ଯାଜପୁର: କଳିଙ୍ଗନଗର ଗୁଳିକାଣ୍ଡ ଘଟଣାକୁ ବିତିବାକୁ ଯାଉଛି 14 ବର୍ଷ । ଟାଟା କାରଖାନା ପାଇଁ ଜମି ଅଧିଗ୍ରହଣ ଓ ପ୍ରାଚୀର ନିର୍ମାଣକୁ ବିରୋଧ କରି 2006 ମସିହା ଜାନୁଆରୀ 2 ତାରିଖରେ ପୋଲିସ-ଆଦିବାସୀ ସଂଘର୍ଷ ଘଟି 13 ଜଣ ଆଦିବାସୀଙ୍କ ମୃତ୍ୟୁ ହୋଇଥିଲା । ମୃତକ ପରିବାରଙ୍କ ମନରେ ଏବେବି ସେହି ସ୍ମୃତି ତାଜା ହୋଇରହିଛି । ତେବେ ସେହି ଅଭୁଲା ଦିନକୁ ପ୍ରତିବର୍ଷ ସହିଦ ସ୍ମୃତି ଦିବସ ଭାବେ ପାଳନ କରୁଛି ବିସ୍ଥାପନ ବିରୋଧୀ ଜନମଞ୍ଚ । ଜନମଞ୍ଚ ପକ୍ଷରୁ ଏଥିପାଇଁ ଚାଲିଛି ବ୍ୟାପକ ପ୍ରସ୍ତୁତି । ଆଇନଶୃଙ୍ଖଳା ପାଇଁ ପୋଲିସ ପକ୍ଷରୁ ମଧ୍ୟ ବ୍ୟାପକ ବନ୍ଦୋବସ୍ତ କରାଯାଇଛି ।
ବର୍ଷ ପରେ ବର୍ଷ ବିତୁଛି, ହେଲେ ଆଜି ବି ମୃତକଙ୍କ ପରିବାର ମନରେ ତାଜା ହୋଇ ରହିଛି ସେହି ଦିନର ଅଭୁଲା ସ୍ମୃତି । 2006 ମସିହା ଜାନୁଆରୀ 2 ତାରିଖ। ଗୋଟିଏ ଦିନରେ ପୋଲିସ ଗୁଳିରେ ପ୍ରାଣ ହାରିଥିଲେ 13 ଜଣ ଆଦିବାସୀ । କଳିଙ୍ଗନଗର ଟାଟା କମ୍ପାନୀର ଜମି ଅଧିଗ୍ରହଣ ଓ ପ୍ରାଚୀର ନିର୍ମାଣକୁ ବିରୋଧ କରିଥିବାବେଳେ ପୋଲିସ ଓ ଆଦିବାସୀଙ୍କ ମଧ୍ୟରେ ହୋଇଥିଲା ତୁମୁଳ ସଂଘର୍ଷ । ଯେଉଁଥିରେ ଯାଇଥିଲା 13 ଜଣ ଆଦିବାସୀଙ୍କ ପ୍ରାଣ । ସେବେଠୁ ମୃତକମାନଙ୍କୁ ଶହୀଦ ଭାବେ ଦର୍ଶାଇ ସେମାନଙ୍କ ସ୍ମୃତି ଉଦ୍ଦେଶ୍ୟରେ ପ୍ରତିବର୍ଷ ଜନମଞ୍ଚ ପାଳୁଛି ସ୍ମୃତି ସମାବେଶ । ଏଥିପାଇଁ ଜନମଞ୍ଚ ପକ୍ଷରୁ ଗଣଶବଦାହ ସ୍ଥଳୀ ବୀରଭୂମି ପଡିଆରେ ଚାଲିଛି ସମସ୍ତ ପ୍ରସ୍ତୁତି ।
ଗୁଳିକାଣ୍ଡ ଘଟଣାକୁ ଦେଶ ଠୁ ବିଦେଶ ଯାଏଁ ଉଠିଥିଲା ପ୍ରତିବାଦର ସ୍ବର । ଏହାର ନ୍ୟାୟିକ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ ସରକାର । ଇତିମଧ୍ୟରେ ସେହି ରିପୋର୍ଟ ମଧ୍ୟ ଦାଖଲ ସରିଛି । ହେଲେ ଏହି ରିପୋର୍ଟ ଆଦିବାସୀଙ୍କୁ ଖୁସି କରିପାରିନାହିଁ । ସେହିପରି ଗୁଳିକାଣ୍ଡ ପରେ ମୃତକଙ୍କ କଟାଯାଇଥିବା ହାତ ପାପୁଲିକୁ ଆଜି ପର୍ଯ୍ୟନ୍ତ ସେମାନଙ୍କ ପରିବାର ବର୍ଗକୁ ହସ୍ତାନ୍ତର କରାଯାଇନାହିଁ । ଯାହାର କ୍ଷୋଭ ଆଜି ବି ରହିଛି ସେହି ଆଦିବାସୀଙ୍କ ମନରେ । ଯଦିଓ ପରିସ୍ଥିତିର ଚାପରେ ଆଦିବାସୀଙ୍କ ଆନ୍ଦୋଳନ ଚାପି ହୋଇଯାଇଛି ତଥାପି ମନରେ ରହିଛି ଅନେକ ଦୁଃଖ । ସେପଟେ ଶହୀଦ ସମାବେଶ ପାଇଁ ସମ୍ଭାବ୍ୟ ଆଇନଶୃଙ୍ଖଳା ପରିସ୍ଥିତି ପାଇଁ ପୋଲିସ ପ୍ରଶାସନ ପକ୍ଷରୁ ମଧ୍ୟ ହୋଇଛି ବ୍ୟାପକ ବନ୍ଦୋବସ୍ତ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
