ଯାଜପୁର: ସଦର ଥାନା ଅଧିନସ୍ଥ ମିର୍ଜାପୁର ଠାରେ ଓଲଟିଲା ଟ୍ରାକ୍ଟର । ଫଳରେ ଜଣେ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ 4ଜଣ ଆହତ ହୋଇଛନ୍ତି । ମୃତକ ହେଲେ ବରୀ ରାମଚନ୍ଦ୍ରପୁର ଥାନା ଅନ୍ତର୍ଗତ ଉଦୟପୁର ଗ୍ରାମର ମଙ୍ଗୁଳି ସାମଲ । ଟ୍ରାକ୍ଟରଟି ଗୁରୁଦାସପୁରରୁ କାଠ ନେଇ ବାଲିଆପାଳ ଯାଉଥିବା ବେଳେ ଘଟିଛି ଏହି ଅଘଟଣ ।
ସୂଚନା ଅନୁଯାୟୀ, ଟ୍ରାକ୍ଟରଟି ଯାଉଥିବା ବେଳେ ହଠାତ୍ ଟ୍ରାକ୍ଟରଟିର ଆଗ ଚକ ଫାଟି ଯାଇଥିଲା । ଫଳରେ ଭାରସାମ୍ୟ ହରାଇ ଟ୍ରାକ୍ଟରଟି ଓଲଟି ପଡିଥିଲା । ଫଳରେ ଟ୍ରାକ୍ଟରରେ ଥିବା 5 ଜଣଙ୍କ ମଧ୍ୟରୁ ଜଣେ ଚାପି ହୋଇ ଯିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା ।
ତେବେ ସ୍ଥାନୀୟଲୋକେ ସଙ୍ଗେ ସଙ୍ଗେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବିଭାଗ ପହଞ୍ଚି ଅନ୍ୟ 4 ଜଣଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ । ଅନ୍ୟପଟେ ଘଟଣାସ୍ଥଳରେ ପୋଲିସ ପହଞ୍ଚି ଶବ ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
