ଯାଜପୁର: କୋରୋନା ସାଙ୍ଗକୁ ଅମ୍ଫାନ ବାତ୍ୟା । ଏହି ବାତ୍ୟାରେ ବିଶେଷକରି ଉପକୂଳ ଓଡିଶାର 6ଟି ଜିଲ୍ଲା ବେଶୀ ପ୍ରଭାବିତ ହୋଇଥିଲା । ତେବେ ଅମ୍ଫାନ ସବୁଠୁ ବେଶୀ କ୍ଷତି ପହଞ୍ଚାଇଥିଲା ପଡୋଶୀ ରାଜ୍ୟ ପଶ୍ଚିମବଙ୍ଗରେ । କୋଲକାତା ସମେତ ପଶ୍ଚିମବଙ୍ଗର ଗ୍ରାମାଞ୍ଚଳରେ ପ୍ରଭୁତ କ୍ଷତି ଘଟାଇଛି ଅମ୍ଫାନ । ଯାହାକୁ ଉପଲବ୍ଧି କରି ପଶ୍ଚିମବଙ୍ଗକୁ ଏବେ ସହଯୋଗର ହାତ ବଢାଇଛନ୍ତି ରାଜ୍ୟ ସରକାର । ପ୍ରଭାବିତ ଅଞ୍ଚଳର ଲୋକଙ୍କ ଦୁଃଖଦୁର୍ଦ୍ଦଶାକୁ ଦୂର କରିବାକୁ ଦେଇଛନ୍ତି ପ୍ରତିଶୃତି।
ବିଶେଷକରି ବସ୍ତି ତଥା ଗ୍ରାମାଞ୍ଚଳର ଲୋକଙ୍କ ପାଇଁ ରାଜ୍ୟ ସରକାର ପଶ୍ଚିମବଙ୍ଗକୁ ପଠାଇଛନ୍ତି 50 ହଜାର ପାଲ । ସେଥିପାଇଁ ଯାଜପୁରର ଧାନମଣ୍ଡଳ ସ୍ଥିତ ରାଜ୍ୟ ପଣ୍ୟାଗାର ନିଗମ ୱେୟାର ହାଉସରୁ ବଡ ବଡ ଟ୍ରକ ଯୋଗେ ପଠାଯାଉଛି ପାଲ । ଯାଜପୁର ଜିଲ୍ଲାପାଳଙ୍କ ଠାରୁ ଆରମ୍ଭ କରି ରାଜ୍ୟ ରିଲିଫ କମିଶନରଙ୍କ ଯୁଗ୍ମସଚିବଙ୍କ ଯାଏ ଧାନମଣ୍ଡଳରେ ଉପସ୍ଥିତ ରହି ଏହାର ତଦାରଖ କରିଥିଲେ ।
ଧାନମଣ୍ଡଳ ୱେୟାର ହାଉସରେ ରାତିସାରା ଚାଲିଥିଲା ପାଲ ବୁହା । ବୋହିଚାଲିଥିଲେ ବୋଝେଇ ଓ ଖଲାସି ଶ୍ରମିକ । ଉପସ୍ଥିତ ରହିଥିଲେ ଜିଲ୍ଲାପାଳ ଓ ଯୁଗ୍ମସଚିବଙ୍କ ସମେତ ଅନ୍ୟାନ୍ୟ ଅଧିକାରୀ ଓ କର୍ମଚାରୀ । 50ହଜାର ପାଲ ପରିବହନ ପାଇଁ ସମୁଦାୟ 32ଟି 14 ଚକିଆ ଟ୍ରକକୁ ନିୟୋଜିତ କରାଯାଇଛି । ତନ୍ମଧ୍ୟରୁ ବୁଧବାର ରାତିରେ 16ଟି ଟ୍ରକରେ 25ହଜାର ପାଖାପାଖି ପାଲ ବୁହାସରିଥିବା ବେଳେ ଗୁରୁବାର ଅବଶିଷ୍ଟ 25 ହଜାର ପାଲ ଆଉ 16ଟି ଟ୍ରକରେ ବୁହାଯିବାର ଯୋଜନା ରହିଛି ।
ଯାଜପୁରରୁ ଜ୍ଞାନ ରଂଜନ ଓଝା, ଇଟିଭି ଭାରତ
