ଯାଜପୁର: ଆଧାର କାର୍ଡ ଜାଲିଆତି ଘଟଣାରେ ଜଣେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ଯାଜପୁର ରୋଡ ପୋଲିସ । ଗିରଫ ଅଭିଯୁକ୍ତ ବିଟୁ ବିଶ୍ବାସ ଓରଫ ଶେଖ ସୋଲେମାନ ବୋଲି ଜଣାପଡିଛି। ତା' ବିରୁଦ୍ଧରେ ଭାରତୀୟ ଦଣ୍ଡବିଧାନ ଆଇନର ଧାରା 468, 471, 494 ଅନୁଯାୟୀ ମାମଲା ରୁଜୁ କରାଯାଇଛି।
ଅଭିଯୁକ୍ତ ବିଟୁ ଜାଲ କାଗଜପତ୍ର ପ୍ରସ୍ତୁତ କରିବା ସହ ନକଲି କାଗଜପତ୍ର ଜରିଆରେ ସମ୍ପତ୍ତି କ୍ରୟ କରୁଥିଲା । ଏହା ସହ ଏକାଧିକ ପତ୍ନୀ ଗ୍ରହଣ କରିଥିଲା । ତା' ନାଁରେ ପ୍ରଥମେ ପଶ୍ଚିମବଙ୍ଗର ମୁର୍ଶିଦାବାଦ ଅଞ୍ଚଳରେ ଗୋଟିଏ ଆଧାରକାର୍ଡ ଥିବାବେଳେ ଯାଜପୁର ରୋଡ ଚୋରଦା ଅଞ୍ଚଳରେ ଆଉ ଏକ ଆଧାରକାର୍ଡ ଥିଲା ।
ଉଭୟ ଆଧାରକାର୍ଡର ନମ୍ବର ସମାନ ରହିଥିଲା । ଏ ନେଇ ସ୍ଥାନୀୟ ବଜରଙ୍ଗ ଦଳ ଏବଂ ବିଶ୍ବ ହିନ୍ଦୁ ପରିଷଦ ଯାଜପୁର ରୋଡ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ଏ ଘଟଣାର ତଦନ୍ତ କରି ତାକୁ ଗିରଫ କରିଥିଲା । ସୋମବାର ଅଭିଯୁକ୍ତକୁ କୋର୍ଟ ଚାଲାଣ କରାଯାଇଥିବା ବେଳେ ଘଟଣାର ଅଧିକ ତଦନ୍ତ ଦାବି କରିଛି ବିଶ୍ବହିନ୍ଦୁ ପରିଷଦ।
ଯାଜପୁରରୁ ଜ୍ଞାନ ଓଝା, ଇଟିଭି ଭାରତ
