ଯାଜପୁର: ପୋଲିସ ଘରେ କଳା କନା ବୁଲାଇଲେ ଚୋର । ଲକ୍ଷାଧିକ ଟଙ୍କାର ସୁନା ଅଳଙ୍କାର ଲୁଟ କରି ଫେରାର । ଗୋଟିଏ ରାତିରେ ଦୁଇଟି ଘରୁ ଚୋରି । ଏପରିକି ପୋଲିସ କର୍ମଚାରୀଙ୍କ ଘରେ କଳା କନା ବୁଲାଇଲେ ଚୋର । ଲକ୍ଷାଧିକ ଟଙ୍କାର ସୁନା ଅଳଙ୍କାର ହୋଇଛି ଲୁଟ ।
ଏପରି ଚୋରି ହୋଇଛି ଯାଜପୁର ଧର୍ମଶାଳା ଥାନା ଜାମୁବଣିଆରେ ରହୁଥିବା ଜଣେ ପୋଲିସ କର୍ମଚାରୀ ଓ ଅବସରପ୍ରାପ୍ତ ଶିକ୍ଷକଙ୍କ ଘରୁ । ଚୋରମାନେ ଝରକା ଗ୍ରୀଲ ତାଡି ଆଲମିରାରୁ ଲକ୍ଷାଧିକ ଟଙ୍କାର ସୁନା ଅଳଙ୍କାର ଓ ନଗଦ ଅର୍ଥ ଲୁଟିନେଇଥିବା ଅଭିଯୋଗ ହୋଇଛି ।
ଅଭିଯୋଗ ପରେ ପୋଲିସ ସନ୍ଧାନୀ କୁକୁର ଓ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ହେଲେ ଚୋରଙ୍କ କୌଣସି ସୁରାକ ପାଇପାରିନାହିଁ । ସୂଚନା ମୁତାବକ, ଜାମୁବଣିଆରେ ଘର କରି ରହୁଥିବା କଟକ ବାଦାମବାଡି ଥାନାରେ କାର୍ଯ୍ୟରତ ପୋଲିସ ସବ-ଇନ୍ସପେକ୍ଟର ଜଗଦୀଶ ସାହୁ ଡ୍ୟୁଟିରେ ଯାଇଥିବା ସମୟରେ ଏହାର ସୁଯୋଗ ନେଇ ଚୋର ମାନେ ଝରକା ଗ୍ରୀଲ ତାଡି ଘରେ ପଶି ଆଲମିରାରେ ଥିବା ୪ ରୁ ୫ ଭରି ଓଜନର ସୁନା ଅଳଙ୍କାର ସହ ନଗଦ ୩୦ ହଜାର ଟଙ୍କା ଲୁଟିନେଇଛନ୍ତି ।
ସେହିପରି ପଡୋଶୀ ଘରେ ରହୁଥିବା ଅବସରପ୍ରାପ୍ତ ଶିକ୍ଷକ ଦ୍ବାରିକାନାଥ ଜେନା ଓ ତାଙ୍କ ପତ୍ନୀ କୌଣସି କାମରେ କଟକ ଯାଇଥିଲେ । ପୁଅ ଓ ବୋହୁ ଗୋଟିଏ ବଖରାରେ ରହିଥିବା ବେଳେ ଏହାର ସୁଯୋଗ ନେଇ ଚୋରମାନେ ସମାନ ଢଙ୍ଗରେ ପ୍ରବେଶ କରି ଅନ୍ୟ ୨ ଟି ବଖରାରେ ଥିବା ଆଲମିରା ଓ ଆଟାଚିରୁ ଲକ୍ଷାଧିକ ଟଙ୍କାର ସୁନା ଅଳଙ୍କାର ଓ ନଗଦ ଟଙ୍କା ଲୁଟି ନେବାରେ ସକ୍ଷମ ହୋଇଛନ୍ତି ।
ଭୋରରୁ ଉଠିବା ପରେ ଚୋରି ସଂପର୍କରେ ଉଭୟ ପରିବାର ଜାଣିବାକୁ ପାଇଥିଲେ । ଏନେଇ ଧର୍ମଶାଳା ଥାନାରେ ଅଭିଯୋଗ ହେବା ପରେ ପୋଲିସ ତଦନ୍ତ ଜାରି ରଖିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
