ବ୍ରହ୍ମପୁର: ବୈଦ୍ୟନାଥପୁର ଥାନା ଅନ୍ତର୍ଗତ ଗୋଇଲୁଣ୍ଡିରେ ଏକ ଲଜ୍ରେ ଗତବର୍ଷ ଜଣେ ମହିଳାଙ୍କୁ ହତ୍ୟା ମାମଲାରେ ଅଭିଯୁକ୍ତକୁ କେରଳରୁ ଗିରଫ କରିଛି ପୋଲିସ । ବ୍ରହ୍ମପୁର ପୋଲିସର ଏକ ଟିମ୍ କେରଳ ଥ୍ରୀସୁର ପୋଲିସ ସହଯୋଗରେ ଅନ୍ୟ ଏକ ମାମଲାରେ ଜେଲରେ ଥିବା ଏହି ଅଭିଯୁକ୍ତକୁ ଗିରଫ କରିବା ପରେ ଟ୍ରାଞ୍ଜିଟ ରିମାଣ୍ଡରେ ବ୍ରହ୍ମପୁର ଆଣିଛି । ଅଭିଯୁକ୍ତକୁ ଉକ୍ତ ହୋଟେଲକୁ ନେଇ ହତ୍ୟାକାଣ୍ଡର ସିନ ରି-କ୍ରିଏସନ ପ୍ରକ୍ରିୟା ମଧ୍ୟ ପୋଲିସ ଶେଷ କରିଛି ।
- କଣ ଥିଲା ପୂରା ଘଟଣା
ବ୍ରହ୍ମପୁର ଏସପି ଶ୍ରବଣା ବିବେକ କହିଛନ୍ତି,‘‘ ବ୍ରହ୍ମପୁର ସହରର ବୈଦ୍ୟନାଥପୁର ଥାନା ଅନ୍ତର୍ଗତ ଗୋଇଲୁଣ୍ଡି ରୋଡ ସ୍ଥିତ ଏକ ଲଜ୍ର ଏକ ରୁମରେ ଗତବର୍ଷ (୨୦୨୩) ନଭେମ୍ବର ୨୫ ତାରିଖରେ ଜଣେ ମହିଳାଙ୍କ ମୃତଦେହ ଉଦ୍ଧାର ହୋଇଥିଲା । ତେବେ ପୋଲିସ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ ପଠାଇ ପ୍ରାଥମିକ ତଦନ୍ତ କରିଥିଲା । ସେଥିରେ ମହିଳା ଜଣକ ଆନ୍ଧ୍ର ପ୍ରଦେଶର ବିଶାଖାପାଟଣାର ବାସିନ୍ଦା ଓ ତାଙ୍କ ନାମ କେ.କ୍ରିଷ୍ଣା ବେଣୀ (ବୟସ ୩୫) ବୋଲି ଜଣା ପଡିଥିଲା । ମହିଳାଙ୍କ ସହ ତାଙ୍କ ସ୍ବାମୀ ଭାବେ ପରିଚୟ ଦେଇ ଲଜରେ ଥିବା ସମୀଦମନ.ଏଏସ ନାମକ ଜଣେ ଯୁବକ ଫେରାର ଥିବା ଜଣାପଡିଥିଲା । ପରେ ମହିଳାଙ୍କୁ ଶ୍ବାସରୁଦ୍ଧ କରି ହତ୍ୟା କରାଯାଇଥିବା ବ୍ୟବଚ୍ଛେଦ ରିପୋର୍ଟରେ ସ୍ପଷ୍ଟ ହେବା ପରେ ପୋଲିସ ହତ୍ୟା ମାମଲା ରୁଜୁ କରି ତଦନ୍ତ କରିଥିଲା । ଅଭିଯୁକ୍ତକୁ ଚିହ୍ନଟ ପରେ ଗିରଫ କରିବା ପାଇଁ ପୋଲିସ ପ୍ରକ୍ରିୟା ଜାରି ରହିଥିଲା ।’’
- କେରଳର ଏକ ଜେଲରେ ଥିଲା ଅଭିଯୁକ୍ତ:-
ମହିଳାଙ୍କୁ ହତ୍ୟା କରିବା ପରେ ଗଞ୍ଜେଇ ଚାଲାଣ ମାମଲାରେ ଏହି ଅଭିଯୁକ୍ତ ଜଣକ ଗିରଫ ହୋଇ କେରଳର ଏକ ଜେଲରେ ଥିଲା । ଏହି ସୂଚନା ମିଳିବା ପରେ ବ୍ରହ୍ମପୁର ପୋଲିସ ଅନ୍ତଃରାଜ୍ୟ ଆକ୍ସନ ଆରମ୍ଭ କରିଥିଲା । ବ୍ରହ୍ମପୁର ପୋଲିସ ସ୍ଥାନୀୟ ପୋଲିସ ସହଯୋଗରେ ତାକୁ ଜେଲରୁ ଗିରଫ କରିବା ପରେ ସ୍ଥାନୀୟ କୋର୍ଟରେ ହାଜର କରି ଟ୍ରାଞ୍ଜିଟ ରିମାଣ୍ଡ ଆବେଦନ କରିଥିଲା । କୋର୍ଟଙ୍କ ଅନୁମତି କ୍ରମେ ତାକୁ ବ୍ରହ୍ମପୁର ଅଣାଯାଇ ଗତକାଲି ହତ୍ୟାକାଣ୍ଡ ଘଟିଥିବା ଲଜ ରୁମରେ ସିନ ରି-କ୍ରିଏସନ କରାଯାଇଛି ।
ଏହା ମଧ୍ୟ ପଢନ୍ତୁ-ସମ୍ବଲପୁର ମାଆ-ଝିଅ ମୃତ୍ୟୁର ଖୁଲାସା, ଶ୍ବାସରୁଦ୍ଧ ପରେ ପେଟ୍ରୋଲ ଢାଳି ପୋଡ଼ିଥିଲେ ବାପା-ପୁଅ ଏହା ମଧ୍ୟ ପଢନ୍ତୁ :- ଶୋଇଥିବା ବେଳେ ଲାଗିଗଲା ନିଆଁ, ମାଆ-ଝିଅ ଜୀବନ୍ତ ଦଗ୍ଧ, ସମ୍ପର୍କୀୟ ଆଣିଲେ ହତ୍ୟା ଅଭିଯୋଗ |
- ମହିଳାଙ୍କ ସହ ଲିଭ-ଇନ୍ ରେ ରହୁଥିଲା ଅଭିଯୁକ୍ତ
ହତ୍ୟାକାଣ୍ଡର କାରଣ ସମ୍ପର୍କରେ ପୋଲିସକୁ ମିଳିଥିବା ତଥ୍ୟ ଅନୁସାରେ, ଅଭିଯୁକ୍ତ ଜଣଙ୍କ ନିଜ ସ୍ତ୍ରୀଙ୍କୁ ଛାଡ଼ପତ୍ର ଦେଇ ହତ୍ୟାର ଶିକାର ହୋଇଥିବା ମହିଳାଙ୍କ ସହିତ ଲିଭ୍-ଇନରେ ରହୁଥିଲା । ଅଭିଯୁକ୍ତ କେରଳର ବାସିନ୍ଦା ହୋଇଥିବା ବେଳେ ହତ୍ୟାର ଶିକାର ମହିଳାଙ୍କ ଘର ଆନ୍ଧ୍ର ପ୍ରଦେଶ । ଅଭିଯୁକ୍ତ ଜଣେ ଅଭ୍ୟାସଗତ ଗଞ୍ଜେଇ ଚୋରା ଚାଳାଣକାରୀ । ଉଭୟଙ୍କ ମଧ୍ୟରେ କୌଣସି ପ୍ରକାରେ ପରିଚୟ ହେବା ପରେ ପ୍ରେମ ସମ୍ପର୍କ ଗଢି ଉଠିଥିଲା । ମହିଳାଙ୍କର ପୂର୍ବରୁ ବିବାହ ବିଚ୍ଛେଦ ହୋଇସାରିଥିବା ବେଳେ ଏକ 19 ବର୍ଷର ପୁଅ ମଧ୍ୟ ରହିଛି । ଅଭିଯୁକ୍ତ ସମୀଦମନ ପ୍ରରୋଚନାରେ ମହିଳାଙ୍କ ପୁଅ ଗଞ୍ଜେଇ ଚାଲାଣରେ ସମ୍ପୃକ୍ତ ହୋଇ ଆନ୍ଧ୍ର ପୋଲିସ ଦ୍ବାରା ଗିରଫ ହୋଇଥିଲା । ଏହି କାରଣରୁ ଲିଭ-ଇନ୍ରେ ରହୁଥିବା ସତ୍ତ୍ବେ ମଧ୍ୟ ମହିଳା ଓ ଅଭିଯୁକ୍ତ ସମୀଦମନ ମଧ୍ୟରେ ତିକ୍ତତା ଆରମ୍ଭ ହୋଇଥିଲା ।
ଏହା ମଧ୍ୟ ପଢନ୍ତୁ:- ଆଉ ନାହାନ୍ତି 'କ୍ରାଇମ ପେଟ୍ରୋଲ' ଫେମ ଅଭିନେତା ନିତିନ ଚୌହାନ, ଫ୍ୟାନ୍ସ ଓ ସେଲିବ୍ରିଟିଙ୍କ ଶୋକ ଏହା ମଧ୍ୟ ପଢନ୍ତୁ:-ମାଆ-ଝିଅ ଡବଲ ମର୍ଡର ଉପରୁ ହଟୁଛି ପରଦା, ପୋଲିସର କ୍ରାଇମ ସିନ ରିକ୍ରିଏସନ |
- ଦମ୍ପତିର ପରିଚୟ ଦେଇ ଲଜରେ ରହୁଥିଲେ:
ଉଭୟ ସ୍ଵାମୀ-ସ୍ତ୍ରୀ ଭାବେ ପରିଚୟ ଦେଇ ଗତବର୍ଷ (2023) ନଭେମ୍ବର ମାସର ବ୍ରହ୍ମପୁର ଆସି ଉକ୍ତ ଲଜ୍ରେ ରୁମ ବୁକ୍ କରିଥିଲେ । ତେବେ କିଛି ଦିନ ରହିବା ପରେ ଲଜ୍ ଭଡା ଓ ଅନ୍ୟ କାରଣରୁ ଉଭୟଙ୍କ ମଧ୍ୟରେ ଝଗଡା ଆରମ୍ଭ ହୋଇଥିଲା । ଏଥିରେ ଉତ୍ୟକ୍ତ ହୋଇ ଅଭିଯୁକ୍ତ ସମୀଦମନ, ବାନ୍ଧବୀ କ୍ରିଷ୍ଣାବେଣୀଙ୍କୁ ହତ୍ୟା କରିଥିଲା । ସେଠାରୁ ସେ ସିଧା କେରଳ ଫେରାର ହୋଇଯାଇଥିଲା । ବିଭିନ୍ନ ସ୍ଥାନରେ ଆତ୍ମଗୋପନ କରିବା ସହ ଗଞ୍ଜେଇ ଚାଲାଣ ଜାରି ରଖିଥିଲା । ଏକ ଅବକାରୀ ମାମଲାରେ କେରଳ ପୋଲିସ ଦ୍ବାରା ଗିରଫ ହୋଇ ଜେଲରେ ଥିବା ବେଳେ ଏବେ ବ୍ରହ୍ମପୁର ପୋଲିସ ତାକୁ ଗିରଫ କରି ଓଡିଶା ଆଣି ହତ୍ୟାକାଣ୍ଡର ଫର୍ଦ୍ଦାଫାସ କରିଛି ।
ଇଟିଭି ଭାରତ, ବ୍ରହ୍ମପୁର
