ଯାଜପୁର: ବିଞ୍ଝାରପୁର ଥାନା ପନ୍ତେପୁର ମଲିଆ ଗାଁରେ ଶିଶୁକନ୍ୟା ବିକ୍ରି ଅଭିଯୋଗ ହୋଇଥିଲା । ପୋଲିସ ଶିଶୁକନ୍ୟାକୁ ଉଦ୍ଧାର କରି ଶିଶୁ ସୁରକ୍ଷା ୟୁନିଟକୁ ହସ୍ତାନ୍ତର କରିଥିଲା । ଏବେ ସେହି ଶିଶୁ କନ୍ୟାକୁ ନେବା ପାଇଁ ଶିଶୁ ମଙ୍ଗଳ ସମିତି ନିକଟରେ ଦାବି କରିଛନ୍ତି ଶିଶୁର ମାଆ ।
ସୂଚନା ମୁତବାକ ମଲିଆ ଗ୍ରାମର ରମେଶ ବାରିକ ନିଜର ଧାରକରଜ ଶୁଝି ନ ପାରି ସୟଦପୁର ଅଂଚଳରେ ଶିଶୁ କନ୍ୟାକୁ ବିକ୍ରି କରିଦେଇଥିବା ଅଭିଯୋଗ ହୋଇଥିଲା । ଏ ନେଇ ରମେଶଙ୍କ ବାପା ବିଂଝାରପୁର ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୋଲିସ ଶିଶୁ କନ୍ୟାକୁ ଉଦ୍ଧାର କରିବା ପରେ ଜିଲ୍ଲା ଶିଶୁ ସୁରକ୍ଷା ୟୁନିଟକୁ ହସ୍ତାନ୍ତର କରିଥିଲା ।
ଶିଶୁ ସୁରକ୍ଷା ୟୁନିଟ୍ ଶିଶୁ ମଙ୍ଗଳ ସମିତିରେ ହାଜର କରିବା ପରେ ସ୍ବତନ୍ତ୍ର ଶିଶୁ ପରିଚର୍ଯ୍ୟା କେନ୍ଦ୍ରରେ ରଖାଯାଇଛି । ଏବେ ସେହି ଶିଶୁ କନ୍ୟାକୁ ନେବା ପାଇଁ ନିବେଦନ କରିଛନ୍ତି ଶିଶୁ କନ୍ୟାର ମାଆ । କିନ୍ତୁ ସମିତି ପକ୍ଷରୁ ସ୍ଥାନୀୟ ଥାନାକୁ ଅବଗତ କରିବା ପରେ ପଦକ୍ଷେପ ନେବାକୁ କୁହାଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
