ଯାଜପୁର:ଦାନଗଦୀ ବ୍ଲକ ବାଲିଆପାଳ ଅଞ୍ଚଳବାସୀ ପ୍ରଦୂଷଣ ସମସ୍ୟାରେ ଅତିଷ୍ଠ ହୋଇପଡିଛନ୍ତି । ଏଠାରେ ଥିବା ବି ସି ମହାନ୍ତି କାରଖାନା ଦ୍ବାରା ବ୍ୟାପକ ପ୍ରଦୂଷଣ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି । ଏହା ସହିତ କାରଖାନା ପ୍ରତିଷ୍ଠା ହେବା ସମୟରେ ଦିଆଯାଇଥିବା ପ୍ରତିଶ୍ରୁତି ପୂରଣ ହୋଇନଥିବା କହିଛନ୍ତି । ଅନ୍ୟପଟେ ଏହି ଅଭିଯୋଗକୁ ଖଣ୍ଡନ କରିଛନ୍ତି କାରଖାନା କର୍ତ୍ତୃପକ୍ଷ । ସ୍ଥାନୀୟ ଅଞ୍ଚଳବାସୀଙ୍କୁ ନିଯୁକ୍ତି ଦିଆଯାଇଛି ଓ କାରଖାନା ସଂପ୍ରସାରଣ ହେଲେ ଅଧିକ ଲୋକଙ୍କୁ ନିଯୁକ୍ତି ମିଳିବ ବୋଲି କାରଖାନା କର୍ତ୍ତୃପକ୍ଷ ପ୍ରତିଶ୍ରୁତି ଦେଇଛନ୍ତି ।
ବିସି ମହାନ୍ତି କାରଖାନା ବିରୋଧରେ ଏକତ୍ରୀତ ହୋଇଛନ୍ତି ଗ୍ରାମବାସୀ । ସ୍ଥାନୀୟ ଲୋକଙ୍କୁ ନିଯୁକ୍ତି ସହିତ ପ୍ରଦୂଷଣ ସମସ୍ୟା ଅତିଷ୍ଠ ହୋଇ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ଗ୍ରାମବାସୀ । ଏଥି ସହିତ କାରଖାନା ଆଖପାଖ ଅଞ୍ଚଳରେ ପାନୀୟ ଜଳ ଠାରୁ ଆରମ୍ଭ କରି ନାନା ସମସ୍ୟା ପ୍ରତି ସଂପୂର୍ଣ୍ଣ ଅଣଦେଖା କରୁଛି କମ୍ପାନୀ । କାରଖାନା କର୍ତ୍ତୃପକ୍ଷଙ୍କୁ ବାରମ୍ବାର ଅବଗତ କରାଯାଉଥିଲେ ହେଁ କୌଣସି ପଦକ୍ଷେପ ଗ୍ରହଣ କରାଯାଉନଥିବା ସେମାନେ କହିଛନ୍ତି । ସ୍ଥାନୀୟ ଲୋକେ ଏଠାରେ ନିଯୁକ୍ତି ପାଇଁ ଦୀର୍ଘଦିନ ଧରି ଦାବି କରୁଥିବା ବେଳେ କମ୍ପାନୀ ଜିଲ୍ଲା ବାହାରର କର୍ମଚାରୀଙ୍କୁ ନିଯୁକ୍ତି ଦେଉଥିବା ଗ୍ରାମବାସୀ ଅଭିଯୋଗ କରିଛନ୍ତି।
ସେପଟେ କିନ୍ତୁ ଅଭିଯୋଗକୁ ସଂପୂର୍ଣ୍ଣ ଖଣ୍ଡନ କରିଛନ୍ତି କମ୍ପାନୀ କର୍ତ୍ତୃପକ୍ଷ । କମ୍ପାନୀ ପ୍ରତିଷ୍ଠା ହେବା ଦିନଠାରୁ ସ୍ଥାନୀୟ ଅଞ୍ଚଳବାସୀଙ୍କ ସମସ୍ୟା ପ୍ରତି ଗୁରୁତ୍ବ ଦିଆଯାଉଛି ଓ ଆବଶ୍ୟକତା ଅନୁଯାୟୀ ସ୍ଥାନୀୟ ଲୋକଙ୍କୁ ନିଯୁକ୍ତି ଦିଆଯାଉଛି । ଆଗକୁ କାରଖାନା ସଂପ୍ରସାରଣ ହେଲେ ଅଧିକ ନିଯୁକ୍ତିର ସୁଯୋଗ ଦିଆଯିବ ବୋଲି କାରଖାନା କର୍ତ୍ତୃପକ୍ଷ ସଫେଇ ଦେଇଛନ୍ତି।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
