ଯାଜପୁର: ଜିଲ୍ଲା ଧର୍ମଶାଳା ବ୍ଲକ କୋତପୁର ଠାରେ ସୃଷ୍ଟି ହୋଇଥିବା ଘାଇକୁ ନେଇ ଘନେଇଛି ବିବାଦ। ଜୋର୍ ଧରିଛି ରାଜନୀତି । ଏଠାରେ ଡିନାମାଇଟ୍ ଫୁଟାଇ ମନୁଷ୍ୟ କୃତ ଘାଇ ସୃଷ୍ଟି କରାଯାଇଥିବା ଅଭିଯୋଗ ଆସିଛି । ଏନେଇ ଉଚ୍ଚସ୍ତରୀୟ ତଦନ୍ତ ଓ କାର୍ଯ୍ୟାନୁଷ୍ଠାନ ଦାବି କରିଛି ରାଜ୍ୟ ବିଜେପି ।
ସୂଚନା ଅନୁଯାୟୀ ଦୁଇ ଦିନ ତଳେ ବୁଦ୍ଧଲିଙ୍ଗ-ରମ୍ଭାପୁର ନଦୀବନ୍ଧ ରାସ୍ତାରେ ପ୍ରାୟ 3ଶହ ଫୁଟର ଏକ ବିରାଟ ଘାଇ ସୃଷ୍ଟି ହୋଇଥିଲା । ନିକଟରେ ଏହି ବନ୍ଧର ମରାମତି କରିଥିବା ଠିକା ସଂସ୍ଥାର ଏଥିରେ ସମ୍ପୃକ୍ତି ଥିବା ଅଭିଯୋଗରେ ଦର୍ଶାଯାଇଛି । ସମ୍ପୃକ୍ତ ଠିକାଦାର ସ୍ଥାନୀୟ ବିଧାୟକଙ୍କର ସମ୍ପର୍କୀୟ ବୋଲି କୁହାଯାଇଛି । ବନ୍ଧ କାମ ଖରାପ ହୋଇଥିବାରୁ ନଦୀ ବଢି ସମୟରେ ଜାଣି ଶୁଣି ଏପରି କରାଯାଇଥିବା ସ୍ଥାନୀୟ ଅଞ୍ଚଳର ବିଜେପି ନେତୃତ୍ବ ଅଭିଯୋଗ ଆଣିଛନ୍ତି ।
ତେବେ ଏହି ଅଭିଯୋଗକୁ ଭିତ୍ତି କରି ଦୁଇ ଜଣଙ୍କୁ ଥାନାରେ ଅଟକ ରଖି ପୋଲିସ୍ ଦ୍ବାରା ଘଟଣାର ତଦନ୍ତ ଚାଲିଥିବା ଯାଜପୁର ଜିଲ୍ଲାପାଳ ରଞ୍ଜନ କୁମାର ଦାସ କହିଛନ୍ତି । ସେପଟେ ଘଟଣାର ଉଚ୍ଚ ସ୍ତରୀୟ ତଦନ୍ତ ଓ କାର୍ଯ୍ୟାନୁଷ୍ଠାନ ଦାବି କରିଛି ରାଜ୍ୟ ବିଜେପି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
