ଯାଜପୁର: ଯାଜପୁରରେ ଶିଶୁ ବିକ୍ରିର ଅଭାବନୀୟ ଅଭିଯୋଗ । ନାତୁଣୀକୁ ପୁଅ ବିକ୍ରି କରିଦେଇଥିବା ଅଭିଯୋଗ କରିଛନ୍ତି ଜେଜେ । ଯାଜପୁର ଜିଲା ବିଞ୍ଝାରପୁର ଥାନା ଅଞ୍ଚଳରେ ଏଭଳି ଏକ ଘଟଣା ସାମନାକୁ ଆସିଛି । ଅଭିଯୋଗ ପାଇବା ପରେ ସ୍ଥାନୀୟ ପୋଲିସ ଅଢ଼େଇ ବର୍ଷର ଶିଶୁକନ୍ୟାକୁ ଉଦ୍ଧାର କରିବାରେ ସକ୍ଷମ ମଧ୍ୟ ହୋଇଛି ।
ଅଭିଯୋଗ ମୁତାବକ ବିଞ୍ଝାରପୁର ଥାନା ପନ୍ତେପୁର ମଲିଆ ଗାଁର ରମେଶ ବାରିକଙ୍କ ଅଢ଼େଇ ବର୍ଷର ଶିଶୁ କନ୍ୟାକୁ ବିଞ୍ଝାରପୁର ଅଞ୍ଚଳରେ ବିକ୍ରି ହୋଇଥିବା ଅଭିଯୋଗ କରିଛନ୍ତି ଶିଶୁକନ୍ୟାର ଜେଜେ ରବିନ୍ଦ୍ର ବାରିକ । ପୁଅ ରମେଶ ୫ ହଜାର ଟଙ୍କା ଧାର ଆଣି ଦେଇ ନ ପାରିବାରୁ ନିଜ ଝିଅକୁ ବିକ୍ରି କରି ଦେଇଥିବା ଅଭିଯୋଗ କରିଛନ୍ତି ଶିଶୁକନ୍ୟାର ଜେଜେବାପା ।
ପୋଲିସ ଅଭିଯୋଗ ପାଇବା ପରେ ଗତକାଲି ବିଳମ୍ବିତ ରାତ୍ରିରେ ଚଢ଼ାଉ କରି ବିଞ୍ଝାରପୁର ସଏଦପୁର ଅଞ୍ଚଳର ଲିଟୁ ଜେନାଙ୍କ ଘରୁ ଶିଶୁ କନ୍ୟାକୁ ଉଦ୍ଧାର କରିଛି । ଆଜି ଜିଲା ଶିଶୁ ସୁରକ୍ଷା ଅଧିକାରୀ ନିରଞ୍ଜନ କର ଘଟଣାସ୍ଥଳରେ ପହଞ୍ଚି ଅନୁସନ୍ଧାନ କରିବା ସହ ଶିଶୁ କନ୍ୟାକୁ ଆଣି ଶିଶୁ ମଙ୍ଗଳ ସମିତିରେ ହାଜର କରିଥିବା ସୂଚନା ରହିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
