ଯାଜପୁର: ଧର୍ମଶାଳା ବ୍ଲକ ହରିଚନ୍ଦନପୁର ଗାଁ ନାବାଳିକା ନିର୍ଯ୍ୟାତନା ଘଟଣାରେ ଧର୍ମଶାଳା ପୋଲିସ ଜଣେ କନେଷ୍ଟବଳଙ୍କ ସମେତ ଆଉ ତିନିଜଣକୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ଧର୍ମଶାଳା ଥାନାର କନେଷ୍ଟବଳ ସନ୍ତୋଷ ବାରିକ, ସୁକିନ୍ଦାର ପୁଷ୍ପାଜ୍ଞଳି ବେହୁରା, ନେଉଳପୁର ଗାଁର ମୋହନ ମହାନ୍ତି ଓ ଅନ୍ୟତମ ସହଯୋଗୀ ଅବଦୁଲ ରହମନ । ଏମାନଙ୍କୁ ଗିରଫ କରି ଆଜି ଯାଜପୁର କୋର୍ଟରେ ହାଜର କରାଇଛି ପୋଲିସ ।
ପୂର୍ବରୁ ଏହି ଘଟଣାରେ ମୁଖ୍ୟ ଅଭିଯୁକ୍ତ କୁହାଯାଉଥିବା ସତ୍ୟନାରାୟଣ ସାମଲ ଓ ତାର ଦୁଇ ଭଉଣୀ ବନିତା, କବିତା, ଅନ୍ୟଜଣେ ଭାଇକୁ ପୁଲିସ ଗିରଫ କରି କୋର୍ଟ ଚାଲାଣ କରିବା ସହ ଏକ ସ୍କର୍ପିଓ ଗାଡିକୁ ଜବତ କରିଛି । ଏହି ଘଟଣାରେ କଂଗ୍ରେସ ନେତା ପ୍ରଦୀପ ମାଝି, ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର ପ୍ରମୁଖ ପୀଡ଼ିତାର ଘରକୁ ଗସ୍ତକରି ଘଟଣା ସମ୍ପର୍କରେ ବୁଝିବା ପରେ ଏହାକୁ ନେଇ ରାଜନୀତି ଜୋର ଧରିଛି ।
ଘଟଣାକ୍ରମ ଅନୁଯାୟୀ ଧନେଶ୍ବର ମଳିକଙ୍କ ଝିଅକୁ ନେଉଳପୁର ଗାଁର ସତ୍ୟନାରାୟଣ ଓ ତାର ଭାଇ ଗତ ୧୪ ତାରିଖରେ ଅପହରଣ କରିବା ପରେ ବିଭିନ୍ନ ସ୍ଥାନରେ ରଖି ନିର୍ଯାତନା ଦେଇ ଗତ ୧୮ ତାରିଖରେ ବାରବାଟି ନିକଟରେ ଫୋପାଡି ଦେଇଥିଲେ । ଏନେଇ ଧନେଶ୍ବର ଗତ ୧୮ ତାରିଖରେ ଧର୍ମଶାଳା ଥାନାରେ ଲିଖିତ ଅଭିଯୋଗ କରିଥିଲେ । ତେବେ ଯୁବତୀଙ୍କ ବୟାନକୁ ଭିତ୍ତି କରି ପୁଲିସ ଏଯାବତ୍ ଏହି ଘଟଣାରେ ମୋଟ ୮ଜଣଙ୍କୁ ଗିରଫ କରିଛି । ଅନ୍ୟପଟରେ ଗିରଫ ସନ୍ତୋଷର ପତ୍ନୀ ଏହି ଘଟଣା ଜାଣିବା ପରେ ଅସୁସ୍ଥ ହୋଇପଡିଥିବା ଜଣାପଡିଛି ।
ଯାଜପୁରରୁ ରଞ୍ଜନ ଓଝା, ଇଟିଭି ଭାରତ
