ଯାଜପୁର: ଭଙ୍ଗା ହେବ ରଙ୍ଗଶାଳା । ରୂପେଶ ଭଦ୍ରଙ୍କ ଗେଷ୍ଟ ହାଉସ ଉପରେ ଚଢ଼ିବ ବୁଲଡୋଜର । ସରକାରୀ ଜମିରେ ନିର୍ମିତ ଏହି ଗେଷ୍ଟ ହାଉସକୁ ଭାଙ୍ଗିବା ପାଇଁ ନିଷ୍ପତି ନେଇଛି ଜିଲ୍ଲା ପ୍ରଶାସନ । ଗୁରୁବାର ଗଣମାଧ୍ୟମକୁ ଏହି ସୂଚନା ଦେଇଛନ୍ତି ଯାଜପୁର ଜିଲ୍ଲାପାଳ ରଞ୍ଜନ କୁମାର ଦାସ ।
ଗତ ୧୬ ତାରିଖରେ ଧର୍ମଶାଳା ବ୍ଲକ ହରିଦାସପୁର ପଞ୍ଚାୟତ ପିଇଓ ସ୍ମିତାରାଣୀ ବିଶ୍ବାଳଙ୍କ ମୃତଦେହ ଗେଷ୍ଟ ହାଉସରୁ ଉଦ୍ଧାର ପରେ ଚର୍ଚ୍ଚାର ପରିସର ଆସିଥିବା ଏହି ଗେଷ୍ଟ ହାଉସ । ଯାହାକୁ ନେଇ ରାଜ୍ୟ ରାଜନୀତି ମଧ୍ୟ ବେଶ୍ ସରଗରମ ହୋଇଛି । ଏହା ଏକ ହତ୍ୟାକାଣ୍ଡ ଓ ସରକାରୀ ଜମିରେ ଏହି ଗେଷ୍ଟ ହାଉସ ନିର୍ମିତ ହୋଇଥିବା ଅଭିଯୋଗ କରି ବିରୋଧୀ ଦଳ ରାଜରାସ୍ତାକୁ ଓହ୍ଲାଇ ହୋହାଲ୍ଲା କରିଥିଲେ ।
ବିରୋଧିଙ୍କ ହଙ୍ଗାମା ପରେ ପ୍ରଶାସନ ପକ୍ଷରୁ ଗେଷ୍ଟ ହାଉସକୁ ନେଇ ତଦନ୍ତ କରାଯାଇଥିଲା । ଏନେଇ ଧର୍ମଶାଳା ତହସିଲଦାର ତଦନ୍ତ ସମ୍ପର୍କିତ ଏକ ରିପୋର୍ଟ ଜିଲ୍ଲାପାଳଙ୍କୁ ଦେବା ପରେ ଏହାକୁ ଉଚ୍ଛେଦ ପାଇଁ ନିଷ୍ପତି ହୋଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
