ଯାଜପୁର: ଆଗକୁ ଆସୁଛି ପୌର ନିର୍ବାଚନ । ସେଥିପାଇଁ ବିଜେପି ପକ୍ଷରୁ ଆଗୁଆ ପ୍ରସ୍ତୁତି ଚାଲିଛି । ପୌର ନିର୍ବାଚନକୁ ଦୃଷ୍ଟିରେ ରଖି ଯାଜପୁର ଜିଲ୍ଲା ବ୍ୟାସନଗର ସହରର ରୟାଲ୍ କଳିଙ୍ଗ ହୋଟେଲ ଠାରେ ପୌରାଞ୍ଚଳର ବିଜେପି କାର୍ଯ୍ୟକର୍ତ୍ତାଙ୍କର ଏକ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି ।
ଏହି ଶିବିରରେ ବିରୋଧି ଦଳ ଉପନେତା ବିଷ୍ଣୁ ଚରଣ ସେଠୀ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ପବିତ୍ର ମୋହନ ଦାଶ, ବିଜେପି ନେତା ବିଶ୍ବଜିତ୍ ନାୟକ, ସତ୍ୟନାରାୟଣ ମହାନ୍ତି, ଚନ୍ଦ୍ରଶେଖର ପଣ୍ଡା ପ୍ରମୁଖ ଦଳୀୟ ନେତାମାନେ ଯୋଗଦେଇଥିଲେ । ଏଥିରେ ବ୍ୟାସନଗର ମଣ୍ଡଳ ବିଜେପି ସଭାପତି ଅଚ୍ୟୁତାନନ୍ଦ ଦାସ ସଭାପତିତ୍ବ କରିଥିଲେ । ପୌରାଞ୍ଚଳର ବିଭିନ୍ନ ୱାର୍ଡର ଦଳୀୟ କର୍ମକର୍ତ୍ତାମାନେ ଏହି ଶିବିରରେ ଯୋଗଦେଇଥିଲେ । ଦଳୀୟ ସଂଗଠନକୁ ତୃଣମୂଳ ସ୍ତରରେ ମଜବୁତ୍ କରିବା ସହିତ ଆଗାମୀ ପୌର ନିର୍ବାଚନରେ ବାଜିମାତ୍ ମାରିବା ଲକ୍ଷ୍ୟ ନେଇ ବିଜେପି ପକ୍ଷରୁ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଥିବା ବିରୋଧି ଦଳ ଉପନେତା ବିଷ୍ଣୁ ଚରଣ ସେଠୀ ମନ୍ତବ୍ୟ ଦେଇଥିଲେ । ଏଠାରେ ରାଜ୍ୟର ବିଜେଡି ସରକାରଙ୍କ ଜନବିରୋଧି କାର୍ଯ୍ୟର କଡା ନିନ୍ଦା କରାଯାଇଥିଲା ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
