ଯାଜପୁର: ସ୍ଥାନୀୟ ଦଶରଥପୁର ବ୍ଲକ ବିରିପଟାରେ ଚାଲିଥିବା ମନ୍ମଥ ଧଳ ସ୍କାରକୀ ଦିବାରାତ୍ର ଭଲିବଲ ଟୁର୍ଣ୍ଣାମେଣ୍ଟ ଉଦଯାପିତ ହୋଇଛି । ଫାଇନାଲ ମୁକାବିଲା ଇଷ୍ଟ କୋଷ୍ଟ ରେଳବାଇ ଓ କିଟ୍ ମଧ୍ୟ ଖେଳାଯାଇଥିଲା । ସଂଘର୍ଷପୂର୍ଣ୍ଣ ମ୍ୟାଚ୍ରେ ଇଷ୍ଟ କୋଷ୍ଟ କିଟ୍କୁ ପରାସ୍ତ କରି ଚଳିତ ବର୍ଷ ଚାମ୍ପିୟନ ହୋଇଛି ।
ବିରିପଟା ଆଞ୍ଚଳିକ ଭଲିବଲ୍ ପ୍ରଶିକ୍ଷଣ ଅନୁଷ୍ଠାନ ତରଫରୁ ଆୟୋଜିତ ଏହି ଟୁର୍ଣ୍ଣାମେଣ୍ଟରେ ଅନ୍ତର୍ଜାତୀୟ ଧାବିକା ଦୂତି ଚାନ୍ଦ ଯୋଗ ଦେଇ ଗ୍ରାମାଞ୍ଚଳରେ ଏଭଳି ରାଜ୍ୟସ୍ତରୀୟ ଆୟୋଜନ ନେଇ ଖୁସି ବ୍ୟକ୍ତ କରିଥିଲେ । ଟୁର୍ଣ୍ଣାମେଣ୍ଟର ଚାମ୍ପିୟନ ଟିମକୁ ଟ୍ରଫି ସହିତ ନଗଦ ୨୦ ହଜାର ଟଙ୍କା ପୁରସ୍କାର ଅର୍ଥ ରାଶି ଓ ରନର୍ସଅପ୍ ଟିମକୁ ଟ୍ରଫି ସହିତ ୧୫ ହଜାର ଟଙ୍କା ପ୍ରଦାନ କରାଯାଇଥିଲା । ସେହିପରି ତୃତୀୟ ସ୍ଥାନରେ ଥିବା ଟିମକୁ ୧୦ ହଜାର ଟଙ୍କା ପ୍ରଦାନ କରାଯାଇଥିଲା ।
ଫାଇନାଲ ମ୍ୟାଚ୍ ଦେଖିବାକୁ ଦର୍ଶକଙ୍କ ଭିଡ ଦେଖିବାକୁ ମିଳିଥିଲା । ରାଜ୍ୟର ବଛା ବଛା ଦଳ ଏହି ଟୁର୍ଣ୍ଣାମେଣ୍ଟରେ ଅଂଶଗ୍ରହଣ କରିଥିଲେ । ଲିଗ୍ ପର୍ଯ୍ୟାୟର ପ୍ରତିଟି ମ୍ୟାଚ ବେଶ ରୋମାଞ୍ଚକର ହୋଇଥିଲା । ଏଥିସହିତ ପ୍ରଥମେ ମହିଳା ବିଭାଗର ଏକ ପ୍ରଦର୍ଶନୀ ମ୍ୟାଚ ଖେଳାଯାଇଥିଲା । ଏଥିରେ କିଟ୍ ଭୁବନେଶ୍ବର ଟିମ କଟକକୁ ପରାସ୍ତ କରି ବିଜୟୀ ହୋଇଥିଲା ।
ଏହି ରାଜ୍ୟସ୍ତରୀୟ ଭଲିବଲ ଟୁର୍ଣ୍ଣାମେଣ୍ଟର ଉଦଘାଟନୀ ଉତ୍ସବରେ ଧାବିକା ଦୂତି ଚାନ୍ଦ, ଅଲ ଓଡିଶା ଭଲିବଲ ଆସୋସିଏସନର ସଂପାଦକ ଗଗନେନ୍ଦୁ ଦାସ ଯୋଗ ଦେଇ ଗ୍ରାମାଞ୍ଚଳରେ ଭଲି ବଲ ଖେଳର ପ୍ରଚାର ଓ ପ୍ରସାର ପାଇଁ ହୋଇଥିବା ଏଭଳି ଉଦ୍ୟମକୁ ପ୍ରଶଂସା କରିଥିଲେ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
