ଓଡ଼ିଶାର ସ୍ୱାର୍ଥ ପାଇଁ ସ୍ୱର ଉତ୍ତୋଳନ କରିବାକୁ ଡରୁଛି ବିଜେପି: ବିଜେଡି

ଓଡିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ପ୍ରଦାନ ପାଇଁ ଷୋଡଶ ଅର୍ଥ କମିଶନଙ୍କ ନିକଟରେ ଦାବି ରଖିଛି ବିଜେଡି ।

ଭୁବନେଶ୍ବର: 'ଲଗାତାର ଭାବେ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି ଓଡ଼ିଶା । ରାଜ୍ୟର ଜନସଂଖ୍ୟାର ୪୦ ପ୍ରତିଶତ ଅନୁସୂଚିତ ଜାତି ଓ ଅନୁସୂଚିତ ଜନଜାତି । ଓଡିଶାକୁ ସ୍ୱତନ୍ତ୍ର ରାଜ୍ୟର ମାନ୍ୟତା କିମ୍ବା ସ୍ୱତନ୍ତ୍ର ଫୋକସ ରାଜ୍ୟର ମାନ୍ୟତା ମିଳୁ ।' ଷୋଡଶ ଅର୍ଥ କମିଶନ ସମ୍ମୁଖରେ ଦୃଢ଼ ଦାବି ରଖିଛି ବିଜୁ ଜନତା ଦଳ- ବିଜେଡି । ବିଜେଡିର ଉଚ୍ଚସ୍ତରୀୟ ପ୍ରତିନିଧି ମଣ୍ଡଳୀ ଷୋଡଶ ଅର୍ଥ ଆୟୋଗକୁ ଭେଟି ଦାବିପତ୍ର ପ୍ରଦାନ କରିଛନ୍ତି ।

ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସରକାର ଓ ବିଜେପି ପକ୍ଷରୁ ଦିଆଯାଇଥିବା ଦାବିପତ୍ରରେ ଓଡିଶା ପାଇଁ ଫୋକସ ରାଜ୍ୟର ମାନ୍ୟତା କି କୌଣସି ସ୍ୱତନ୍ତ୍ର ପ୍ୟାକେଜ ପାଇଁ ଦାବି କରାଯାଇ ନାହିଁ ବୋଲି ବିଜେଡି ଅଭିଯୋଗ ଆଣିଛି । ଓଡ଼ିଶାର ସ୍ୱାର୍ଥ ରକ୍ଷା ପାଇଁ ସ୍ୱର ଉତ୍ତୋଳନ କରିବା ପାଇଁ ଏତେ ଡର କାହିଁକି ବୋଲି ବିଜେପିକୁ ପ୍ରଶ୍ନ କରିଛି ବିଜେଡି ।

କେନ୍ଦ୍ରୀୟ ଟିକସ ହସ୍ତାନ୍ତର ହାର ୫୦%କୁ ବୃଦ୍ଧି ଦାବି:

ବିଜେଡିର ବିଧାନସଭାରେ ଉପନେତା ତଥା ପୂର୍ବତନ ଅର୍ଥମନ୍ତ୍ରୀ ପ୍ରସନ୍ନ ଆଚାର୍ଯ୍ୟ କହିଛନ୍ତି, "ଓଡିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା କିମ୍ବା ଫୋକସ ରାଜ୍ୟ ମାନ୍ୟତା ପ୍ରଦାନ ଆବଶ୍ୟକତା ରହିଛି । ଯାହା ମାଧ୍ୟମରେ ଉତ୍ତର-ପୂର୍ବ ରାଜ୍ୟ ବା ହିମାଳୟନ ଷ୍ଟେଟ ଗୁଡିକୁ ମିଳୁଥିବା ୯୦:୧୦ ଅନୁପାତରେ ଅନୁଦାନ କେନ୍ଦ୍ରରୁ ମିଳିପାରିବ । ଓଡ଼ିଶା ଲଗାତାର ଭାବେ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି । ଓଡ଼ିଶାର ପ୍ରାୟ ୪୦ ପ୍ରତିଶତ ଅନୁସୂଚିତ ଜାତି ଓ ଅନୁସୂଚିତ ଜନ ଜାତି ହୋଇଥିବାରୁ ଫୋକସ ରାଜ୍ୟର ମାନ୍ୟତାର ଆବଶ୍ୟକତା ରହିଛି । ରାଜ୍ୟଙ୍କୁ କେନ୍ଦ୍ରୀୟ ଟିକସ ହସ୍ତାନ୍ତର ହାର ୪୧ % ରହିଛି । ତାକୁ ୫୦% କୁ ବୃଦ୍ଧି କରିବାକୁ ଦାବି ରଖିଛୁ । ପ୍ରତି ୩ ବର୍ଷରେ କୋଇଲା ରୟାଲିଟି ସଂଶୋଧନ ବ୍ୟବସ୍ଥା ରହିଥିଲେ ହେଁ ଦୀର୍ଘ ୧୪ ବର୍ଷ ହେଲା ଏହା କରାଯାଇନାହିଁ । ଯାହାଫଳରେ ଓଡିଶା, ଝାଡ଼ ଖଣ୍ଡ ଓ ବିହାର ପରି ରାଜ୍ୟମାନେ କ୍ଷତି ସହୁଛନ୍ତି । ତେଣୁ ତୁରନ୍ତ କୋଇଲା ରୟାଲିଟି ସଂଶୋଧନ କରାଯାଉ ।"

'ସ୍ୱତନ୍ତ୍ର ଆର୍ଥିକ ଅନୁଦାନ ପ୍ରଦାନ ବ୍ୟବସ୍ଥା':

ପୂର୍ବତନ ରାଜ୍ୟସଭା ସାଂସଦ ତଥା ଦଳର ଜାତୀୟ ମୁଖପାତ୍ର ଡ. ଅମର ପଟ୍ଟନାୟକ କହିଛନ୍ତି, "ଦଳର ସଭାପତି ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଶାସନ ସମୟରେ ଓଡିଶା ବିତ୍ତୀୟ ଶୃଙ୍ଖଳା କ୍ଷେତ୍ରରେ ନୀତି ଆୟୋଗଙ୍କ ରିପୋର୍ଟ ଅନୁଯାୟୀ ଶ୍ରେଷ୍ଠ ରାଜ୍ୟର ମାନ୍ୟତା ପାଇଛି । ବିଜେଡି ଦାବିପତ୍ରରେ ବିଭିନ୍ନ ଗଠନ ମୂଳକ ପ୍ରସ୍ତାବ ଦେଇଛି । ଯାହା ମାଧ୍ୟମରେ ଓଡିଶାକୁ ଅଧିକ ଅର୍ଥ ମିଳିପାରିବ । ଯେଉଁ ରାଜ୍ୟ ଆର୍ଥିକ ଶୃଙ୍ଖଳା କ୍ଷେତ୍ରରେ ନିର୍ଦ୍ଧାରିତ ମାନଦଣ୍ଡ ପାଳନ କରୁଛନ୍ତି, ସେମାନଙ୍କୁ ସ୍ୱତନ୍ତ୍ର ଆର୍ଥିକ ଅନୁଦାନ ପ୍ରଦାନର ବ୍ୟବସ୍ଥା କରାଯାଉ । ପରିବେଶ ସୁରକ୍ଷା ଓ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଆଗୁଆ ଥିବା ରାଜ୍ୟଙ୍କୁ ମଧ୍ୟ ସ୍ୱତନ୍ତ୍ର ଅନୁଦାନ ଦିଆଯାଉ ।"

'ରାଜ୍ୟ ସରକାର ଓଡ଼ିଶା ପାଇଁ ଫୋକସ ରାଜ୍ୟ ମାନ୍ୟତା ଦାବି କରି ନାହାନ୍ତି':

ସେ ଆହୁରି ମଧ୍ୟ କହିଛନ୍ତି, "ବିପର୍ଯ୍ୟୟ ପରିଚାଳନା ଓ ପରିବେଶ ସୁରକ୍ଷା କ୍ଷେତ୍ରରେ ଓଡ଼ିଶା ଆଗୁଆ ରାଜ୍ୟ ଭାବେ ରହିଛି । କ୍ଲିନ ଏନର୍ଜି ସେସ ମାଧ୍ୟମରେ ଆଦାୟ କରାଯାଉଥିବା ରାଜସ୍ୱରେ ରାଜ୍ୟଙ୍କ ଭାଗ ରଖାଯାଉ । ଓଡ଼ିଶାର ଆର୍ଥିକ ସ୍ଥିତି କିପରି ସୁଦୃଢ଼ ହେବ ସେହି ଲକ୍ଷ୍ୟ ରଖି ବିଭିନ୍ନ ପ୍ରସ୍ତାବ ଓ ଦାବି ରଖାଯାଇଛି । କିନ୍ତୁ, ରାଜ୍ୟ ସରକାର ଓ ବିଜେପି ତରଫରୁ ପ୍ରଦାନ କରାଯାଇଥିବା ଦାବିପତ୍ରରେ ଓଡିଶା ପାଇଁ ଫୋକସ ରାଜ୍ୟର ମାନ୍ୟତା କି କୌଣସି ସ୍ୱତନ୍ତ୍ର ପ୍ୟାକେଜ ପାଇଁ ଦାବି କରାଯାଇ ନାହିଁ । ଓଡ଼ିଶାର ସ୍ୱାର୍ଥ ରକ୍ଷା ପାଇଁ ସ୍ୱର ଉତ୍ତୋଳନ କରିବା ପାଇଁ ଏତେ ଡର କାହିଁକି ବୋଲି ବିଜେଡି ପକ୍ଷରୁ ଆମେ ବିଜେପି ସରକାରଙ୍କୁ ପ୍ରଶ୍ନ ପଚାରୁଛୁ ।"

ଏହା ମଧ୍ୟ ପଢ଼ନ୍ତୁ...

ବରିଷ୍ଠ ବିଜେଡି ନେତା ତଥା ପୂର୍ବତନ ଅର୍ଥ ମନ୍ତ୍ରୀ ଶଶିଭୂଷଣ ବେହେରା କହିଛନ୍ତି, "କେନ୍ଦ୍ରୀୟ ଅବହେଳା ସତ୍ତ୍ୱେ ନବୀନ ପଟ୍ଟନାୟକଙ୍କ ସରକାରଙ୍କ ଉତ୍ତମ ଆର୍ଥିକ ପରିଚାଳନା ଯୋଗୁଁ ରାଜ୍ୟ ଉତ୍କଟ ଆର୍ଥିକ ସମସ୍ୟାରୁ ବାହାରି ଏକ ଆର୍ଥିକ କ୍ଷେତ୍ରରେ ବଳକା ରାଜ୍ୟ ହୋଇଥିଲା । ରାଜ୍ୟର ବୁଣାକାର ସମୁଦାୟଙ୍କ ଉନ୍ନତି ପାଇଁ ଓ ବନ୍ଦ ହୋଇ ଯାଇଥିବା ଚିନି କଳ ଗୁଡିକର ପୁନଃରୁଦ୍ଧାର ପାଇଁ ସ୍ୱତନ୍ତ୍ର ପ୍ୟାକେଜ ପ୍ରଦାନ ପାଇଁ ଦଳ ଦାବି ରଖିଛି । ସେହିପରି ଦଳର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲ କହିଛନ୍ତି, "୮ଟି କେନ୍ଦ୍ରୀୟ ଯୋଜନାକୁ ବନ୍ଦ କରି ଦିଆଗଲା । ଯାହା ଓଡିଶା ପ୍ରତି କେନ୍ଦ୍ରର ଅବହେଳାର ଉଦାହରଣ । ପୂର୍ବରୁ କେନ୍ଦ୍ରରୁ ୯୦:୧୦ ଅନୁପାତରେ ଅର୍ଥ ପ୍ରଦାନ କରାଯାଉଥିଲା । ଯାହାକୁ ୬୦:୪୦କୁ କମାଇ ଦିଆଗଲା । ଯଦ୍ୱାରା ରାଜ୍ୟ ଉପରେ ଆର୍ଥିକ ବୋଝ ବଢିଲା ।"

ଇଟିଭି ଭାରତ, ଭୁବନେଶ୍ବର