେଉଥିବା କହିଥିଲେ । ଯଥାଶୀଘ୍ର ଏହାର ବିଲୋପ ହେବା ଆବଶ୍ୟକ ବୋଲି ମତ ଦେଇଥିଲେ । ଏହି ଅବସରରେ ଜିଲ୍ଲା ସମାଜ କଲ୍ୟାଣ ଅଧିକାରୀ ମଞ୍ଜୁଳା ରଥ, ଶିଶୁ ମଙ୍ଗଳ କମିଟିର ଅଧ୍ୟକ୍ଷା ବାଲ୍ୟ ବିବାହର ପରିଣାମ, ସାମାଜିକ ସ୍ଥିତି ଓ ବିଲୋପ ସମ୍ପର୍କରେ ଆଲୋକପାତ କରିଥିଲେ ।
ସ୍ବାସ୍ଥ୍ୟ ବିଶେଷଜ୍ଞ ଡା. ପାର୍ଥ ସାରଥୀ ମିଶ୍ର ବାଲ୍ୟ ବିବାହ ଦ୍ୱାରା ସଙ୍ଗଠିତ ବିବିଧ ସାମାଜିକ ଅବ୍ୟବସ୍ଥା ଆଦି ବିଷୟରେ ବିଶଦ ତଥ୍ୟ ଊପସ୍ଥାପନ କରିଥିଲେ । ଏଥିରେ ଜିଲ୍ଲାର ସମସ୍ତ ସି.ଡି.ପି.ଓ, ସୁପରଭାଇଜର ଓ ବିଭିନ୍ନ ଥାନାର ପୋଲିସ ଅଧିକାରୀ ମଧ୍ୟ ଯୋଗ ଦେଇଥିଲେ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
