ଯାଜପୁର: ପାଟରଙ୍ଗା ଗାଁର ବିଚାରଧୀନ କଏଦୀଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟଣାରେ ଜେଲ କର୍ତ୍ତୃପକ୍ଷଙ୍କ ବିରୋଧରେ କେସ ପଞ୍ଜୀକରଣ ଦାବିରେ କୋରେଇ ଥାନାରେ ଧାରଣା ଦେଲେ ପରିବାର । ମୃତ କଏଦୀ ଜଣଙ୍କ ନାଁ ସୁମନ୍ତ ପାତ୍ର । ସୁମନ୍ତ ଏକ ଦୁଷ୍କର୍ମ ଅଭିଯୋଗରେ ବିଚାରଧୀନ କଏଦୀ ଭାବେ ଯାଜପୁର ସବ ଜେଲର ରହିଥିଲେ ।
ମିଳିଥିବା ସୂଚନା ଅନୁସାରେ, ଗତ କିଛିଦିନ ତଳେ କୋରେଇ ଥାନା ପାଟରଙ୍ଗାର ଲକ୍ଷ୍ମୀଧର ପାତ୍ରଙ୍କ ପୁଅ ସୁମନ୍ତ ଏକ ଦୁଷ୍କର୍ମ ମାମଲାରେ ଗିରଫ ହେବା ସହ ଯାଜପୁର ସବଜେଲରେ ତାଙ୍କୁ କଏଦୀ ଭାବେ ରଖାଯାଇଥିଲା । ୧୦ ତାରିଖ ଦିନ ତାଙ୍କର ଦେହ ଖରାପ ହେବାରୁ ଜେଲ କର୍ତ୍ତୃପକ୍ଷ ଚିକିତ୍ସା ପାଇଁ କଟକ ବଡ଼ ମେଡିକାଲରେ ଭର୍ତ୍ତି କରିଥିଲେ । ହେଲେ ସେଠାରେ ତାଙ୍କର ମୃତ୍ୟୁ ହୋଇଥିଲା । ତେବେ ଜେଲ କର୍ତ୍ତୃପକ୍ଷଙ୍କ ଅବହେଳା ଯୋଗୁ ସୁମନ୍ତର ମୃତ୍ୟୁ ହେଇଥିବା ଅଭିଯୋଗ କରି ଗତ ୧୩ ତାରିଖ ଦିନ ଯାଜପୁର ସବ ଜେଲର କର୍ତ୍ତୃପକ୍ଷଙ୍କ ନାଁରେ କୋରେଇ ଥାନାରେ ଅଭିଯୋଗ ମଧ୍ୟ କରିଥିଲେ ମୃତକଙ୍କ ବାପା । ମାତ୍ର ୭୨ ଘଣ୍ଟା ବିତି ଯାଇଥିଲେ ବି କୋରେଇ ଥାନାଧିକାରୀ ଲକ୍ଷ୍ମୀଧରଙ୍କ ଏତଲାକୁ ପଞ୍ଜୀକରଣ କରିନଥିବା ଅଭିଯୋଗ କରିଛନ୍ତି ସୁମନ୍ତଙ୍କ ପରିବାର ।
ତେବେ ସୁମନ୍ତର ପରିବାର ଲୋକେ ଜେଲ କର୍ତ୍ତୃପକ୍ଷଙ୍କ ବିରୋଧରେ ଆଜି କେସ ରେଜିଷ୍ଟ୍ରେସନ ଦାବି କରିଛନ୍ତି । ମାନବାଧିକାର କର୍ମୀ ବିଶ୍ବନାଥ ପାତ୍ରଙ୍କ ନେତୃତ୍ବରେ ମୃତକଙ୍କ ପରିବାର ସହ ଗ୍ରାମବାସୀ ଏକ ଶୋଭାଯାତ୍ରାରେ ଆସି କୋରେଇ ଥାନା ସମ୍ମୁଖରେ ଧାରଣାରେ ବସିଥିବା ଦେଖିବାକୁ ମିଳିଛି । ସେପଟେ ଥାନା ଅଧିକାରୀ ଏକ ଷ୍ଟେସନ ଡାଏରୀ କରି ଘଟଣାର ତଦନ୍ତ ଆରମ୍ଭ କରିଥିବା ଜଣାପଡ଼ିଛି।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
