ଯାଜପୁର: ଜିଲ୍ଲାପାଳଙ୍କ ବିରୋଧରେ ଅଦାଲତ ଅବମାନନା ଅଭିଯୋଗ । ଯାଜପୁର ଜିଲ୍ଲାପାଳଙ୍କ ବିରୋଧରେ ମାନ୍ୟବର ହାଇକୋର୍ଟଙ୍କ ଅଦାଲତ ଅବମାନନା ଅଭିଯୋଗ ।
ଧର୍ମଶାଳାର ସୂଚନାଅଧିକାର କର୍ମୀ ସର୍ବେଶ୍ବର ବେହୁରାଙ୍କ ପକ୍ଷରୁ ଆଗତ ଏକ ମାମଲାର ଶୁଣାଣିରେ ଜିଲ୍ଲାପାଳ ଅବହେଳା କରିଥିବା ଦର୍ଶାଇ ଏଭଳି ଏକ ମକଦ୍ଦମା ରୁଜୁ ହୋଇଥିବା ଜଣାପଡିଛି ।
ସୂଚନା ମୁତାବକ, ଧର୍ମଶାଳା ତହସିଲ ଅନ୍ତର୍ଗତ ଡଙ୍କାରି ସାଉଥ ସାଇଟରେ ରହିଛି ରାଣିବନ୍ଧ ଡ୍ୟାମ । ଏହି ଅଞ୍ଚଳରେ ପଥର ଖନନ ପାଇଁ ଲିଜ ଅନୁମତି ଦେଲେ ପରିବେଶ ପ୍ରଦ୍ୟୁଷଣ ହେବାର ଆଶଙ୍କା ଥିବା ଦର୍ଶାଇ ହାଇକୋର୍ଟରେ ଅପିଲ କରିଥିଲେ ସର୍ବେଶ୍ବର ।
ଏହି ମାମଲାର ଶୁଣାଣି କରି ହାଇକୋର୍ଟ ଜିଲାପ୍ରଶାସନକୁ ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ । କିନ୍ତୁ ଜିଲ୍ଲାପ୍ରଶାସନ ଏହାକୁ ଅଣଦେଖା କରି ଓଲଟି ଏହି ଅଞ୍ଚଳକୁ ନିଲାମ ଘୋଷଣା କରିଥିଲେ । ଏହାପରେ ସର୍ବେଶ୍ବର ହାଇକୋର୍ଟଙ୍କ ଦ୍ବାରସ୍ଥ ହୋଇ ଜିଲାପାଳଙ୍କ ବିରୋଧରେ ଅଦାଲତ ଅବମାନନା ମାମଲା ରୁଜୁ କରିଛନ୍ତି ।
ଶୁକ୍ରବାର ଜିଲ୍ଲାପ୍ରଶାସନ ପକ୍ଷରୁ ସର୍ବେଶ୍ବରଙ୍କୁ ନୋଟିସ ପଠାଯାଇ ତାଙ୍କ ଅଭିଯୋଗ ଶୁଣାଯାଇଛି । ତୁରନ୍ତ ଏନେଇ ହାଇକାର୍ଟଙ୍କୁ ରିପୋର୍ଟ ପ୍ରଦାନ କରାଯିବ ବୋଲି ସୂଚନା ମିଳିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
