ଯାଜପୁର: ସହରରେ ନକଲି ଅଟା କାରଖାନାକୁ ଠାବ କଲା ପୋଲିସ । ସେଠାରୁ ବିଭିନ୍ନ ପ୍ରତିଷ୍ଠିତ କମ୍ପାନୀର ଅଟା ତିଆରି ଜରି, ମେସିନ ଓ ଗହମ ଆଦି ଅନ୍ୟାନ୍ୟ ସାମଗ୍ରୀକୁ ଜବତ କରିଛି ପୋଲିସ । ଏହି ଘଟଣାରେ ଯାଜପୁର ପୋଲିସ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ହେଲେ କେଶବ ଚନ୍ଦ୍ର ପାଣି । ଯାଜପୁର ଥାନା ଦେବୀଦ୍ବାର ଅଂଚଳରେ କେଶବର ନିଜର ଅଟାକଳ ରହିଛି ।
ସେଠାରେ ଗହମ ପେଶାଇ ବିଭିନ୍ନ ନାମୀ ଦାମୀ କମ୍ପାନୀର ଜରି ଆଣି ସେଥିରେ ସାଧାରଣ ଅଟାକୁ ପ୍ୟାକିଂ କରି ବଜାରକୁ ଛାଡୁଥିଲେ । ଏନେଇ ପରିବାର ଅଟା କମ୍ପାନୀ ପ୍ରଥମେ କଲିକତାର ଏକ ଘରୋଇ ଡିଟେକଟିଭ କମ୍ପାନୀର ସହାୟତା ନେଇଥିଲେ । ସମ୍ପୃକ୍ତ କମ୍ପାନୀ ଅନୁସନ୍ଧାନ କରି ଜାଣିବା ପରେ ଯାଜପୁର ଥାନାରେ ଏକ ଲିଖିତ ଅଭିଯୋଗ କରାଯାଇଥିଲା ।
ଅଭିଯୋଗ ପାଇବା ପରେ ଯାଜପୁର ପୋଲିସ ସୋମବାର ସମ୍ପୃକ୍ତ ଅଟା କଳ ଉପରେ ଚଢାଉ କରିଥିଲା । ସେଠାରୁ ଅଟା ପ୍ୟାକେଟ ସହିତ ପ୍ୟାକିଂ ପାଇଁ ଆବଶ୍ୟକ ବିଭିନ୍ନ ସାମଗ୍ରୀ ଜବତ କରିଥିଲା । ପୋଲିସ ଅଭିଯୁକ୍ତ କେଶବକୁ ମଧ୍ୟ ଗିରଫ କରିଥିବାବେଳେ ମଙ୍ଗଳବାର ତାଙ୍କୁ କୋର୍ଟ ଚାଲାଣ କରିବ ବୋଲି ଜଣାପଡିଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
