ଯାଜପୁର: ପୁଣିଥରେ ଯାଜପୁର ଜିଲ୍ଲାରେ କଙ୍ଗାରୁ କୋର୍ଟ । ଏଥର କିନ୍ତୁ ବୋହୁକୁ ମରଣାନ୍ତକ ଆକ୍ରମଣ କରିବା ପରେ ଗ୍ରାମବାସୀଙ୍କ ଆକ୍ରୋଶର ଶିକାର ହୋଇଛନ୍ତି ଦିଅର, ଶଶୁର ଏବଂ ଶାଶୁ । ଘଟଣାଟି ଘଟିଛି ଯାଜପୁର ଜିଲ୍ଲା ପାଣିକୋଇଲି ଥାନା ଅନ୍ତର୍ଗତ ତେଜପୁର ଗ୍ରାମରେ ।
ବୋହୁକୁ ତାର ସ୍ୱାମୀର ଅନୁପସ୍ଥିତିରେ ଆକ୍ରମଣ କରିବା ପରେ ଗ୍ରାମବାସୀ ମାନେ ଗାଁ ଦାଣ୍ଡରେ ଏହି ତିନିଜଣଙ୍କୁ ବାନ୍ଧି ଚଳାଇ ଚଳାଇ ବୁଲାଇଥିଲେ । ପରେ ଖବର ପାଇ ପୋଲିସ ପହଞ୍ଚି ବୋହୁ ସରୋଜିନୀ ସ୍ବାଇଁଙ୍କୁ ମେଡିକାଲ ପଠାଇବା ସହ ଦିଅର, ଶଶୁର ଏବଂ ଶାଶୁକୁ ଗିରଫ କରିଛି ଓ ସେମାନଙ୍କ ବିରୋଧରେ ହତ୍ୟା ଉଦ୍ୟମ ଭଳି ଦଫା ମଧ୍ୟ ଲଗାଇଛି । ଘଟଣାରୁ ଜଣାପଡ଼ିଛି ଯେ, ଉକ୍ତ ଗ୍ରାମର କାଳନ୍ଦୀ ସ୍ବାଇଁଙ୍କ ବଡ ପୁଅ ଯଇରାମ ଏବଂ ବୋହୁ ସରୋଜିନୀ ଘର ଛାଡ଼ି ଅନ୍ୟତ୍ର ରହୁଥିଲେ ଫଳରେ ପାଣିକୋଇଲି ଛକରେ ବ୍ୟବସାୟ କରୁଥିବା ଯଇରାମ ବେପାରକୁ ଚାଲିଯିବା ପରେ ବୋହୁ ସରୋଜିନୀଙ୍କୁ ଦିଅର ଓ ଅନ୍ୟମାନେ ସର୍ବଦା ନିର୍ଯ୍ୟାତନା ଦେଉଥିଲେ।
ଏ ନେଇ ଗତ 18 ତାରିଖରେ ପାଣିକୋଇଲି ଥାନାରେ ଉଭୟ ପକ୍ଷ ମାମଲା ରୁଜୁ କରିଥିଲେ । ତେବେ ସରୋଜିନୀଙ୍କ ମାମଲାଟି ଯୌତୁକ ଜନିତ ହୋଇଥିବାରୁ ଅନ୍ୟପକ୍ଷ ଉତ୍ତେଜିତ ହୋଇପଡିଥିଲେ । ଫଳରେ ଗତକାଲି ଅପରାହ୍ନରେ ଯଇରାମ ବେପାରକୁ ବାହାରି ଯିବା ପରେ ଦିଅର ଓ ଅନ୍ୟମାନେ ସରୋଜିନୀଙ୍କୁ ଠେଙ୍ଗାରେ ପିଟି ରାସ୍ତା ଉପରେ ପକାଇ ଦେଇଥିଲେ ଏବଂ ତାଙ୍କ ପାଖରେ ଦିଅର ମହେନ୍ଦ୍ର ସ୍ୱାଇଁ ଠେଙ୍ଗା ଧରି ଜଗିରହିଥିଲା ଫଳରେ ଗ୍ରାମବାସୀ ଜଣକ ପରେ ଜଣଙ୍କୁ ରସିରେ ବାନ୍ଧି ଗାଁ ଦାଣ୍ଡରେ ଚଲାଇ ଚଲାଇ ନେଇଥିଲେ । ତେବେ ଏ ସମ୍ପର୍କରେ ପୋଲିସ କିଛି କହିବାକୁ ମନା କରିଦେଇଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
