ଯାଜପୁର: ଯାଜପୁର ରୋଡ ଡାକ୍ତରଖାନାରେ ଦିନକୁ ଦିନ ରୋଗୀ ସେବା ବିପର୍ଯ୍ୟସ୍ତ ହେବାରେ ଲାଗିଛି । କଳିଙ୍ଗନଗର ଓ ବ୍ୟାସନଗର ସମେତ ଆଖପାଖ ଅଞ୍ଚଳର ଲକ୍ଷାଧିକ ଲୋକ ଏହି ଡାକ୍ତରଖାନା ଉପରେ ନିର୍ଭର କରିଥାନ୍ତି । ତେବେ ଏଠାରେ ବିଭାଗୀୟ ଡାକ୍ତର ଓ କର୍ମଚାରୀ ଅଭାବରୁ ସମସ୍ୟା ଉତ୍କଟ ହେବାରେ ଲାଗିଛି । ଆଧୁନିକ ଯନ୍ତ୍ରପାତିଗୁଡିକର ବ୍ୟବହାର କରାଯାଉନଥିବା ବେଳେ ରକ୍ତ ଭଣ୍ଡାର ମଧ୍ୟ ସଠିକ୍ ଭାବେ କାର୍ଯ୍ୟକ୍ଷମ ହୋଇପାରୁନାହିଁ । ଏହାକୁ ନେଇ ମୁଣ୍ଡ ଟେକିଛି ଆନ୍ଦୋଳନ । ସ୍ଥାନୀୟ ଭଗତ ସିଂହ ଯୁବକ ସଂଘ ପକ୍ଷରୁ କଳିଙ୍ଗନଗର ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଦୀର୍ଘ 5 ଦିନ ଧରି ଚାଲିଛି ଗଣଧାରଣା । ପ୍ରଶାସନ ଏଥିପ୍ରତି ଦୃଷ୍ଟି ନଦେବାରୁ ଗୁରୁବାରଠାରୁ ଆମରଣ ଅନଶନ କରିବାକୁ ଚେତାବନୀ ଦେଇଛି ଯୁବକ ସଂଘ ।
ଏନେଇ ସ୍ଥାନୀୟ ଭଗତ ସିଂହ ଯୁବକ ସଂଘ ପକ୍ଷରୁ ଦୀର୍ଘ ପ୍ରାୟ 5 ଦିନ ଧରି କଳିଙ୍ଗନଗର ଏଡିଏମ୍ ଅଫିସ୍ ସମ୍ମୁଖରେ ଧାରଣା ଜାରି ରହିଛି । ଏଥିରେ ସହରର ବହୁ ବୟସ୍କ ବ୍ୟକ୍ତି ଓ ବରିଷ୍ଠ ନାଗରିକ ମଧ୍ୟ ସାମିଲ ହୋଇଛନ୍ତି । ପ୍ରଶାସନ ଏଥିପ୍ରତି କର୍ଣ୍ଣପାତ ନକରିବାରୁ ଆସନ୍ତାକାଲିଠାରୁ ସଂଘ ପକ୍ଷରୁ ଆମରଣ ଅନଶନ କରାଯିବ ବୋଲି ଚେତାବନୀ ଦିଆଯାଇଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ କ୍ଷେତ୍ରୀୟ ଡାକ୍ତରଖାନାର ମାନ୍ୟତା ଦେଇଥିଲେ । ପରେ ଏହା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମାନ୍ୟତା ପାଇଛି । ନିକଟରେ ଏହା ରାଜ୍ୟର ଦ୍ବିତୀୟ ସିଏଚସି ଭାବରେ ପୁରଷ୍କୃତ ମଧ୍ୟ ହୋଇଛି । ଏଭଳି ଏକ ପ୍ରମୁଖ ଡାକ୍ତରଖାନାରେ ଡାକ୍ତର ଅଭାବରୁ ରୋଗୀଙ୍କ ଦୁର୍ଦ୍ଦଶା ଦିନକୁ ଦିନ ବଢି ବଢି ଚାଲିଛି । ମାତ୍ର ବିଭାଗୀୟ ବିଶେଷଜ୍ଞ ଡାକ୍ତର ଓ କର୍ମଚାରୀ ଅଭାବରୁ ଏଠାରେ ଏପରି ସମସ୍ୟା ଉପୁଜିଛି ।
ତେବେ ଏ ସମ୍ପର୍କରେ କଳିଙ୍ଗନଗର ଅତିରିକ୍ତ ଜିଲ୍ଲାପାଳଙ୍କୁ ପଚାରିବାରୁ ସେ କହିଲେ ସମସ୍ୟା ସମ୍ପର୍କରେ ସେ ଜିଲ୍ଲାପାଳ ଏବଂ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ଅବଗତ କରାଇଛନ୍ତି । ପରିସ୍ଥିତିରେ ସୁଧାର ଆଣିବାକୁ ପ୍ରଶାସନିକ ସ୍ତରରେ ଉଦ୍ୟମ ଚାଲିଛି ବୋଲି ସେ କହିଥିଲେ । ଡାକ୍ତରଖାନାର ପରିସ୍ଥିତିରେ ସୁଧାର ନ ଆସିଲେ ଆଗାମୀ ଦିନରେ ଏହି ଆନ୍ଦୋଳନ ଉଗ୍ର ରୂପ ଧାରଣ କରିବାର ସମ୍ଭାବନା ରହିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
