ଯାଜପୁର: ଚାହୁଁ ଚାହୁଁ ସେତୁ ଉଦଘାଟନର ସାତ ବର୍ଷ ପୁରିବାକୁ ବସିଥିବା ବେଳେ ଏବେ ସୁଦ୍ଧା ବନ୍ଧ ସଂଯୋଗୀକରଣ ରାସ୍ତା ନିର୍ମାଣ ହୋଇପାରିନାହିଁ । ଆଉ ଏଥିପାଇଁ ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଯାଜପୁର ଜିଲ୍ଲା କୋରେଇ ବ୍ଲକ ମଥୁରାପୁର ରାସ୍ତାର ଅବସ୍ଥା ଆଖିରେ ନଦେଖିଲେ ବିଶ୍ବାସ କରିହେବନାହିଁ । ଖରାଦିନେ ତ ଯାତାୟତ ଅସମ୍ଭବ, ଆଉ ବର୍ଷାଦିନ କଥା ପଚାରେ କିଏ । ଏନେଇ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିବାରୁ ଖୁବଶୀଘ୍ର ବିଭାଗୀୟ ଅଧିକାରୀଙ୍କ ସହ ଆଲୋଚନା କରାଯାଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି ।
ଏ ହେଉଛି ଯାଜପୁର ଜିଲ୍ଲା କୋରେଇ ବ୍ଲକ ଅନ୍ତର୍ଗତ ମଥୁରାପୁର ମଧ୍ୟ ଦେଇ ଯାଇଥିବା ବରୁଣ୍ଡେଇ ମୁକୁନ୍ଦପୁର ରାସ୍ତା । ରାସ୍ତା ନୁହେଁ ତ ପୁରା ମରଣଯନ୍ତା । ଏହି ରାସ୍ତା ଉପରେ ପାଖାପାଖି 3ଟି ପଞ୍ଚାୟତର 15 ହଜାରରୁ ଉର୍ଦ୍ଧ୍ବ ଲୋକ ଯିବା ଆସିବା ପାଇଁ ନିର୍ଭର କରିଥାନ୍ତି । ଏନେଇ ଯାଜପୁର ଓ କେନ୍ଦୁଝର ଜିଲ୍ଲାକୁ ସଂଯୋଗ କରୁଥିବା ବୈତରଣୀ ନଦୀ ଉପରେ 29 ଡିସେମ୍ବର 2013 ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ବାରା ଏହି ବୈତରଣୀ ସେତୁର ଉଦଘାଟନ ହୋଇଥିଲା । ସେତେବେଳେ ପ୍ରୀତିରଞ୍ଜନ ଘଡାଇ ଏଠାକାର ବିଧାୟକ ଥିଲେ । ଏହାପରେ ଆକାଶଦାସ ନାୟକ ଏବଂ ବର୍ତ୍ତମାନ ଅଶୋକ ବଳ କୋରେଇର ବିଧାୟକ ଅଛନ୍ତି । ଇତି ମଧ୍ୟରେ ତିନି ତିନି ଜଣ ବିଧାୟକ ଏଠାରୁ ପ୍ରତିନିଧିତ୍ଵ କରୁଥିବା ବେଳେ ଏହି ସେତୁ ସଂଲଗ୍ନ ରାସ୍ତାଟି ଉଧେଇ ପାରୁନାହିଁ ।
ଖରାଦିନେ ଏହି ରାସ୍ତାରେ ଚାଲିକରି ଯିବା ଅସମ୍ଭବ, ଆଉ ବର୍ଷାଦିନ କଥା ପଚାରେ କିଏ ବୋଲି ଅତି କ୍ଷୋଭର ସହ ଏଠାକାର ଗ୍ରାମବାସୀମାନେ କହିଛନ୍ତି । ଯାଜପୁର-କେନ୍ଦୁଝର-ଭଦ୍ରକ ଆଦି ତିନୋଟି ଜିଲ୍ଲାର ନଦୀକୂଳିଆ ଲୋକେ ଏହା ଉପରେ ନିର୍ଭର କରନ୍ତି । ବାରମ୍ବାର ପ୍ରଶାସନ ଏବଂ ରାଜନେତାଙ୍କୁ କହିଲେ ମଧ୍ୟ ଆଜି ପର୍ଯ୍ୟନ୍ତ କେହି ଏହି କଥାକୁ କର୍ଣ୍ଣପାତ କରୁନାହାନ୍ତି । ଖାଲି ମିଛ ବିଲ କରି କିଛି ମହରମ ରାସ୍ତାରେ ବିଞ୍ଚି ଦେଇ କଣ୍ଟ୍ରାକ୍ଟର ଓ ଅଫିସରଙ୍କ ଭିତରେ ମଧୁଚନ୍ଦ୍ରିକା ଚାଲିଛି ବୋଲି ଅଭିଯୋଗ ହୋଇଛି ।
ନଦୀକୂଳବର୍ତ୍ତୀ 3ଟି ଜିଲ୍ଲାର ଲାଇଫ ଲାଇନ ଭାବେ ପରିଚିତ ଏହି ରାସ୍ତାରେ ଦୈନିକ ଶହଶହ ଗାଡିମଟର ଓ ଲୋକମାନେ ଯା ଆସ କରୁଛନ୍ତି । ତେଣୁ ଯଦି ଆଗାମୀ ଦିନରେ ସରକାର ଏହି ରାସ୍ତାକୁ ପିଚୁ କିମ୍ବା କଙ୍କ୍ରିଟ ନ କରନ୍ତି, ତେବେ ଆନ୍ଦୋଳନର ଚେତାବନୀ ଦେଇଛନ୍ତି ସମ୍ପୃକ୍ତ ଅଞ୍ଚଳର ଜନସାଧାରଣ । ସେପଟେ ଜିଲ୍ଲାପାଳଙ୍କ ନଜରକୁ ଏହା ଆଣିବା ପରେ ଵିଭାଗୀୟ ଅଧିକାରୀଙ୍କ ସହ ଆଲୋଚନା କରି ତୁରନ୍ତ ଆବଶ୍ୟକ ପଦକ୍ଷେପ ନିଆଯିବ ବୋଲି ସେ କହିଛନ୍ତି । ଏବେ ଦେଖିବାକୁ ବାକି ରହିଲା କେବେ ଜିଲ୍ଲାପାଳ ନିଜ ପ୍ରତିଶୃତି ରଖୁଛନ୍ତି ଓ କେବେ ବିଭାଗୀୟ ଅଧିକାରୀମାନେ ଆବଶ୍ୟକୀୟ ପଦକ୍ଷେପ ନେଉଛନ୍ତି ।
ଯାଜପୁରର ଜ୍ଞାନ ରଞ୍ଜନ ଓଝା, ଇଟିଭି ଭାରତ
