ଯାଜପୁର: ଜମାକାରୀଙ୍କ ଅର୍ଥ ଲୁଟିନେଲା ‘ପ୍ୟାନ୍କାର୍ଡ କ୍ଲବ’। ଏଭଳି ଅର୍ଥନୈତିକ ଅପରାଧ ଘଟଣା ଘଟିଛି ଯାଜପୁର ଜିଲ୍ଲାର। ଶତାଧିକ ଗରିବ ଲୋକ ଜଣେ ଶିକ୍ଷକଙ୍କ ଦ୍ବାରା ପ୍ୟାନ୍କାର୍ଡ ନାମକ ସଂସ୍ଥାରେ ଲକ୍ଷାଧିକ ଟଙ୍କା ଜମାକରି ଠକାମୀର ଶୀକାର ହୋଇଛନ୍ତି।
ଜିଲ୍ଲାର ରସୁଲପୁର ବ୍ଲକ୍ ଅନ୍ତର୍ଗତ କଲଣ ଓ ଶୁଳିଆ ଅଞ୍ଚଳର ଶିକ୍ଷକ ଧିରେନ୍ଦ୍ର ସାହୁଙ୍କ ଜରିଆରେ ‘ପ୍ୟାନ୍କାର୍ଡ କ୍ଲବ’ ସଂସ୍ଥାରେ ପ୍ରାୟ 5ଶହରୁ ଊର୍ଦ୍ଧ୍ବ ଲୋକ ପ୍ରାୟ 25 ଲକ୍ଷ ଟଙ୍କାରୁ ଅଧିକ ଜମା ରଖିଥିବା ଜମାକାରୀ ଜଣାଇଛନ୍ତି। କିଏ ଜମି ବିକ୍ରି କରି ତ କିଏ ସୁନାଗହଣା ବିକ୍ରିକରି, ଆଉ କିଏ ପୁଣି ତା’ର ଝିଅ ବାହାଘର କରିବାକୁ ରଖିଥିବା ଟଙ୍କାକୁ ଅଧିକ କରିବା ଆଶାରେ ଏହି ସଂସ୍ଥାରେ ଟଙ୍କା ଜମା କରିଛନ୍ତି। ଅର୍ଦ୍ଧାଧିକ ଲୋକଙ୍କ ଜମା ଟଙ୍କାର ରସିଦ ମିଳିନଥିବା ବେଳେ ଯେଉଁମାନେ ରସିଦ ବା ବଣ୍ଡ ପାଇଛନ୍ତି ସେମାନେ ମଧ୍ୟ ତାଙ୍କ ଟଙ୍କା ଫେରି ପାଇନାହାଁନ୍ତି।
ଯେଉଁଥିପାଇଁ ଜମାକାରୀ ସମ୍ପୃକ୍ତ ଶିକ୍ଷକଙ୍କ କାର୍ଯ୍ୟକଳାପ ଉପରେ ସନ୍ଦିହାନ ହୋଇପଡିଛନ୍ତି। ସେମାନଙ୍କ ଜମାଟଙ୍କା ଫେରସ୍ତ ପାଇଁ ବାରମ୍ବାର ସମ୍ପୃକ୍ତ ଶିକ୍ଷକଙ୍କୁ ଜଣାଇଥିଲେ ମଧ୍ୟ ସେ ଏଥିରେ କର୍ଣ୍ଣପାତ କରୁନାହାଁନ୍ତି। ଏଥିପାଇଁ ଜମାକାରୀ ପ୍ରତିକ୍ରିୟାଶୀଳ ହୋଇ ଉଠିଛନ୍ତି। ସେମାନେ ଏ ସମ୍ପର୍କରେ ନିଜର ପ୍ରତିକ୍ରିୟା ପ୍ରକାଶ କରିବା ସହ ଜିଲ୍ଲା ପ୍ରଶାସନର ଦ୍ବାରସ୍ଥ ହୋଇଛନ୍ତି। ସେପଟେ ଆମେ ସମ୍ପୃକ୍ତ ଶିକ୍ଷକଙ୍କ ପ୍ରତିକ୍ରିୟା ଜାଣିବାକୁ ଚେଷ୍ଟା କରିଥିଲେ ମଧ୍ୟ ସେ କ୍ୟାମେରା ଆଗକୁ ଆସୁନାହାଁନ୍ତି।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
