ଯାଜପୁର: ପାରିବାରିକ କଳହର କରୁଣ ପରିଣିତି । ଜିଲ୍ଲା କୋରେଇ ଥାନା ରଣପୁର ଗ୍ରାମରେ ଘଟିଛି ଅଘଟଣ । ଘର ଝଗଡାକୁ କେନ୍ଦ୍ର କରି ସ୍ତ୍ରୀକୁ ହାତୁଡିରେ ପିଟି ହତ୍ୟା କଲା ସ୍ବାମୀ । ପୋଲିସର ତଦନ୍ତ ଆରମ୍ଭ ହୋଇଛି ।
ସୂଚନାଅନୁସାରେ ରଣପୁର ଗ୍ରାମର ଦିପ୍ତିମୟୀ ଜେନା ଓ ତାଙ୍କ ସ୍ବାମୀ ଅରୁଣ ଜେନାଙ୍କ ମଧ୍ୟରେ ବିଭିନ୍ନ ସମୟରେ ଛୋଟ ଛୋଟ ଘଟଣାକୁ ନେଇ ଝଗଡା ହେଉଥିଲା । ଆଜି ସକାଳ ଦୀପ୍ତିମୟୀ ଠାକୁର ପୂଜା କରୁଥିବା ବେଳେ ଅରୁଣ ହଠାତ୍ ତାଙ୍କ ପଛପଟୁ ଏକ ଲୁହା ଚୁତାରେ ମୁଣ୍ଡକୁ ପ୍ରହାର କରିଥିଲେ । ତେବେ ଲହୁ ଲୁହାଣ ଅବସ୍ଥାରେ ଆମ୍ବୁଲାନ୍ସ ସାହାଯ୍ୟରେ ଦୀପ୍ତିଙ୍କୁ କୋରେଇ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏପଟେ ଅଭିଯୁକ୍ତ ସ୍ବାମୀକୁ ଗିରଫ କରିବା ପାଇଁ ଦାବି କରିଛନ୍ତି ମୃତକଙ୍କ ପରିବାର ।
ଘଟଣାର ଖବର ପାଇଁ କୋରେଇ ପୋଲିସ ଅଭିଯୁକ୍ତ ସ୍ଵାମୀ ଅରୁଣଙ୍କୁ ଅଟକ ରଖିଛି । କୋରେଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି । ଅରୁଣ ଓ ତାଙ୍କ ପତ୍ନୀ ଉଭୟ ଶିକ୍ଷକ ଓ ଶିକ୍ଷୟିତ୍ରୀ ଭାବେ କାର୍ଯ୍ୟ କରନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
